Tuesday, February 27, 2007

Porno Sound-clip

النهاردة كان اول يوم اروح فيه الكلية فى الترم التانى
وتقريبا من اسوا الايام فى حياتي
النهاردة حصل معايا فى الكلية فصل سخيف جدا مكنتش اتخيل انه يحصل ابدا ابدا

كنا فى معمل الصوتيات والمعمل ده متقسم كبائن او زي ديسكات كدة كل ديسك يفصله عن التانى الواح خشبية عازلة للصوت وفيه مايك وجهاز كاسيت وهيد فون ملحق بالمايك وحاجة تكنولوجي كدة وبعدين كل الكبائن متوصلة بتحكم رئيسى فى الكابينة الام عند الدكتور وكنا بنترجم تتبعي...المهم الدكتور كان هو الدكتور اللى حصلت معاه المشاكل بتاعة الترم الاول كلها ولو انى بحبه وهو بيحبني وانا لما رحت النهاردة لقيته بيسلم عليا من بين كل الطلاب اللى فى القاعة ولما كنت بسال كنت تقريبا الوحيد اللى بسال وكان تقريبا كل ما يشرح يبص لعيني انا وبس كان مفيش فى القاعة غيرى

المهم واحنا بنترجم رجعنا الشرايط بس انا الشريط بتاعى ما رجعش للاخر وانا جايب معايا شريط مش جديد يعني مش فاتحه جديد من العلبة ...لا تقريبا كنت مستعمله قبل كدة وغالبا فى ترجمة عشان كدة اخدت اول شريط لقيته ادامي وانا نازل الصبح...المهم بدأنا الترجمة بس انا بدأت ترجمتي من بعد بداية الشريط بحوالي دقيقتين كدة يعني الرجل بدا يقرا الكلام اللى معاه واحنا بناخد نوتس وبعدين ادانا ثواني نفكر وبعدين ريدي ستيدي جو وبدانا نترجم وانا ترجمت الحمد لله تمام جدا

وبعدين بدأ الرجل يرجع الشرايط عشان كل واحد فينا يسمع نفسه.... ولما رجع الشرايط شريطي رجع للاول خالص....وبعدين شغل الشرايط وكل واحد فينا يسمع نفسه وهو بيتحكم من عنده وبيسمع عينات من الطلاب يعني من عنده بيسمع كل واحد فينا شوية...ولما الشريط اشتغل عندي لقيت كلام....استغفر الله العظيم اية الكلام ده....الشريط ده كنت مسجله لغادة من حوالي 3 سنين وكنت مسجله بصوتى على اساس اننا مبنعرفش نتقابل غير كل شهر مرة عشان هى اسكندرانية وانا قاهرى فكنت مسجل لها الشريط ده وبحكي بأة...وفاكرة اخر مرة عالكورنيش لما حصل كذا وكذا.... وفاكرة كذا وكذا وصوتى طبعا حنين بأة وناعم جداااااااا....انا قلت اية ده... هل يمكن ان انا فى حياتي قلت كدة؟ هل انا فى يوم من الايم كنت واطي اوى كدة؟....اية الحقارة دي...والاهم من كدة دلوئتى ان الرجل بينقل بين الكبائن من عنده يعني ممكن يكون بيسمعني دلوئتى وبعدين هووووووب لقيت الرجل عينه برقت وكشر جامد اوى اوى وبعدين بص عليا وعلى كابينتي وقعد يسمع شوية ولسوء الحظ سمع اوسخ كوبليه فى الفيلم كله-اه والله كان فيلم وفيلم بورنو كمان- وبعدين قام من المكتب الرئيسي وجه عليا وميل على كابينتي وقال لى ...اية اللى انت مسجله عالشريط ده..قلت له معرفش يا دكتور ده مش شريطي قال لى متكدبش الصوت صوتك وده شريطك ودي حاجتك...قلت له والله يا دكتور دي حاجات قديمة بقالها اكتر من 3 سنين وانا معرفش حاجة عنها وازاى جت هنا...قال لى بتسألنى انا؟ انا اللى اعرف جت هنا ازاى برضة؟
وقام من عندي وهو مكشر بطريقة ترعب وراح قعد ووقف كل الاجهزة وقال لو سمحتم يا شباب اللى يجيب شريط بعد كدة معاه يجيب شريط ميكونش متسجل عليه حاجة قبل كدة يعني يجيب شريط فاضى ونضيف ومحترم...طبعا كل الطلبة مفهموش ومش شافوه اصلا لما قم لغاية عندي لان معتاد الدكتور يعدي عالكبائن يسال كل واحد فيه مشكلة دعم فنى او اية رايك فى ترجمتك او عجبتني فى نقطة كذا او صحح نقطة كذا وبعدين كل واحد مشغول بالهيد فون وراسه مدفونة فى الكابينة بيشوف الملاحظات وكدة.... والكل افتكر كلمة شريط فاضى ونضيف يعني شريط ابيض بلانك وشريط محترم يعني ماركة زي سامسونج او تي دي كيه او كدة ...الحمد لله محدش فهم لكن منظرى ادام الدكتور بأة(......)

