.






أنا نجحت وأخدت البكالوريوس






.

امبارح كنت فى رحلة صيد

كنت حاجز الرحلة دي من اكتر من شهر..... و كان ميعادها الاسبوع اللى فات بس اتأجلت عشان تصاريح حرس الحدود ...... المهم طلعناها امبارح ده تلخيص الرحلة زي ماكتبته على المنتدى لان الشباب فى الرحلة قالوا لى اكتب انت الموضوع .... والصور مع واحد صاحبنا اسمه خالد شمس وان شاء الله اجيبها قريبا

طلعنا رحلة مع الملاح(الملاح ده اسم الشهرة بس اسمه أستاذ ياسر عباس) يوم الجمعة 22 يونيو ...... وطبعا مش هاقول لكم الصحبة كانت جمييييييييييلة والملاح كانت صحبته اجملللللللللللللل والكلام ده لانكم عارفين طبعا ان المنتدى هنا كله ناس زي الفل ومش محتاج اوصف هم اد اية كويسين واخلاقهم عالية جدا والواحد بيحس معاهم انه لاقى نفسه ومرتاح نفسيا ومبسوط......الكلام ده معروف

هاقول لكم وصف سريع للرحلة وحاجتين كمان مهمين شوية

اتجمعنا الساعة 2:30 بالليل فى ميدان الجيزة –انا وفردين – واستنينا الباقين لغاية ما وصلوا بسلامتهم الساعة 3:30 وطبعا عدينا على البنزينة وقعدنا نظبط الكاوتش ونملأ بنزين والباشاوات اشتروا الكانز والحاجات وكدة يعني

وصلنا بورتريه السخنة متاخرين شوية وركبنا المركب الساعة 7 صباحا.....الملاح مع انه كان نايم فى المركب اليوم اللى قبلها وباين عليه الارهاق الا انه بصراحة كان............... مش عارف اقول اية بس كلمة شمعة تحترق من اجل الاخرين والعطاء والايثار مش هيكفوا الملاح حقه....وانا عارف انكم عارفين الملاح وبرضة مش هاطيل الوصف....لكن الرجل كان رايح جاي بيننا ويعمل السنون لده ويطعم السن لده ويهزر ويضحك ويصطاد السمك ويرميه فى اى جردل يشوفه ادامه واهداني شخصيا كذا سمكة فرحت بيهم جدا بصراحة-هدية استاذ ياسر غالية يا جماعة- وبعدين الريس بتاع المركب قمة فى الاخلاق والذوق وكل شوية دور شاى ولو حد عايز حاجة يساعده وبشوش جدا ومرحب

الشىء اللى لفت نظرى جدا......قبل ما نبدأ نشعر ان الدور بيمنع او السمك مش أد كدة .....نلاقى الملاح طلع على مقدمة المركب ورفع الهلب والريس سيد(مش رمضان) شغل الموتور ونقل بينا على شعبة تانية.......تخيلوا الرجل نقل بينا على 7 شعب فى نهار واحد فقط؟ مشى بينا مشاوير كتيرة جدا فى البحر من هنا لهنا ومن شعبة الكوشر لشعبة الشخرم ومن شعبة الشاويش لشعبة الحريد.......عمال يلف بينا ومشينا جر اكتر من نص ساعة او ثلاث ارباع ساعة كمان(اينعم مفيش سمك جر كتير فى السخنة لكن انا بتكلم عن مجهود الرجل) وكان فيه ادامنا سمك بينط فى المية وبيطير كدة.....وكمان شفنا دلافين كتير حوالى 6 او 8 ماشيين فى سرب كذا مرة نشوفهم وعمالين يتنططوا فوق المية ويبصوا ناحيتنا و لعبوا حوالينا شوية وخالد شمس حاول يصورهم بس مش عارف هو عرف يصورهم واللا لا

خالد كان نايم طول اليوم ......اما باقى الرحلة اشتغلوا تمام....و انا فى الاول قعدت على دكة وجنبي خالد وهلال(لسة مبتدئين صيد) والدكة التانية قعد عليهم باقى الرحلة(طاقم محترفين) وانا معرفش وقلت لهم خلوها مسابقة وفارس لفارس والبحر سجال والكلام ده.....ثوانى ووقفنا على اول شعبة لقينا واحد طلع ما شاء الله كوشر حوالى نص كيلو وكانت بداية السمك وبداية المسابقة اللى مش متكافئة طبعا.....شوية ودكة المحترفين اشتغلوا ما شاء الله لانهم كانوا بيرموا على القاع وانا قاعد منزل السنارة وبتفرج على المية ....شكلها حلو بس على ما يبدو انا منزل السنارة فى مكان غلط...طبعا الشلة ورانا شغالين ما شاء الله....الله ينور..... وانا لقيت شوية سمك ابو شاويش ادامي فى المية فاشتغلت عليهم وفضلت الاعبهم بالطعم وجبنا الملقاف واخليهم يجروا ورا الطعم لغاية جنب الملقاف وحاولت اصطاد منهم كمية مرة واحدة ونخلى تحكيم المسابقة بالعدد مش بالوزن ونكسب......بس على مين.....سمك ناصح جدا وكل ما تقرب له بالملقاف يجرى بعيد والملقاف لونه اسود وواضح جدا ولو السمكة نظرها 6 على 36 برضة هتشوفه......المهم قضيتها انا وخالد وصاحبه على السمك ابو شاويش وشوية ورحنا عالشعبة التانية ......الدكة اللى ورانا كانوا عاملين زي الماكينات.....دي مش ناس جاية تسترخى وتنبسط باليوم الجميل والشمس الظريفة والهواء فى البحر.....دي تقريبا ناس جاية تصطاد اكبر كمية ممكنة عشان تروح تبيع السمك او يخزنوا سمك الشهر.....طبعا ربنا يرزق الجميع بس لما تكون قبل الرحلة بتهزر وتضحك واول ما تطلع المركب تدى ظهرك للناس التانية وتعيش مع السنارة زي الماكينة.....تطعمها جمبرى وترمي وتشد وتطلع سمكة وتفكها وتطعم تانى وترمي....احساس ماكينة مش انسان....المهم دي كانت رؤيتى (مكتبتش كدة فى المنتدى طبعا)

وصلنا الشعبة التانية و واحد تانى طلع كوشر برضة كانت تقريبا اكبر سمكة فى الرحلة .....الف هنا وشفا يا عم

واستمرت الرحلة.....نقعد على الشعبة ساعة او ساعتين وننقل على شعبة تانية والمركب ما شاء الله كانت مريحة جدا وواسعة رغم اننا كنا 7 وطفل والملاح والريس.....بس الخيوط مشبكتش فى بعض كتير.....لكن انصح اى حد عايز يطلع على المركب يطلع 6 افراد فقط عشان تبقى مرتاح اكتر و لو هتبيت يوم بليلة خليها 4 افراد بس عشان تبقى مرتاح اكتر وتنام وقت مانت عايز....وعلى فكرة السراير ظريفة (اى خدمة يا عم ملاح على الاعلان الجامد اللى بعمله ده) بس فيه مشكلة واحدة وهى الشمس.....الملاح كان عامل تندة بس انا كسرتها وانا نازل(مانا لازم اسيب بصمة برضة) شديت الحبل بتاعها وانا نازل واتعلقت بيه لقيت الخشبة فجأة عملت تكككك وبقت حتتين....طبعا احراج جامد يعني الرجل تعب نفسه معانا ونكسر له التندة؟


على العصر كدة....ضربت معايا سمكة خنزيرة بلدي حوالى كيلو الا ربع......طلعتها لغاية فوق المية وكنت ناسى العصفورة(زر تثبيت ذراع الماكينة عشان يسحب فى اتجاه واحد وما يسيبش)كنت سايبها مفتوحة ...سبت دراع المكنة ومديت ايدى امسك السمكة لقيت الخيط نزل بيها فى المية تانى ......ضربت ضربتين وفلتت وجريت فى المية......كنت عايز اخبط راسي فى اى حيطة بس للاسف المركب كلها خشب بس (: ....شوية لقيت الملاح اصطادها هى هى تانى او شبيهتها تماما واداهالى وقال دي سمكة هندي اللى هربت-رجل ذوق جدا وبيراعى مشاعر المبتدئين (: - واتصورنا معاها احنا الاتنين.....السمكة وصيادها الاول والتانى

طبعا ناس كتيرة عايز تعرف انا عملت الحركة المشهورة بتاعتى على المركب واللا لا......الحمد لله مكانش فيه اى غثيان او اووووووووع او اى مشاكل والحمد لله وكمان اديتها اكل مش هاكله وانا على البر.......يعني عوضت تعب السنين فى اليوم ده