طبعا خرجت الشريط وفضلت قاعد ارسم فى المفكرة ومشتغلتش معاهم لغاية لما عمل التمرين التانى وبدا يسجل وبيراجع علينا قال لى احمد يا احمد.... انا رديت نعم انا؟ قال لى ايوة انت انت ما سجلتش معانا واللا اية؟ قلت له لا وانا وشى اصلا اصبح اصفر وحاسس بدوخة وان جالى هبوط فجأة وحاسس بمغص وكانى دايخ من ساعة الموقف ده...قال لى طيب ما سجلتش لية؟ قلت له تعبان شوية قال طيب وبص فى اورقاه قمت قايم ورحت عنده وقلت له ممكن اخرج عشان تعبان؟ قال لى اتفضل
بعد ما خرجت استنيته عند مكتبه شوية ولقيته جاى وقلت له يا دكتور انا اسف الحاجات دي قديمة وانا .........لسة مكملتش لقيته قال لى انا نسيت الموضوع خلاص(هو بيتعامل بريطاني اوى وبارد جدا على فكرة وعملي لأخر ما تتصوروا) قلت له ايوة بس انا غلطان انا اسف حضرتك انا عايز اقول.......يا بني انا نسيت الموضوع والله..اهم حاجة روح اشترى شريط جديد عشان المحاضرة الجاية ياللا سلام ودخل مكتب دكتور تانى يسلم عليه وسابني واقف فى الطرقة....منظرى النهاردة كان زباااااااااااااااالة

الرجل ده بالذات كنت بحبه جدا وهو عنده نفس توجهاتي وافكارى وثائر على الحياة زيي وعايز يغير وجاي من برة عايز يعمل تغيير جذرى وانا كنت بحاول اساعده فى كدة او اعمل اللى اقدر عليه وفعلا تعاطفت معاه جدا وهو كمان حبني وبعد موضوع الاتحاد الحر هو عرف ان انا نفس النوعية فكان كل شوية فى المحاضرات يقول انتو معاكم هنا طالب محترم وايجابي ومشفتش زيه حتى فى لندن وبرمنجهام...وبعد ما اعتقلت فى موضوع الاتحاد الحر بقيت فى نظره الكائن الاسطورى اللى جرب كل حاجة وعمل اللى هو نفسه معرفش يعمله....تخيلوا بأة المنظر بعد الكوبليه البورنو اللى سمعه بصوتى ده...ده لو كان بصوت أنثوى كان بأة أرحم كنت هقوله شريط اشتريته من الشارع -بس هو الكدب هيودي فى داهية على أى حال- بس هاعمل اية لكن الكلام بصووووووووووووتى.

طبعا مفقوع جدا ومحتار اعمل اية...حكيت لمدحت زميلى قال لى انا لو مكانه كنت علقتك على باب الكلية..دانتا بتحصل معاك مواقف مبتحصلشى لاحمد حلمي فى افلامه...انت احمد هندي طبعا
الحل دلوئتى اية:
اتناسى الموقف اللى حصل ده تماما واحضر المحاضرة الجاية يوم الاحد الجاى عادي جدا ولا كأن اللى حصل ده جرى اصلا ولا كأن فيه حاجة بس استحمل بأة نظرات الرجل ليا-تخيلوا المنظر وانا ملتحي يا جماعة يعني الكلام ده لو طلع من واحد عادي ممكن تكون مقبولة على اساس نظرية ده شاب وبيعيش سنه لكن لما تطلع من ملتحي تبقى كارثة

افيدونا أفادكم الله

Friday, February 23, 2007

واتحنطر

الفترة اللى فاتت لما كنت بروح اقعد على النيل فى المنيل واصطاد سمك... كان فيه مركب - فلوكة - بتعدي من النيل بالظبط الساعة 4 وتلت و الساعة 8 او 9 تقريبا واحيانا تعمل رحلة كمان الساعة 10 ونص او 11
هى فلوكة رحلات زي اللى موجود فى قصر النيل وكدة...بتكون مشغلة اغاني شعبية وفيه بنت او اتنين –رقيق أبيض للعرض فقط- بيرقصوا فيها
بس المركب دي يظهر انه كان بيشغل شريط معين اول ما يطلع من المرسى فتلاقى على ما يوصل الحتة اللى انا فيها ييجي نفس الكوبليه من نفس الاغنية –عشان الفترة الزمنية بتاعة الشريط والمسافة هى هى كل مرة بيعمل الرحلة ... او ان اللى سايق المركب معجب جدا بالاغنية دي وعاملها شعار لحياته لدرجة انه عامل لها شريط مخصوص

الكوبليه اللى معلق فى وداني منها:
و اركب الحنطور
درجن درجن
واتحنطر

انا بأة هموت واعرف يعني اية
يتحنطر verb to ده

واية معنى اتحنطر؟
طيب لو جابوهالنا فى امتحان ترجمة عندنا فى الكلية وقال لى ترجم الكوبليه ده:
واركب الحنطور واتحنطر
وفعلا مش هزار الكلية عندنا مليانة دكاترة معقدة ويحبوا يجيبوا حاجات صعبة فى الترجمة ممكن انت نفسك ما تفهمهاش او عشان احنا اصلا ما بنتكلمش عربية سليمة يقوم يجيب لك نصوص عربية اصيلة وانت متعرفش تعمل فيها اى حاجة.
واحد معيد عندنا كان بيراقب علينا فى امتحان الترجمة اللى فات ولما اشتكينا ان الامتحان سلانج والفاظه قذرة وغير مفهوم اغلبها قال لنا انا لما كنت فى البكالوريوس دكتور الترجمة بتاعنا-ده كلامه- جاب لنا أبيات شعر لابن الرومي و الشنفرى –طبعا لامية العرب للشنفرى اشهر من أن تذكر- وقال لنا ان الدكتور جاب اول ابيات فى قصيدة الشنفرى ودي انا حافظ منها ابيات:
أقيموا بنى أمى صدور مطيكم فانى الى قوم سواكم لأميل


ولى دونكم أهلون: سيد عملس وأرقط زهلول وعرفاء جيأل

سيد : من اسماء الذئب
عملس: نحيف –جلد على عظم-
أرقط : ضبع
زهلول : جسده أملس جدا
عرفاء: مش فاكر
جيأل : صفة لعرفاء اللى هى غالبا قوسه او فرسه او جمله او حاجة كدة

وكمان الدكتور جاب لهم سورة العاديات

ترجم ما يلى:
والعاديات ضبحا * فالموريات قدحا * فالمغيرات صبحا*.... الى اخر السورة

هو القران سهل وبلسان عربي مبين ومفيهوش اى غموض بس المشكلة ان احنا اللى مش بنعرف عربي اساسا
العاديات: الخيل المسرعة التى تعدو فجراً
ضبحا: هو انا عايز اقول واكمل بس هى مش حصة لغة عربية وتفسير

المهم نرجع لصاحبنا اللى بيتحنطر
اعتقد ان ترجمة الكوبليه هتكون كالاتى:
& I shall ride the cart
Into right & left I sway
So I'm pleased