و احنا بنجر ورايحين شعبة رابعة او خامسة....واحد معانا ربط رابلة فى حداف ورماها فى المية وجر بيها.....والملاح كمان ربط رابلة وبدأ يجر ...شوية ومحمد عيد دخل نام وساب الحداف لواحد تانى والرابلة فى المية.......يبدو ان الرابلة مكانتش مربوطة كويس ومحمد مصطفى جاي بيلمها عشان هنقف لقاها فكت ووقعت......طبعا موقف غلس وانا قعدت اشعللها واقول لمحمد مصطفى كدة توقع رابلة الرجل؟ طيب مش هتعرف تخلى بالك من الامانة قولله مبعرفش والكلام ده.....شاب غلس جدا

بعد ما نزلنا من المركب ظبطنا حاجتنا و طلعنا على القاهرة.....و احنا فى الطريق كان فيه عربية فيها شباب ماشيين امامنا....فرق بيننا وبينهم حوالى 50 او 60 متر بس.....ماشيين عادي جدا و فجاة دخلوا بالعربية فى الرمل شمال الطريق وعملت غبار جامد واخدوا الطريق بالعرض من أقصى اليسار لاقصى اليمين وخبطوا فى الحاجز على يمين الطريق كذا خبطة والعربية وقفت.....هى العربية ما اتقلبتش بيهم لكن خبطت جامد.....كل العربيات على الطريق وقفت ونزلنا نجرى عليهم عشان نلحقهم......كنا اقرب ناس ليهم.....الشباب كانوا خمسة....4 نازلين بدون ولا خدش وواحد منهم اتجرح خدوش بسيطة فى وشه وغسلوا وشه بالمية وخلاص.....بس العربية اصبحت قطعة حديد لا تساوى 50 قرش......الموتور اصبح فتافيت والكاوتشات تحس انها بتاعة عربية مركونة من عشرين سنة ....معووجة اوى ومفلطحة (الحديد نفسه) ومفيش حاجة اسمها ابواب ولا شنطة عربية ولا اى حاجة...بس الحمد لله الشباب نزلوا سالمين ومفيش اصابات خطيرة ولا حتى كسر

الموقف ده أثر فيا جدا.......الموضوع كله لحظات.....كانوا ماشيين من ثوانى بيمرحوا وبيلعبوا وبيفكروا هيعملوا اية لما يروحوا مصر.....فى ثوانى اخدوا درس عمرهم وشافوا الموت بعنيهم.......فى ثوانى راحت عربية تويوتا كورولا تقريبا ب 130 الف جنيه......مفيش حاجة باقية....لا سيارة ولا بيت ولا أرصدة بنكية ولا ولا......كلها دنيا زائلة......وحتى البشر نفسهم ماشيين وسايبينها

بنى احد الملوك يوما قصرا كبيرا مهيبا.......وقال من اكتشف عيبا فى هذا القصر جعلته وزيرا وكان من المقربين......جاء أهل العمارة والهندسة فاحتاروا ولم يكتشفوا أى عيب......دخل رجل عجوووووووووز وقال أيها الملك.....قصرك يصلح أن يكون جنة الا أن به عيبان.......خرابه ولو بعد حين وموت صاحبه ولو بعد حين.....

كنت عايز اكتب لكم قصة طريفة عن رحلة ظريفة.......... لكن حبيت افكر نفسي وافكركم ان دي دنيا.....الواحد ما يضيعهاش كدة....لازم استثمرها كويس

وقبل ما انهى الموضوع........تذكروا.......لا تنسى أخى المواطن.....مركب الملاح.....خش وعلم على الهلال.... نعم للملاح......يا ملاح فينك فينك.....طريق السخنة بيننا وبينك.... (وكفاية كدة شعارات والموضوع الجاى ننزل باليفط)

وكلمة حق برضة.... المركب ينقصها بعض اشياء بسيطة عشان تصلح للبيات.....ينقصها طلمبة مية تسحب من برميل او جركن كبير عشان الواحد لو احتاج يغسل وشه او ياخد دش وبرضة عشان الحمام يعني..... وناقص حتة قماش تبقى فى جانب التندة من الجانبين عشان تحجب الشمس من الجوانب شوية.....اينعم الشمس محجوبة من فوق لكن تندة من الجوانب هتكون مفيدة جدا......والملاح وعد بتوفير كل ده قريبا جدا باذن الله.....وعلى فكرة المركب فيها لايف جاكيتس بعدد الركاب وكلها جديدة بالاكياس ما شاء الله.....و بالنسبة للايش بوكشات (اللى بنحط فيها الشمك) او السنانير او الادوات او حتى كابات البحر......الملاح معاه كل حاجة ما شاء الله.....روح بس اخى المواطن حتى لو مبتعرفش تصطاد الملاح هيصطاد ويديك السمك (:

الرحلة كلفتني بالظبط 46 جنيه ..... ايجار المركب 220 جنيه فى اليوم على 7 اشخاص + اكرامية للبحار + الجمبرى والكاليمارى اللى كنا بنطعم بيه = 46 جنيه للفرد وانت هات أكلك وشربك معاك

صرفت حوالى 20 جنيه فى جبنة و زيتون وعيش و حاجات كدة .... والمواصلات كنا رايحين بعربيات شخصية وكان مفروض نتحاسب على البنزين-ده كلام محمد مصطفى اللى منظم الرحلة – بس لما قلت للشلة اللى فى العربية اللى كنت راكبها بصوا لى بصة ....بمعنى انت واطى اوى كدة لية....قلت لهم انا عمرى ما حاسبت حد على بنزين قبل كدة وطول عمرى بطلع انا وهشام وجيمي بس محمد مصطفى اللى قال لى كدة.....وانا مش واطي يعني عشان اقول كدة لكن هو قال لى ان النظام انجليزي

طبعا اى حد يقرأ المدونة ويحب يعمل رحلة بحرية ظريفة فى عرض البحر على مركب جميلة....يقول وانا احجز له مع الملاح او اديله الرقم وهو يظبط معاه وصدقونى الرحلة جميلة جدا ولازم تجربها

والسلام

فيه شوية افكار فى دماغى

محتار فيها بس انا حاسس انها افكار ممتازة وعبقرية كمان

اقولها لكم واحدة واحدة وقولوا رايكم



الاولى
عايز افتح شركة واسميها معاملة اسلامية
اقولكم اية اللى اوحى لى بالفكرة باختصار وانتو تقولوا رأيكم

فيه شركات عالمية لمعايير الجودة بتاعة المؤسسات الانتاجية زي الايزو و المش عارف اية.....الشركات دي بتعمل معيار جودة معين وبتعمل اعلانات كتير وبعدين شركات العالم تتسابق انها تاخد شعار من الشركة دي لان دي شهادة من الايزو مثلا ان الشركة اللى واخدة الشعار منها مطابقة للمعايير والمواصفات

وبعدين فكرت.....لية ميكونش فيه شركة اسلامية تعمل الكلام ده

فكرت وانا ماشى فى شارع عبد العزيز وانا شايف خوف الناس من التعامل مع المحلات وان كل اللى داخل مؤمن تماما انه هيتنصب عليه يعني هيتنصب عليه بس نصبة اخف من نصبة يبقى نتوكل على الله وربنا يستر

فكرت فى بادج او شعار صغير على باب المحلات المحترمة الامينة مكتوب عليه: هنا معاملة اسلامية ...باللون الاخضر وشغل اعلانات وكدة يعني...حاجة بسيطة بس مؤثرة

انا امبارح نزلت اشتريت كمبيوتر جديد لواحد قريبى....نزلت على كل المولات وبعدين نزلت على تكنولوجي مول اللى جنب السراج....بصراحة المول كله هناك اخوة وما شاء الله معاملة اسلامية بجد....واحد منهم بسأله عن سعر البوردة وكان هو تحت المكتب بيعمل حاجة :370 جنيه ولما طلع فوق المكتب وشافني -العبد لله ملتحي-قال لى وعشان حضرتك 350 بس.....استغربت جدا....جيت اخرج برة المحل نده عليا وقال لى انا مش عارف انت بتفكر فى اية بس السعر اللى قلته لك ده عشان انت بس أخ...و ربنا يعلم ....و فعلا السعر ده مشفتوش برة ابدا......كل الكلام برة 370 و 360 اقل حاجة خااااااااالص ..... والحمد لله