ومش هاغلس عليكم بأة بتحليلات من نوعية هبوط الفن المصرى والذوق العام والمش عارف اية .... هو متنيل اصلا وكله غلط فى غلط وحتى بايظ من ايام السبعينات من ايام عدوية والسح الدح امبو

لكن اللى بيسمعوا الاغانى دي...انا اعترف ان الفن الشعبي فيه حاجات حلوة بجد ومواويل حكم وقصايد حكم بجد وكلام عالى اوى لولا ان الموسيقى حرام كنت سمعته وأنصت الية كمان لكن اللى بيسمعوا الكلام ده من نوعية اتحنطر وكعبه كعبه وحبيبي وبلاعبه و الموز –الاغنية المشهورة- والبلح –الاغنية فائقة الشهرة- والعنب –الاغنية ساحقة الشهرة- ودلوئتى فيه صيحات جديدة بتطلع كل يوم- اللى بيسمعوا الكلام ده بيحسوا باية وهم بيسمعوه؟
هم عارفين ان كل ده هيافة وتهييس وبكلامهم هم سخصيا لما تيجى تسال اى مراكبي او سواق اية يا عم ده اللى انت مشغله يقولك اى وش فى الودان وخلاص
والصيحات الجديدة طالعة كتير
منها مثلا:


يعنى برضة كان فيه مركب معدية وكان بيغني بالسمك
اه والله بيغني للسمك وبيقول
السمك السمك السمك
بلطي
بلطي
و .......... مش عارف اية بس الكلام لو تدقق فيه وتحاول تفهمه تلاقيه كله اشارات زي الموز والعنب والمانجة بالظبط مفيش اى اختلاف

على فكرة النهاردة عملت خطوة ايجابية جدا
اتصلت بالملاح...ده من الخبراء الكبار اوى اوى فى منتدى نادي صيد الاسماك ومكونش ببالغ لو قلت انه كبير خبراء المنتدى.... رجل اخلاق وذوق وكله علم فى علم
النهاردة كلمته والرجل مرحب جدا وودود واخلاق وقال لى اقابله ان شاء الله الاتنين او التلات عشان ننزل سوا نجيب عدة جديدة تنفع لصيد الجر فى البحر الاحمر عشان الرحلة اللى طالعينها ان شاء الله
و ان شاء الله رحلة السويس دي شكلها هتكون من اقوى الرحلات اللى طلعتها فى حياتي...مركب كبيرة... ويوم الرحلة مظبوط على بداية نوة جديدة فى السويس..يعني ان شاء الله مغامرات تمام
انا عندي مشكلة واحدة وهى انى مش بعرف اعوم....ثانيا المنطقة اللى المفروض هنقف باللنش نصطاد فيها كانوا الجماعة الصيادين فى المنتدى فيها من فترة وكانوا بيقولوا انهم لما بينزلوا السنارة ساعات بيطلع لهم راس السمكة بس – وشفت الصور عالمنتدى- يعني هو بيصطاد السمكة تقوم وهى طالعة مشبوكة من بقها الوحوش اللى تحت فى المية بتهبرها ومش بتخلى غير راسها بس
انا طبعا سمعت الكلمتين دول بعد ما كنت اتفقت على الرحلة خلاص
قلت لهم الله يطمنكم

ربنا يستر ونتعلم جديد فى الرحلة دي لانى بجد حاسس ان الصيد ده حياة جديدة بتتفتح لى من اول وجديد وشكلى هاكنسل الجواز واقعد اصطاد واعيش حياتي حر