بفكر بأة فى حاجة زي كدة.....شعار معين يفيد ان المكان اللى انت داخله فيه معاملة اسلامية....اخلاق و ذوق وخدمة بعد البيع بكل امانة وكمان امانة فى البيع واخلاص مع الزبون يعني يقولك دي كويسة ودي وحشة متشتريهاش زي تجار المسلمين زمان ايام الخلافة

اعتقد الفكرة محتاجة رأس مال بسيط وشوية اعلانات قوية عن فكرة الشركة وان اخيرا فيه شركة معايير بمقاييس اسلامية

Disclaimer:
الفكرة دي وردت لى بصراحة لما استرجعت ذكرى اول حلقة من برنامج عمرو خالد صناع الحياة لما قال ان شركات المعايير العالمية مش بتعترف بفندق انه 5 نجوم الا لما يكون فيه خمور....لية ميكونش فيه شركات اسلامية على نفس الطراز بس تلغى كل ماهو حرام من قائمتها...ده للأمانة الحقوقية بس



الفكرة التانية

بدأت مع الترجمة المكثفة اللى بعملها دلوئتى.....بحاول اترجم حاجات كتيرة ومتنوعة....ومن فترة دخلت على مدونة شارم ولقيت فيها موضوع عن الجيش المصرى بالعربي.... انا حاطط البانر بتاعه على يمين الصفحة عندي.....الموضوع بيقول ان جيشنا تمام وبيجيب احصائيات مش عارف منين و فيديوهات مش عارف اتسربت ازاى ولما دخلت على ويكيبيديا بعدها كتبت الجيش المصرى بالانجليزي وطلع لى حاجات عجيبة.....طلع لى كل اللى عندنا...ايوة بجد طلع عدد الدبابات وموديلها وطرازاتها وتاريخ تحديثها وعدد الطيارات وموديلاتها وكل السفن الحربية اللى عندنا وحتى لنشات الصواريخ واعدادها وأسمائها كمان وقواعد ارتكازها

فكرت افتح على الجيش الاسرائيلي والامريكي لقيت برضة معلومات كتيرة جدا

ولقيت اسماء اسلحة كتيرة جدا واسم السلاح وتاريخ صنعه وتطويره وفكرته الاساسية

خلاصة الكلام

بفكر اعمل مدونة عسكرية....تكون مختصة بالعلوم العسكرية....كل العلوم العسكرية من اول المناورات والتكتيكات حتى اساليب تقسيم الجيوش وتحركاتها وكمان انواع الاسلحة المختلفة و كل الكلام هيكون باللغة العربية وهيكون عبارة عن ترجمتي من ويكيبيديا وكمان معاها شرح من أى مرجع عربى اقابله

الموضوع لذيذ واعتقد هيكون مفيد لناس كتيرة و اهم ما فيه اننا نعرف ان في حروب المستقبل مش عنصر السلاح بس هو العنصر الحاسم فى المعركة ... فيه برضة عنصر الاراااااادااااااااااة....عنصر الايماااااااااااااان.....و بعدين حروب المستقبل آآآآآآآآآ

من الاخر يا حضرات...احنا عندنا ارادة....عندنا ايمان... وربنا يتولانا برحمته

عايز حد يساعدنى فى المدونة دي.... نتقاسم الفكر ونطور مدونتنا سوا ويكون مشروعنا المشترك .... زي مدونات كتيرة بشوفها وفيها مشاركين كتير

بس اللى مخليني متوتر فى الفكرتين....الملاحقات الامنية....انا مش عارف بصراحة موضوع المدونة العسكرية دي هيكون اية بس خايف ليفتكروا الكلام من نوعية كيف تصنع قنبلة بمفردك وكيف مش عارف اية....و أما موضوع شركة المعاملات الاسلامية.....ده اكيد مصيرها هيكون زي الريان واشرف السعد لو العملية مشيت واتقبلت تطلع اساسا

ربنا يسهل

اى حد يقبل يشارك فى المدونة والفكرة تستهويه ياريت يقول فى التعليقات

شاور عقلك يا سمسم

ضاكتور خالد....فينك؟

عم عصفور... انا عارف ان المشوار ده هيستهويك وعارف انك هتتحمس للفكرة

و ياريت الاخوات المدونات ميزعلوش انى مفكرتش ان واحدة منهم هتشارك فى الموضوع....معروف ان الولد من صغره بيلعب بالمسدس والبنت بتلعب بالعروسة....غير كدة يبقى اختلال جيني والعملية مش ناقصة اختلالات.....و نسالكن الدعاء بالهداية والتوفيق

والسلام

مقلب...و انترفيو... و غضب...و أشياء أخرى

من لحظة ما خلصت امتحان القرآ ن الشفوى اول امبارح...مرت بيا حاجات كتيرة اوى اوى اوى...عايز احكي بعضهم وهاترك البعض الاخر


بعد ما رجعت من الامتحان مباشرة....دخلت البيت وأخدت دش بارد وقعدت ادام الكمبيوتر وبعدين مسكت الجورنان بتاع يومين قبلها....دورت على اعلانات شغل ملقيتش حاجة تناسبني وبعدين لقيت اعلان بيقول مطعم الشيف عايز شيف بيتزا وطباخين مساعدين...اختمرت فى دماغى فكرة مسخرة ... واتصلت بمحمد فوزي صاحبي(حبيبيى اوى) وكان الحوار كالآتى:

اية يا فوزي عامل اية...بص يا ريس انا ظبطت حوار مية مية...بارك لى الاول

على اية يا هندي؟

اتصلت بشركة تليكوميونيكيشن لقيتها فى الجورنان و لما اتصلت عشان اقدم للوظيفة لقيت الواد بتاع ال اتش آر اللى رد عليا صوته مش غريب عليا...قلت له انت عمرو قال ايوة(طبعا كلها اشتغالة) وبعدين ظبطت معاه عالوظيفة وطلع صاحبي مووووووووت وحجزها لى خلاص ومرتب يبدأ من 1100 جنيه

الف الف الف مبروك يا هندي..الف نهار ابيض

اسمع يا فوزي... انا سألت صاحبي.. عايزين وظايف تانى عندكم؟ قال لى ايوة عايزين وظيفة واحدة بس ....قلت له انا عندي واحد صاحبي مية مية ...قال لى ابعتهولى وانا بكلمك عشان تتصل يا فوزي وتظبط معاه بس الحق اتصل بيه بسرعة قبل ما حد تانى يتصل عشان الواد قال لى ان ناس كتيرة اوى اوى بتتصل بيه

يااااااااه يا هندي....ربنا يبارك فيك...رجولة ياض

بس اسمع يا فوزي....هو قال ان اى حد هيتصل هيقلشه ويقوله مفيش شغل...انت بأة لما تتصل قول له كلمة سر انا اتفقت معاه انك هتقولها له....قول له انا الشيف

انا اية ؟

انا الشيييييييييييييييييف

اشمعنا الشيف يعني يا هندي؟ اوعى تكون بعتة منك انا عارفك

عيب عليك يا فوزي لست انا هذا البتاع اللى يبعتك ...احنا صحاب يا رااااااااااجل

اشطة يا هندي اديني النمرة

_____________________________


بعد خمس دقائق تليفون بيتنا رن

____________________________

اسمع يا هندي لو علاقتنا ببعض بعد الجامعة هتبقى كدة يبقى بلاش منها احسن

انا بأة(انا طبعا بموت من الضحك) لية بس يا فوزي انا عملت اية....دانا بخدمك


بخدممممممممممممممك؟ تخليني اتصل بمطعم واقولهم انا الشييييييييييييف وانا فرحان بنفسي يقولولى بتطبخ اية؟

هاهاهاهاهاهاهاها..وبعدين؟

الواد اللى على التليفون قال لى انت عايز اية بالظبط؟ قلت له مش ده شركة الترجمة؟ قال لى لا هنا مطعم بيتزا...قلت له مفيش ترجمة جنب البيتزا طيب؟

هاهاهاهاهاها ههههههههههههههههههههههههههههههههههه

________________________________

الجدير بالذكر فى الموقف انى عملتها فى 6 اصحابي.....تانى واحد منهم بيتصل فالواد بتاع المطعم -اللى رد على فوزي- دخل فية شمال وفاكره بيستعبط وقال له يا كابتشن انت تانى مرة تتصل وتغلط وتقول لى ترجمة ....بلاش استهبال واحترم نفسك

تالت واحد اتصلت اتشتم والواد بتاع المطعم ظبطه

و الله اعلم حصل اية فى الرابع والخامس والسادس بس هم تقريبا كدة هيقطعوا علاقتهم بيا
(:


________________________________


الموقف التانى


كان امبارح(الخميس) كان عند حسام صاحبي انترفيو فى شركة ترجمة...اتصل بيا وقال لى تعالى معايا.... انا طبعا رايح على انى متفرج او مشجع....لقيتهم دخلونى امتحن معاه

بس احكي لكم من الاول


طبعا الاول نزلنا من محطة مترو الجيزة لفينا جمهورية مصر العربية كلها تانى عشان نلاقى المكتب وطبعا انا معرفش حاجة عن الجيزة والهرم و تانى مرة فى حياتي ادخلهم والذكرى الاول مكانتش حلوة ابدا....وكل الشعب المصرى يحب يرشدك لطريقك معاكس تماما لطريقك وتسال واحد عن طريق يقولك يمين وتسال واحد معدي جنبكم انتو الاتنين يقولك شمال وحاجة مسخرة

المهم وصلنا العمارة....طلعنا الدور التالت لقينا 4 شقق فى الدور اتجهنا لاقرب شقة منهم وانا خبطت لقيت شاب فتح الباب وقال لى ايوة..قلت له مكتب الترجمة؟....قال انتو بتوع الانترفيو؟ قلت له اه...قال لى اتفضل الشقة التانية

اتاري المكتب واخدين الدور كله وعاملين جزء للترجمة وجزء للادارة وجزء للتايبينج وحاجة ما شاء الله

كان فيه بنت مع الولد.....حاجة ما شاء الله تبارك الله.....اول مرة فى حياتي اشوف جمال كدة بعد غادة......كائن ابيض ابيض ابيض ابيض ابيض الى مالانهاية......انا عايز اتجوز بأة
:(

المهم دخلونا مكتب متقسم بارتيشنز.....كل واحد قعد فى حتة....والشاب كان محترم جدا جدا جدا الصراحة و فوق الوصف واخلاقه قمة ومعاملاته سكر....يسر لنا كل حاجة وعرض شاى وقهوة وكل ما بامكانياته بس حسام كان صايم وانا شربت عشان المية كانت مثلجة وعجبتني

الامتحان كان صعب شوية بس ظريف...الحمد لله عملت شغل حلو اوى فيه

اثناء الامتحان الظهر اذن....طلبنا ننزل نصلى فى المسجد....قال لنا اتفضلوا ولو عايزين تصلوا هنا فيه مصلى عندنا....قلنا له لا المسجد افضل وعشان نريح اعصابنا برضة.....نزلنا وصلينا والمسجد كان مكيف وكانت حاجة زي السكر ويوم جميل جدا لحد دلوئتى

طلعنا كملنا ترجمة.....و كتبنا بياناتنا فى الابليكيشن ومشينا وانا حاولت بقدر الامكان-ونجحت والحمد لله- انى مشوفش وش البنت تانى بانى اغض بصرى وابقى محترم بأة على الاقل ان ماكانش عشان غض البصر او عشان الفتنة يبقى عشان محدش يمسك غلطة على الملتحين ويقولك اهو بص يا عم...ملتحي وبيبص للبنت اللى واقفة ادامه


المهم بعد ما خرجنا انا وحسام......لقيته بيقول لى اية رأيك نروح اى مكتب تانى....قلت له يا حسام انا تعبان لانى سهران من امبارح وكدة 24 ساعة صاحي وبعدين امتحان الترجمة اللى خدناه دلوئتى فصلني وخلاني مش شايف ادامي وعايز انام....قال لى نروح ومش مهم نمتحن...نعرف الاماكن بس ونقولهم نمتحن يوم تانى ونعرف نظامهم...قلت له اوك....بصيت على تانى عنوان فى الورقة اللى معايا وقلت له نروح ده....دورنا عليه ووصلنا له بعد ساعة تقريبا

دخلنا مكتب حقير فى عمارة زبالة......المكتب ممكن يكون محترم بالناس اللى فيه....لكن المكان ده كرهني فى مصر كلها وهاحكي لكم ليه

اول ما دخلنا....لقيت شاب قاعد يترجم وبنتين منهم واحدة لا يقال عليها كلمة محترمة ابدا-وانا عارف ان عم عصفور وضاكتور خالد هيزعلوا مني بسبب التدوينة دي بس بقولهم ماتزعلوش انا مش هقول الفاظ خادشة بس انا فعلا تعبت اوى-والبنت التانية كانت حاجة كدة وربنا ستير حليم...المهم اول ما دخلت غضيت بصرى برضة وكلمتهم وانا مودي وشى الناحية التانية-ويقولوا انتو مش مهذبين كلمونا ووشكم فى وشنا...طيب ما تلبسي الاول عشان نتكلم يا بنت الناس...المهم دورت وشى وقلت لها انتم كنتم طالبين فري لانسرز؟ قالت ثواني...قامت دخلت اوضة حقيرة ورجعت قالت اتفضلوا

دخلت الاوضة....لقيت مكتبين ووراهم شخصين...الاول كان لابس قميص وبنطلون والتانى كان لابس فانلة داخلية وشورت اندر ورور بجد مش هزار....طبعا انا صعقت وقلت اية ده...اية ستوديو البورنو اللى وقعنا فيه ده؟ ونسيت اقولكم ان حسام زميلى اللى كان معايا هو امام الدفعة ومعاه اجازة فى العقيدة و تتلمذ على يد الشيخ محمد اسماعيل المقدم ومن اوائل تلاميذه وله معرفة شخصية بالشيخ محمد حسان وعلى اتصال دائم-يعني سلفى على تقيل

اول ما دخلت كنت عايز اقول لللى قالع ده قوم البس ياكابتشن بس استحييت...قلت انجز على طول....دخلت كدة:عايزين فرى لانسرز؟ الرجل التانى قال لى الصراحة احنا مش طالبين مترجمين بس هو انتو دفعة واحدة؟ اصل فيه ناس زمايلكم كتير جم هنا الاسبوع ده

بعد ما فكرت فيها لما رجعت...طبيعي جدا ان كل اسبوع من نهاية الامتحانات ييجي مترجمين كتير....بس هو كان بيقول كدة عشان يحسسنا ان العرض كتير والأجور لازم تنخفض

اول ما قال مش عايزين قمت وقفت انا وحسام وقلنا له شكرا طيب السلام عليكم قام مسك فينا ولا ابدا لا يووووومكن اتفضلوا اقعدوا احنا برضة زملاء مهنة ولازم نرحب بيكم تشربوا اية والكلام ده...قعدنا نشوف اية الحكاية

قعد ينصح فينا...ولو كانت نصيحة كنت قبلتها شاكرا....لكن كان كل كلامه...الشباب دلوئتى مش حاسس بالدنيا...عايز يتخرج وياخد مرتب 400 جنيه من اول لحظة(واخد بالك مش بيقول عايز يتخرج وياخد الف مثلا)و مفيش كفاءات والشباب فاكر الدنيا سهلة واحنا اول ما اتخرجنا اشتغلونا شغل استعباد وترجمنا الورقة ب 3 جنيه ودلوئتى الشاب عايز يترجم بالسعر العالمي واحنا خريجين جامعة امريكية والمكتب ده احنا عاملينه بشقانا وتعبنا....انا دخلت فيه شمال وقلت له هات من الاخر.....احنا كمان درسنا فى الامريكية ومعانا علم مش بطيخ ولو انت فاكر اننا تعبانين...انت اللى يخصك امتحان تعملهولى وغير كدة ماتسالنيش....عجبك شغلى عجبك معجبكش قول لى شكرا مش عايزين....بلاش شغل الفصال والقوطة والمانجة واتصل لى بالحاج عويس المنجاوى يا واد يا حدوتة(انا اصلا مش عارف انا قلت الكلمتين دول ازاى بس هم طلعوا كدة) المهم لقيت التانى بيقول لى كلمني انا يا كابتن...قلت له انا استاذ مترجم مش كابتن(وربنا يغفر لى على لحظة التكبر دي) قال لى لسة لك كتير على ما تبقى استاذ بص انت بتقول عايز امتحان....خد امتحان اهو وادامك 30 دقيقة وتخلصه بس خلى بالك دي بامفليت الفورسيزونز يعني تراعى وانت بتترجم ان دي هيقرأها صفوة رجال المجتمع الغربى والعالمي قبل المصرى....يعني ترجم كويس

حسام لسة هيقول له احنا تعبانين وصايم وخارجين من امتحان تانى وهندي سهران....قطعت كلامه وقلت له ياللا يا حسام...على سبيل التحدي واثبات النفس

قلت للواد بس 30 دقيقة فى 3 ورقات مستحيل....انا مش بترجم شهادة ميلاد....دي ورقة مليانة وعايزة وقت وتفكير....قال لى طيب خليها ساعة قلت له انا مش فاضى ساعة انا عايز امشى بسرعة...قال لى خلاص خليها ورقة واحدة(برضة هو ماسك فينا ومش عايزنا نمشى وده اكد لى نظرتى انه نصاب) المهم خرجت وترجمت والواد المترجم اللى عنده بيبص على شغلى ولما خلصت قلت له اية رايك قال لى ما شاء الله عليك انت ممتاز وقال لى كلمتين جامدين اوى(وانا بصراحة بعتبر ترجمتي ولله الحمد حاجة ماستر بيس و لازم تتدرس للطلبة الصوغننين) المهم بعدها لقيت الاخ ابو فانلة نده علينا واحد واحد (ودي برضة قلقتني انه لية بتكلم كل واحد على انفراد) وقعد يناقش كل واحد فى الترجمة ومكانش عارف يطلع لى غلطة لدرجة انه كان شوية وناقص يقول لى خطك وحش

المهم عشان ما اطولش...الزبون آل اية بيطلع من مكتبه مستوى ترجمة معين واحنا مش اد المستوى ده(كان عندي حق لما فهمت انه عايز يهدنا معنويا) وبعدين احنا -على حد تعبيره- محتاجين تدريب كتير وهو هيدينا التدريب ده بدون مقابل وهيدينا فلوس كمان يعني هيشغلنا عند جناب فخامة سيادته ويعلمنا ترجمة ويدينا 50 جنيه فى الشهر نظير مواصلاتنا بس بشرط اننا هنوقع على ورقة تفيد اننا ملتزمين نشتغل عنده على الاقل 5 سنين والا ندفع شرط جزائى 20 الف جنيه لانه مش مستعد يعلمنا وبعد سنة او سنتين ناخد الخبرة ونسيبه نروح نشتغل فى اى مكان تانى....يعني من الاخر مص دم واستعباد عيني عينك

اخر الكلام.....قال لى وهو بيناقشني فى ورقتى....انت على فكرة عندك مشكلة فى الفهم ومشكلة فى التعبير فى اللغة التانية...ضحكت وقلت له يا نهار ابيض...انت شركتني خالص...دانا على كدة مبعرفش اترجم ولا اعمل اى حاجة...يعني واحد مش فاهم اللغة الاولى بتقول اية ومش عارف يعبر فى اللغة التانية ازاى....يبقى ولا مترجم ولا خروف حتى...وبعدين انا احسن واحد فى البراجماتيكس فى الكلية واحسن واحد كنت بقطع الجمل فى الدفعة....وانت كدة بتشتم الدكاترة اللى ادوني امتياز فى اللغويات وفى الترجمة....لقيته غلط بأة الخطيئة العظمي وقال لى الدكاترة دول حمير

محستش بنفسي الا وانا ماسك الطفاية من على المكتب وبديله بيها فى وشه....والتاى قام وده صرخ وبيقوللى انت بتضربني...انا هوريك....وحسام دخل الاوضة يحوش ولناس اتلمت وبقت حاجة مسخرة...بس انا مش ندمان الصراحة...ده عيل واطي....داقق وشم ولابس سلسلة... 0ان الله لا يحب كل خوان كفور) والواحد اتعلم انه ميحترمش حد من النوع ده...اينعم ما أبدأش معاه بالعدوان....انما محترموش

قبل الموضوع ده....كان بيقول لنا انا وحسام لما جت صلاة العصر فى وسط كلامنا فى الاول وطلبنا اننا نخرج نصلى.....لما رجعنا من الصلاة قال لنا ..لو كان لكم نصيب واشتغلتم معانا يبقى لازم تتعاملوا باسلوبنا وتعيشوا حياتنا واسلوبنا وحاجة كدة....بعد ما خرجت حسام بيقولى الكلمة دي ملفتتش نظرك؟ قلت له ايوة يعني لما الصلاة تقام منقولش له قوم صلى معانا...قال لى لا يا طيب...يعني محدش منكم يقوللى عايز اصلى اساسا

وطبعا مش عايز اقول البنات اللى فى المكتب كانوا بيعملوا اية ولا اسلوبهم وضحكهم و لبسهم كان اية....قلنا ربنا ستير حليم


___________________________________



الموقف التالت


النهاردة وانا راجع من كورس العقيدة

بحب اوى امشى كتير....وكل مرة بعد الكورس امشى من الكورس-فى رابعة- لغاااااااااااية نادي السكة و اكل عند الدبور واجيب زبادي من السوبر ماركت اللى جنبه واروح مشى لغاية بيتنا-العباسية عبده باشة قبل ميدان الجيش كدة

المهم وانا ماشى......مريت بجامعتي....جامعة الازهر

مريت امام بوابة أرقى واعظم كلية فى الجامعة....كلية الدعوة الاسلامية


كلية راقية جدا فى علمائها....مبادئها.....مبانيها الفخمة الراقية اللى تحس انك فى ارقى فندق فى مصر مش فى جامعة حكومية

و فوجئت باسطول عربيات مرسيدس وجيب وحاجات كدة ادام البوابة وفيه اضواء ملونة وبالونات على بوابة الكلية

سألت واحد امام البوابة برة-مكانش فيه ناس كتيرة برة- هو فيه مؤتمر واللا اية؟

قال لى لا ده فرح....عقبالك

وجد حسيت ان وجهى اشرق بالفرحة.....الله اكبر.....ده الكلية اساسا عبارة عن مسجد كبير والتعلم فيها على نظام طلب العلم القديم واسطوانات المسجد وشيوخ الحلقة وكدة.....اخر ما بقى من الازهر الشريف......يا سلاااااااااااام لو ينفع اعمل فرحي فيها......الله اكبر

تخيلت ان هيكون الفرح سلفى وهادخل الاقى الاخوة ملتفين حول شيخ غالبا هيكون د.عبد الله الخطيب عميد الكلية و الفرح لواحد من الخريجين او الطلبة فيها.....و هيكون الفرح عبارة عن درس علم وكدة يعني

وانا داخل لقيت اصطف سيرفس واقف ماسكين شربات فى كؤؤس وحاجات كدة.....قلت اسراف بس مش مشكلة..عديها....و اول ما دخلت القاعة الكبرى اللى هى المسجد ....اللى هى صحن الكلية ولما كنا بنروح ايام الجامعة نسمع فيها درس علم لاحد المشايخ او ندخل نصلى....كدة او كدة سواء علم او صلاة لما ندخل الكلية من بابها بنخلع الاخذية

اول ما دخلت الصحن....لقيت اكتر من 50 امرأة متبرجة وسط حوالى 20 او 30 رجل لابسين بدلات والنساء لابسين من غير هدوم.....الكتف عاري والظهر عارى وبعضهم البطون عارية وكله جيبات فوق الركبة ومنظر زي الزفت.....الدموع نزلت من عيني.....دول واقفين فوق السجاد اللى بنصلى عليه.....ايوة انا مش بحلم.....المكان اللى كنت ناوى التحق بدراسته بعد التخرج اتدنس.....الناس دول هنا بيعملوا اية؟

جريت على الشيخ اللى قاعد على رأس القاعة والمفروض هيكتب الكتاب.....فى ايدي المصحف وملتحي وداخل عليه مدمع وعيني حمراء....قبل ما اوصل له بص لى بصة معناها اييييييييية عايز ايييييييييية؟ بصيت له من فوق لتحت وسبته ومشيت....دخلت الادارة ادور على اى حد يوقف المهزلة دي....لو حتى يدوا النساء اى حاجة يلبسوها.....انا عارف ان اى حد هيقرأ الكلام ده هيقوللى انت عبيط بس ده مسجدي وجامعتي.....الدنس ده غلط......تخيل لما المسجد اللى جنب بيتك تلاقى فيه نساء متبرجات جوة وبيتكلموا بصوت عالى وضحك وتهريج ورجالة بتهرج بالايد والشيخ ابن ال.....قاعد بيتفرج ومبسوط......انا لو واحد محترم كنت جبت سيف و نزلت عليهم طاخ طيخ لما اعلمهم احترام الازهر....بس الازهر خلاص راح.....اتفووووووووووا على مسئولي الازهر اللى عملوا فيه كدة