بلا جواز بلا هم

Monday, February 19, 2007

انا حاسس انى بلف وادور على نفسي مش عارف لية
عمال ابعد وابعد عن اللى انا عايزه وبروح للى انا عارف انه طريق هلاكي وبرضة معاه.
.
اللى بيشرب دخان او مدمن حاجة معينة وبيقول مش عارف يبطلها كداب
هو بس مش عايز يبطلها
ياريت الواحد يكون صريح مع نفسه
والاهم انه بعد ما يكون صريح ويحدد المشكلة ...الاهم انه يبدأ فى التغيير
ضعف الارادة هى المشكلة الرئيسية عند كل الناس
وانا هتكلم عن كل الناس لية؟ وانا مالى ومال الناس؟
.
انا مشكلتى الواقعية الفعلية هى ضعف الارادة
عارف مشاكلي كلها وعارف طريق حلها والهدف اللى عايز اوصل له والخطوات والمراحل والعقبات وطرق السيطرة والتغلب عليها ومع ذلك...مش ببتدي او ببتدي وبقف فى بداية الطريق وارجع تانى
.
ساعات اقول لنفسي انا محتاج زوجة تشجعنى على نفسي وتقف جنبي بدل وحدتي وساعتها انا وهى هنكون اقوى كابل couple
وهنعمل اللى ماتعملش
بس ارجع واقول لنفسي انت لو ما اتظبطتش من قبل ما تتجوز عمرك ما هتتظبط بعد الجواز
مستحيل تفضل تقول لنفسك عايز زوجة ملتزمة ومش من البنات اياهم بتوع اليومين دول عشان لو انا نمت عن الفجر هى تصحيني وترش مية فى وشى
طيب وفين حضرتك؟
وانت تنام لية اصلا يا عمنا؟
ايوة ايوة مانا عايز واحدة ملتزمة عشان تشدني لفوق مش تنزلنى لتحت زي بنات الجامعات اللى بنشوفهم اليومين دول
طيب وحضرتك هتتجوز رافعة او كراكة مثلا؟
هى هتفضل تشدك تشدك تشدك لغاية امتى؟
المفروض احنا الاتنين نساعد بعض ونشد بعض مش واحد مننا يساعد التانى والتانى نايم فى الخط
طيب وهاقوم من نومة الخط دي امتى؟
لما اتظبط فى اللى بالى بالك
وطيب وهاتظبط امتى؟
لما يكون عندي ارادة او زى ما كل الناس بتقول...ربنا يسهل
وفعلا ربنا حكيم عليم ما بيفوتش حاجة لحد وبيخلص من كل واحد اللى عمله فى الناس فى حياته قبل اخرته
يعنى انا اول ما التزمت كنت عصبي جدا وشديد ومتشدد على كل الناس وكان لما اشوف حد بيعمل معصية ما اقوله هتسيبها امتى يا عم يقوللى لما ربنا يسهل اقوم اقوله ماهو ربنا هيسهل لما انت تبدا تسيبها يعنى انت ابدا بنفسك
نفس الموضوع بيحصل معايا دلوئتى
.
لا على فكرة مش الموضوع ده وبس لكن كل حاجة عملتها مع حد قبل كدة حاسس انها بتتصفى فيا دلوئتى
كل حركاتى اللى كنت بعملها مع الناس ومش عارف معناها اية بتتعمل فيا دلوئتى من ناس تانية وبحس بمرارتها اوى
سواء كانت بسيطة او كبيرة
.
خد عندك
.
لما كنت بكون فى محاضرة ترجمة فى كورس خاص او لغة بشكل عام كنت بكون متفاعل جدا مع الدكتور او المحاضر -يمكن عشان العبد لله متفوق شوية- وكنت بغطي على زمايلي فى الفصل من غير ما احس وهم كانوا بيتضايقوا اكيد
دلوئتى معانا واحد من زمايلي فى كورس محادثة British
بناخده وزميلنا ده ما شاء الله عليه متجاوب اوى بهمهمات متواصلة طوال المحاضرة...انا مش زعلان انه متفوق لكن لما يكون فيه همهمة شغالة طوال المحاضرة وحد بيقطع عليك انت كدة بتتخنق لان تركيزك بيروح
.
وعلى كدة بأة الامثلة كتير
انا خايف اموت قريب
خايف تكون تصفية الحسابات دي معناها انى خلاص فى اخر لحظاتى فى الدنيا
ومعنى خوفى من الموت انى مش محضر للقائه وان الاخرة عندي سيئة جدا عشان كدة انا مش عهايز انتقل من نعيم الدنيا لعذاب الاخرة اللى مستنيني بسبب أعمالى
انا مش عارف مالى الفترة دي مع انى بنزل اصطاد سمك ومظبط أحوالي والمفروض اكون مفرفش لكن انا حاسس انى داخل على اكتئاب لو ما غيرتش المود ده فى المرحلة الجاية
I need to marry
I need to love
to feel someone's feelings & emotions
i need to have someone caring for me other than my siblings
continuous rings & phone calls full of emotions & & love
sometimes i remember ghada & think about her again & again
but i know she does Not remember me or at least she has painful memories with me
i know that if i encounter my new love i will forget all about her
but i still remember her & want to see her again
i don't want to hurt her any more & furthermore i know that if she saw me again she would - actually she must- be offended
Actually i has a deep old crack in my heart for her
she has some place in here but it is for the good memories only not for actual love
but when i think with my mind... i find her unsuitable for marriage
I know the characterstics of the best girl & know where to find her
There r dozens but who is the best for my character not for general selection?
what happen if i get married to a perfect one who is conservative & has the appropriate religious beliefs that i search for?
what happen if she found my weakness & loss of will?
i hate it when a girl be decieved when choosing her life's partner
the girl for me is a divine creature
she is the mother who brought me up
she is the sister who cared for me after my mother's death
she is the wife who fullfils my house needs & bring up my children-let alone fulfilling my sexual desires in bed- & dress me & choose the best for me
she is the fiancee whom i'm supposed to be - & will- be eager to meet...to touch....& to kiss
she is...she is
i hate it when a guy meke a fake exterior & decive his partner
what shall she feel when she wake up the first morning to see a horrible hairy creature in his vest/undershirt & a stinky smell springs out of his mouth instead of this lovely perfume he used to put on when he met her?
what is her sensation when she hears him utter an abuse to one of his companions?
can u discribe a wife's emotion to this one who groomed himself or made himself pretty -instaed of the word lie- to his life partner
after this she has nothing to do except for accommodation with the new life & to bear it whatever were the hurdels & however was his treat
she had been engaged...& the egy society doesn't allow u to be niether a divorced nor a
spinster
i want it to be clear
i want it to be soon
i want to bless everyone & to make the whole world happy
but may Allah forgive me & grant me more time to live if he wants
Please God...Grant me Life if life is better for me
& put me to death if death is better to me