انت عارف احساسك ناحية امك او زوجتك؟ عارف لو انت ماشى فى الطريق الصحراوى انت وزوجتك و طلع عليكم قطاع طريق واغتصبوها؟ عارف احساسك ناحيتها؟ هو ده احساسي ناحية جامعة الازهر.....انا مخدتش منها كتير اينعم بس بحبها لان ليها حق على كل مسلم.....انا حاسس ان الناس دول دنسوا المكان.....و طبعا مينفعش ادخل اكلم العريس وابوظ عليه ليلتة المزعومة مع ان حياته كلها بايظة باذن الله بس مينفعش انى اكلم كل دول ولو حتى اقول متخرجوش من المكان بس استروا عوراتكم وعوراتكن

لاول مرة فى حياتي اندم انى اسيب تليفوني فى البيت....كنت صورت الكلاب دول وهم جوة المسجد عشان العالم يعرف ان جامعة الازهر بتأجر مساجدها وكليتها وجامعتها للافراح كقاعات....وفى الخلفية مأذنة الكلية والصحن المفتوح ولوحات العلم ومواعيد العلماء ولافتة (كلية الدعوة الاسلامية) عشان الموضوع يكمل

وانا ماشى بعد ما خرجت.....بكيت بكاء شديد ونحيب....والحمد لله ان الطريق-طريق النصر- محدش بيمشى فيه على رجله والا كانت الناس اتفرجت عليا....بس حيبت انى لاول مرة من زمن ابكي لله بكاء خالص لوجهه وحبا فيه بدون رياء


وحسيت ان ربنا عوضهاني

دخلت اكلت عند الدبور كالعادة وبعدين خرجت اخدت زبادي من المحل اللى جنبه....الواد اللى فى المحل دايما خنيق بس اول مرة الاقيه كدة.....اتفضل يا شيخ...خد اللى انت عايزه.....ولما بحاسبه قال لى والله ابدا....خليها علينا المرة دي يا شيخ.....ربنا يبارك فيك يا شيخ ادعى لنا بالله عليك.....اخدت شوية حاجات وحاسبته بالخناق وهو مش راضى ياخد فلوس....قلت ده تعويض من ربنا ليا على الحزن اللى حزنته على الجامعة وادعو الله انه يقبل غضبة غضبتها فى سبيله

جيت البيت وقعدت....و انا اهو.....قلت اول حاجة اعملها اكتب الاحداث دي كلها.....انا يمكن معرفتش اعبر عنهم صح.....بس حسيت فيهم بحاجات كتيرة اوى اوى........حسيت بالضحك لما عملت المقلب فى صحابي....وحسيت بالفرحة فى امتحان الترجمة الاول....وحسيت بالامتعاض من مكتب الترجمة التانى....وحسيت بالغضب من موقف الفرح فى مسجد الدعوة


بس لفت انتباهى حاجة غريبة جدا


كل حاجة بعملها بتترد لى فى لحظتها

يعني المقلب اللى عملته فى اصحابي انا حاسس انه اترد لى على صورة احباط فى المكتب التانى عند الحيوان اللى عمل معايا كدة

والغضبة اللى غضبتها لله حسيت انه كافأنى بيها فى ساعتها برضة

انا خايف ربنا يوفى اعمالى فى الدنيا

خايف اوى من الاية

من كان يريد الحياة الدنيا وزينتها نوفى اليهم اعمالهم فيها وهم فيها لا يبخسون

يعني خايف ان نيتى تكون الدنيا ومتاعها وزينتها.... وخايف ربنا يعطيني مكافاة اعمالى فى الدنيا وبس-وهو مش هيبخسني انما هيديني اكتر من قدر اعمالى بكتير كمان- لكن فى الاخرة بأة شوف الاية اللى بعدها


اولئك الذين ليس لهم فى الاخرة الا النار وحبط ما صنعوا فيها وباطل ما كانوا يعملون


______________________________


وختاما

انا عايز اقول كونكلوشن مناسبة

الدنيا زائلة فانية.....احرص فيها على عمل صالح لآخرتك ولحظة سعيدة فى طاعة الله

اللحظة بتاعة المقلب الاولاني كانت غلط مع انها مليئة متعة الا انها كانت مليئة بالكذب والسيئات.....و فعلا وانا بعمل الكذبة فى الاول حسيت بظلام جامد فى القلب.....اينعم بعدين ضحكت لكن برضة غلط

و ربنا يهدينا اجمعين ويوفقنا الى ما فيه الخير والرشاد

اللهم امين

خلصت

النهاردة خلصت اخر الامتحانات

كنت رايح الصبح بلا احساس.... لا خايف ولا متطمن.....لا زعلان ولا مبسوط.... كانك قايم من السرير رايح الحمام وهترجع تنام تانى

لما بدأت اللجنة الشفوى.... اول الخارجين من اللجنة كانوا مبسوطين اوى وبيقولوا رجل متعاون وبيسأل اسئلة سهلة وكلام جميل

اتبسطت اوى وقلت الحمد لله.... وفعلا دخلت اللجنة والرجل كان كويس وربنا يبارك فيه وان شاء الله ننجح

بعد الامتحان........وقفت مع الدفعة كلنا برة الباب ....

صراحة كانت لحظة ..... لحظة غريبة اوى.... مش عارف اوصفها باية ...... عايز اقول لحظة تاريخية لكن كلمة تاريخية دي كبيرة اوى ومجعلصة والواحد بيتخنق لما بيشوفها من كتر ما بيسمعها مرتبطة بقمم الجامعة العربية اللى ملهاش لزمة اصلا

لحظة وقفت فيها مع زملائى اللى عارف انى ممكن مشوفهمش تانى..... ده مش مجرد احساس ده كان شبه تأكد

منهم ناس بحبهم اوى اوى وبحترمهم جدا ولو شفتهم فى يوم من الايام هاجرى عليهم واحضنهم واسلم عليهم

وناس تانية لو شفتهم بعد يوم واحد من التخرج هابص الناحية التانية واعمل نفسي مش شايفهم او اتف عليهم واقولهم انا زعلان انى فى يوم من الايام عرفت اشكال زيكم

المهم انا عملت حركة كويسة

اخدت معايا نوت بوك صغنونة وشيك كدة... وقلت لكل واحد من الناس اللى بحبهم اكتب لى كلمة هنا.... كل واحد ياخد صفحة واحدة والصفحة حوالى 10 اسطر او 15 سطر يعني

وكل واحد كتب حاجة وانا خبأت كلمته بحيث ما اشوفهاش الا لما اروح بيتنا..... ولفيت على كل احبابي و قلت لكل واحد اكتب اللى فى بالك .... اكتب تقييم كامل لشخصية احمد هندي على مدار 5 سنين صحبة كما رأيتها انت بعينيك انت انت .... لن أغضب من النقد... اكتب ولو كتبت سبابا او قذعا.... المهم متكتبش الفاظ بذيئة عشان عايز اولادي يشوفوا النوت دي ان شاء الله

صحابي دول....منهم ناس بحبها اوى.... عيني دمعت وانا بسلم عليهم .... ومنهم كتير حضنتهم اوى اوى

ولما خرجت من الجامعة كنت اخر واحد اخرج من البوابة بعد ما كلهم مشيوا...و كان معايا 3 من صحابي....كنت بصراحة شبه ميت ورجلى وجعاني من كتر الجرى والتنطيط واللف عليهم

لقيت اوتوبيس جاى فاضى فاستأذنت وسلمت عليهم ونطيت فيه .... وانا فى الاوتوبيس مقدرتش اقاوم الفضول وفتحت النوت عشان اقرأ كلام اصحابي عني

و فى الاوتوبيس..... عيطت عياط..... اول مرة اكون متأثر كدة

انا مكنتش اتوقع كدة ابدا..... صحابي دول بيحبوني اوى.... انا اكتشفت انى طلعت قدوة لعدد كتير منهم.... وكتير بيقولوا لى انت ايجابي وصاحب مبادىء واستمر فى طريقك وربنا يوفقك ومتوقعين نسمع عنك قريب ونقول للى حوالينا : الشخص العظيم ده كان زميلنا فى الجامعة وكدة

احلى كلمة فيها

كلمة محمد جبريل صديقى

قال لى بالحرف:

بسم الله الرحمن الرحيم
انت اكتر واحد شفته فى حياتي مر بتجارب صعبة و اختبارات ومحن لكن ما شاء الله عليك وربنا يثبتك ويقويك دايما مع انك لاسع واهبل لاكن طيب وراجل وجدع ومجنون... ربنا يجمعنا على خير دائما
جبريل 012********* **********@hotmail.com

و واحد تانى(صديق عزيز جدا)

بسم الله الرحمن الرحيم
عندما يرتجف القلم و تنضب الكلمات والمعاني ، يحدث كل هذا عندما طلبت مني أن اكتب انطباعاتى عنك فى 5 سنوات
كا ما ستطاع قلمي ان يدونه هو الدعاء لله عز وجل ان يرزقنى بامثالك من الرجال "رجال مواقف وافعال" ويظل هذا المطلب صعبا فى ظل ندرة الرجال واخيرا أعانني الله على رد الجميل مثلما اعانني على العرفان بهذا الجميل
"محمد صادق جبل"



انا عيطت اوى لما قرات الكلام ده







وفيه كلام تانى لا يخلو من فكاهة

واحد كان عملي جدا ... كتب الاتى: للذكرى الخالدة ... فلان.... لو لقيت شغل ابعتلى ... كلمني على رقم البيت 0000000 ولو مشغول اتصل على الموبايل 0000000 وربنا يوفقك والسلام


واحد تانى كان مختصر جدا وبسيط للغاية

Remember me
Yours

بس كدة

انا دلوئتى حاسس ان القطار واخد الملف على السريع .... عايز اقول له هدي يا اسطى.... بالراحة شوية..... كدة انت بتجرى بسرعة اوى اوى

انا بصراحة تعبت ومش قادر اكمل.... عايز احضن حد واعيط فى حضنه

استأذنكم ... واعذورنى للنهاية المبتورة

ربنا يهدينا ويوفقنا

اللهم امين

قطار....ومحطات....بل وعربات

امبارح كنت فى الكلية مع زمايلى اللى بيمتحنوا الشفوى-مجموعة رقم 3

اصل احنا دفعتنا حوالى 180 واحد و الدكاترة قسمونا 3 مجموعات كل مجموعة حوالى 60 وبيمتحنوا كل 60 واحد شفوى الترجمة فى يوم

انا كنت امتحنت يوم الاحد بس حبيت اروح احضر يوم كمان مع صحابي


اتفقنا امبارح نعمل
Fun day
فى اخر يوم...بعد امتحان الشفوى للقرآن....على اساس انه احتمال كبير منشوفش بعضنا بعد كدة.....وسيبك من كلام ناخد ايميلات بعض وارقام تليفونات بعض......محدش هيسال عن التانى الا قليل اوى وكل شلة هتتفرق زي شلة ثانوى و اعدادي ما اتفرقت


الزمن بيجرى بسرعة.....الاحساس ده مش عندي انا وبس....ده عند نوني كمان....وعند اميرة..... وعند خالد......و عند ايموس......... وعند عصفور......... وعند كل الناس


الزمن بيجرى بسرعة جدا والواحد كل يوم يتعرف على ناس جديدة....كأنه راكب قطار.....و كل شوية يفترق عن الناس دول اللى كان من لحظات حاسس انهم اقرب الناس ليه واحبهم لقلبه

كاننا فى قطار بيجرى بسرعة جامدة جدا........ ومحطاته قريبة.........وكل شوية تقابل واحد او واحدة او مجموعة فى عربية من عربيات القطار........تفتكر ان دي العربية المثالية والمناسبة لك........و تقول انا ازاى معديتش على العربية دي قبل كدة؟ وبعد ما تتعرف عليهم وتحبهم ويحبوك.....و تكون ظبطت كل نفساوياتك انك هتعيش معاهم العمر كله......تدوى الصفارة....وصلنا المحطة.....يا هم هينزلوا من القطار يا اما انت هتكتشف فجأة ان العربية دي مملة جدا وسخيفة ولازم تتنقل منها لانك لازم تنزل من القطار -لما تيجي محطتك -من العربة الاخيرة......والعربة الاخيرة عشان توصل لها لازم تمر بكل عربات القطار


انا ركبت القطار يوم 5 ديسمبر 1984

ركبت عربة المرحلة الابتدائية

والاعدادية

والثانوية اللى قضيت فيها اجمل ايام حياتي هى والجامعة

وبعدين فى يونيو 2002 تركت عربة الثانوية ودخلت على عربة الجامعة

بس فضلت واقف فى النص بين العربتين

لسة على علاقة مهترئة باصدقاء الثانوية.....و على حذر من الانغماس بشكل كامل فى عربة الجامعة

وبعد كدة تركت مرحلة الثانوية تماما ومش باقى منها الا ذكريات وشوية ارقام تليفونات ووعود باللقاء القريب ومصير الحى يتلاقى و احيانا مقابلات يسوقها القدر لتتلاقى الوجوه ولنكتشف اننا لا زلنا أحبابا

و دلوئتى.....الصفارة الجديدة صفرت.....صفارة المحطة الجديدة.....و لازم اسيب عربة الجامعة

لازم اسيبها

ببص ورايا

شايف رفقاء الرحلة

كلهم بيشاوروا لبعض

اصل كلهم برضة لازم يفارقوا بعض

وكل واحد هيمشى فى طريق

بدأنا نوزع ابتسامات....ومجاملات......وصور موبايل لذكريات جميلة وايام حلوة........ووعد اننا نعمل
Fun day
فى اخر يوم نتقابل

السخيف فى القطار ده ان كل عربة لما تيجي تدخلها فى الاول تحس انها مظلمة اوى اوى وعايز حد ياخد بايدك فيها ويرشدك.....ولحظة ما تكون اتقنتها.....الصفارة تدوى....لازم تسيبها حالا .....عشان فهمتها....عشان عرفتها....عشان اى حاجة المهم انك هتسيبها وخلاص

انا فاكر انى فى الثانوية كنت متفوق جدا فى الكيمياء والفيزياء لدرجة انى لحظة ما خلصت الكيمياء وامتحانها قلت انا عايز اشتغل مدرس كيمياء ل 3 ثانوي وبس......ومش هدرس غير كيمياء عضوية....دي تخصصى....انا بارع جدا فيها

كنت بارع فى حياة الثانوي.........واللعب وفلوس مصالح الدروس
(:
و التزويغ من المدرسة و المذاكرة ساعة الجد والخروج دايما بعد الدرس اوصل صحابي ... كنت عبقرى فيها


ومرت مرحلة الجامعة وحاسس دلوئتى انى عايز اعمل كتاب ارشاد للطالب المستجد للجامعة عن حياة الجامعة وما سيلاقيه فيها

لكن لا

مش هعمل الكتاب

انا خلاص اتعلمت الدرس

لازم كل واحد يتعلم درسه بنفسه

مينفعش اقول لشخص ما عن مرحلة قادمة من عمره

عشان كدة الكهانة والعرافة حرام

عشان دي
cheat

واللى بيعملوا كدة
cheaters

لا ..استغفر الله....هى حرام عشان ربنا امرنا بكدة وانا ممنوع انى افكر فى العلة دي

واللا مش ممنوع؟

حد يبقى يفكرني اسال عن الحكم الشرعى ليها

المهم دلوئتى انا بسيب مرحلة الجامعة او عربة قطار الجامعة وواقف على حافة العربة اللى بعدها.....والليلة الحمد لله حاسس ان الباب اتفتح

بس فيه عربة فى النص اسمها عربة الجيش......بيقولوا صعب....وبيقولوا جميل.....بيقولوا عذاب.....وبيقولوا بتعمل فيه احلى صداقات العمر

ربنا يعديها بخير

والعربة الجاية بأة

الله اعلم هتكون اية

اصلى نسيت اقول

العربات الماضية تعتبر شبه اجبارية-مع احتمالية تغير معدل السير طبعا وكله خاضع لارادة الله بالتأكيد


العربات القادمة بأة.....الله اعلم اية ظروفها.......وهقابل فيها مين

الله اعلم العربة الجاية هيكون اولها اعفاء من الخدمة العسكرية الالزامية ويعقبها سفر للخليج وعودة وزواج واستقرار بمصر ومشروع صغير مع العمل الرئيسي؟

واللا كل ده بس زواج واستقرار فى الخليج للابد واياكش مصر تولع؟

واللا جيش و سنة تمر بسرعة؟

واللا جيش و3 سنين يحولوا مسار القطار تماما؟

واللا عمل بمصر؟

واللا احتلال امريكي لمصر وجهاد اليهود وقيامة؟

واللا موت مفاجىء و.... و بالفعل....ايوة زي مانت بتقرا...ما تكذبش عنيك.....موت مفاجىء وانتهى كل شىء


كنت عايز افضفض معاكم

بحبكم جميعا

تحية خاصة ل

لعروستى القادمة

و سؤال

انتى فين؟

انا محتاج افضفض معاكي اوى

و لو انى قلقان منك....مش عشان شخصك...بالعكس .....انا بحبك جدا وبحترمك جدا وعارف انك بتحبيني برضة

لكن المشكلة انك واحد من رفقاء القطار

وانا خلاص مبقيتش بصدق حد.....فقدت الثقة فى كل رفقاء القطار

حاسس انهم-ولو ان ناس منهم اكيد نيتهم كويسة وبيحبوني- لكن برضة حاسس انهم مش مأمونين

انا نفسي مش مامون

امبارح كنت ملتزم

دلوئتى بجاهد نفسي بالعافية عشان اعمل حاجة كويسة

امبارح لا يمكن اتخيل انى اكون بحالة النهاردة ولو فى الاحلام

كنت اتكسف احلم فى المنام باللى بعمله النهاردة

و ان كنت انا نفسي غير مأمون.....ومش عارف اسيطر على نفسي اللى ماشية كدة.....هقدر احكم على رفيق قطار -رفيق عمل او دراسة مؤقت او رفيقة زواج دائمة- انه كويس و انها كويسة؟


كلمة اخيرة

يا كل الناس


أسوأ شىء فى الدنيا هو انعدام الثقة

سخيف اوى اوى

منك لله ياللى فى بالى

ربنا يهدينا اجمعين

والسلام

تاج من نهاد

فيه موضوع كتبته على صفحة وورد بالفعل بس مستني مش عايز أنشره دلوئتى لدواع أمنية
(:

و بعدين مسكت اخر بوست عند نوني وبقرأه لقيت اسمي مكتوب.....أتارى الكلام تاج وانا مخدتش بالى ان اسمي فيه لما قرأته اول مرة

بعدين لقيت ان ال 4 تاجات انا كتبت واحد منهم -الأخير- وجاوبت على اتنين يبقى واحد لسة معملتوش-صباح الواجبات المنزلية-وقلت أعمله دلوئتى


التاج ظريف جدا

أهو:






انت مين

أعظم انسان فى الدنيا......مركز الكون و نطقة ارتكاز المجرة......أكثر الناس عبقرية على وجه الأرض ........انسان عبقرى و ذكى وماهر ومشارك ومرح و ظريف ولطيف ودمي خفيف و مقبول و جيد وممتاز كمان.....وسيم جدا جدا.....شيك جدا جدا جدا.....و سمبتيك وابن حلال واستاهل كل خير بس للأسف الخير لسة معملوهوش ديلفرى

مين أكتر ست أشخاص بتحبهم

أنا

ثم
أنا برضة

أنا

أنا طبعا

مش معقولة ....برضة انا

اختى



بس لو جينا للجد اللى السؤال عايزه اعتقد الاجابة هتكون مختلفة

أختي الكبيرة

اختي الصغيرة

بنات اخواتي وولادهم

كل زملائى الاسلاميين فى الكلية(بالجملة) كدة

عروستي المنتظرة

أنا

وطبعا مش محتاج أقول ان الاجابات مش بترتيب الحب
:)


انت سعيد

جدا جدا جدا.....دائما سعيد والحمد لله


الحمد لله رب العالمين على كل حال

ليه

عشان طبعا أولا واخرا ان ربنا رزقني السعادة.....وثانيا ان لو فيه حتى موقف سخيف بحاول انى احوله لموقف ظريف او انى انظر ليه من منظور كويس يضحكني ويبسطني





لو زنقت حسنى مبارك ف اوضة لوحدكم تعمل معاه ايه

اقرأ التاج اللى انا عملته قبل كدة.....اللى أنا ألفته يعني....هتلاقي فيه سؤال رهيب عن الكراهية فيه سكينة وتغرسها فى قلبه وحاجات كدة....هو ده

:)

لو معاك مليون و نص جنيه تعمل بيهم ايه

هو (مليون) و(نص جنيه).....مليون اية بالظبط؟ هو مبدئيا النص جنيه هجيب بيه مصاصة من الكريز الجديدة الكبيرة دي...او علبة عصير فرجلو مثلثات....اما المليون....حدد بالظبط هم مليون اية......ولو المليون قصدك بيهم مليون جنيه.....اقولك روح موت يا شحات هو مليون جنيه يعملوا حاجة دلوئتى؟


لا بجد.....اصل بالعقل كدة....ميجيبوش فيللا فى القاهرة الجديدة ولا الضواحى ولا حتى 6 اكتوبر.....واقل مركب -يخت- فى السخنة او الزعفرانة بحوالى مليون ونص......والعربية الكويسة حوالى 150 ألف جنيه.......يبقى الحل الوحيد العاقل انى اتبرع بيهم للاخوة فى العراق واكسب الجنة اللى اكيد فيها يخوت وقصور وعربيات وعيشة زي الفل

:)


بتحب مصر

طبعاً... مصر هى أمى

ومش هاقول اكتر من كدة

بتحب البنات

أكيييييييييييييييييييييد....ربنا يهديهم ويعقلهم....بس نفسي اتجوز واحدة بس منهم وهاحبها هى وبس ومش هحب حد تانى والله بس اشوفها بس وانا هبقى مؤدب جدا ومش هابص حواليا حتى.....هاعيش عمرى كله مشوفش غيرها ولا اعتبر ان نوع الاناث يضم غيرها فى الحياة....بالنسبة لى تعريف كلمة أنثى فى القاموس هتكون اسمها...و اى واحدة تانية هعتبرها من جنس تالت او نوع مجهول لم يتم تحديده بعد....مش هغيظها ومش هخنقها ومش هخليها تزعل منى ولا احاول اخليها تغير عليا بانى اعمل حركات نظام ابص على اناث غيرها وهى معايا وكدة....هحاول اخليها أسعد مخلوقة فى الدنيا كلها وهضحكها وابسطها واساعدها فى شغل البيت واقطع لها السلطة واعمل لها جداول الطبخ عشان مش كل يوم هى تحتار وتفكر فى موضوع هنطبخ اية فضلا عن انها تتعب نفسها وتعمل الطبيخ اصلا

فيه كلام كتير طبعا واكيد اغلبه هيكون موجه للبنات اللى بتقرأ المدونة ده على اعتبار انى بوجه رسالة غير مباشرة مفادها: أنا أنفع
(:


انت مسلم

مش أوى

ليه؟

عشان انا معتقد ان الاسلام مش مجرد كلام ومناظر......انا ناقص كتير اوى وبحاول ابقى مسلم ونفسي اتعلم الاسلام وامارسه بحق....و الخاطر ده بيلح عليا كل ما افتكر الصحابة...هو احنا هنتحاسب بنفس موازينهم؟

ربنا يرحمنا

امين




فيه تاج كمان لسة معملتوش
:




مين أكتر شخصية متقدرش تستغنى عنها في حياتك

أنا أقدر استغني عن أى شخص فى الدنيا

و ليه

لو بهزار

عشان أنا أعظم انسان فى العالم ولازم استغنى عن الاخرين

لو بجد

عشان كنت فاكر انى مقدرش اسيب الحب القديم ابدا ولا اعيش من غيرها لحظة...ومع ذلك لما افترقنا عيطت شوية وانهرت فترة وتعبت فترة انما فى الاخر لسة عايش

اذن -المطلوب اثباته- ممكن نعيش لوحدنا أومع ناس...ممكن نعيش مع ناس معينة ونستغني عنهم.....الحياة بتمشى والايام بتمر ومحدش دايم على وجه الارض



ايه أكتر موقف محرج تعرضت ليه

هو فيه مواقف كتيرة اغلبها متعلق بمعاصى وناس اكتشفونى وانا بعملها....يعني لو قلتها هابقى من المجاهرين ....انما افكر لك فى موقف مش معصية

لا...مش فاكر....بصراحة مش فاكر موقف محرج الا وكان معصية ومعصية سخيفة كمان من الحاجات المخلة بالآداب العامة والخاصة وبأى آداب فى الدنيا



و اتصرفت ازاى


فى كل موقف فيه معصية....مكنتش بعمل حاجة غير ....لاشىء....مبعملش حاجة ابدا والوقت بيمر لوحده والواحد بينسى...أهم حاجة ان انا أنسى....كدة مش هحس بالألم...انما الناس حواليا.....اياكش يولعوا


ايه الأمنية اللى بتدعى دايما ربنا انه يحققها ليك


أتجوز

و اتحققت ولا لسة

على وشك التحقق.....بس نلاقى عروسة كويسة و وظيفة حلوة توفر لى مبلغ حوالى 30 ألف جنيه أفرش بيهم الشقة و أشطبها عشان الشقة لسة على المحارة حضرتك

هأمرر التاجات الحلوات دول لمييييييييييييين؟


ضاكتور خالد طبعا

عصفور المدينة

سمسم

محمود سعيد