.
.
.
I love u all
I love all the commentators here
Don't be angry with me
I want to read ur comments
i need support
Thank u

Monday, February 12, 2007

صباح العسل

بتفقع أوى اوى لما اكون عمال اكتب فى بوست ومطلع كل اللى جوايا وحاسس انى كدة تمام التمام وبعدين فجاة قبل ما اخلص كتابة بكام سطر او قبل ما ادوس اوكي الاقى الكمبيوتر هنج أو النور قطع او الكمبيوتر عمل ريستارت مع نفسه او اى حركة من الحركات دي
.
وطبعا لأاني معنديش قوة ارادة من اللى بيحكوا عليها فى برامج تحدي الاعاقة وكدة فطبعا حاجة زي دي بتسبب لى احباط رهيب تخليني ابطل كتابة بالشهر والاتنين
.
امبارح كنت عمال اكتب فى موضوع عن صيد السمك وبصراحة كان كلام حلو اوى وتقريبا هو احسن كلمتين كتبتهم من ساعة ما جيت هنا-من ساعة ما جيت البلوج ده يعني- لكن قدر ربنا ان الكلام ما يتنشرش...خلاص نرجعه الغسالة ياخد شطفة وبعدين نبقى ننشره
.
عايز احكي عن عالم صيد السمك ....الصيد ده بجد متعة المتع وفعلا دنيا تانية وعالم تاني خالص مكنتش اتخيل انه كدة
احساس جميل جدا وانت بتحضر الادوات و تبدا ترمي وتقول باسم الله وتستنى السمكة اللى هتيجي وتبدا تركز مع الغماز او لبلوب السنارة بيتهزر واللا لا؟ طيب الغماز نزل واللا دي هزة عادية موج يعني؟ وكمان اصل انتو متعرفوش يا اخواننا....اصل السمك اتنصح أوى اليومين دول وبأة ناصح ومش أى واحد كدة يروح يرمي السنارة هيلاقى سمكة بلعتها وبتقول له شدني يا كابتن من المية عشان زعنفتي اتبلت وعايزة انشفها......لا يا اخواننا ده العملية بجد صعبة وحلاوتها فى صعوبتها بالذات لان السمك الصغير بياكل الطهم من حوالين السن وبيسيب السن فاضى وانت مش بتحس بيه او ممكن ياخد الطعم بس الغماز مش بينزل اوى معاه فطبعا انت لازم تكون ايدك حساسة جدا وعينك مركزة مع الغماز نزل واللا لا
.
الجميل فى موضوع الصيد انك معاه بتنسى الدنيا كلها....طول مانت مركز مع السنارة والغماز واتحرجكت واللا لا وطبعا الاشتغالات اللى السمك بيعملها معاك والمزاولات اللى بتحصل لو سمكة خطفتها وسابت السن او لو جيت تطلعها وعرفت تفك منك...كل التركيز ده مع المياة والحياة اللى تحت بيخليك تنسى الدنيا اللى انت عايش فيها وتندمج تماما مع عالم المياة وتنسى الشوارع والزحمة والمرور والدنيا كلها
.
بجد انا انصح اى حد عنده مشكلة نفسية أو احباط او قلق او اى حاجة بجد ينزل يشترى سنارة ويطلع على النيل بس النصيحة اللى اوجهها لك روح المنيل او المعادى او اى منطقة هادية بحيث تكون بعيد عن اعين الفضوليين لأان عندنا فى مصر ما شاء الله الشعب كله بيعرف يصطاد والشعب كله عنده ذكريات مع الصيد...يعني عندنا من الاخر 70 مليون صياد.....انا كل ما اروح اقعد فى حتة الاقى اما شلة شباب او حد كبير او حتى عيال صغيرين ييجوا يهزروا واللى يحاول يعمل جد ويقوللى عارف انت كدة مش راميها صح..اصل لما كنت بصطاد -ده كلامه- كنت ارميها مش عارف ازاى واعمل اية تقوم تجيب لى سمكة طولها 2 متر او طولها اد دراعي ومرة نزلت اصطاد فين جبت سمك أكل الشارع كله....طبعا لو عندك مرارة وتقدر تستحمل الفقع ده اقعد براحتك ولو معندكش وعايز شوية هدوء اما انك تعمل اطرش ولا حتى تبص لاى حد بيكلمك-بس كدة هيبقى منظرك بايخ وانت لو بتحس هتحس بالذنب انك بتتجاهل الناس وبتتكبر عليهم- او بأة الاحسن تروح منطقة هادية بس خلى بالك من الحرامية والناس اللى بتثبت بمطاوى وكدة... وكمان متروحش المعادي اليومين دول عشان فيه سفاح وكمان متروحش المنيل عشان الكابلز بصراحة افعالهم تخلي الواحد يتفقع اكتر
.
مرة كنت رايح اصطاد ومعايا واحد صاحبي اسمه فوزى وكنا فى المنيل عند كوبرى عباس كدة.....المنطقة دي اصلا هادية جدا وتخيل بأة بعد العشاء بتكون عاملة ازاى...كابلز فى عربيات وعالحاجز بتاع الكورنيش وفى كل مكان..فوزي قاللى بص الواد اللى هناك ده....كان معاه واحدة -واللى يغيظك انها محجبة- وبيبوسها فانا قلت له يا عم خليك فى النيل وسيبك منهم قاللى لا بص بس ...يابنى ده بقاله حوالي 5 دقايق فى بوسة واحدة وما اخدش نفسه....ساعتها فهمت...اصل المفروض ان حضرتك تاخد نفس هواء عشان تتنفس يعني...لكن المثير ان فيه فى مصر على ما يبدو مهارات شابة يانعة بتعرف تبوس من غير هواء...وهكذا يعني
.
المهم نرجع للصيد
انا بأة عرفت مكان على النت اسمه منتدى صيد الاسماك...بجد عالم زي العسل وفعلا حلوين جدا ومرحين جدا...ان شاء الله هحاول اطلع معاهم رحلة من رحلاتهم الى سفاجا او الكونيسة فى عرض البحر وكدة
.واخيرا
احب انكم تشوفوا السمكة دي
اللينك ده فيه سمكة قرموط بس مش فى النيل...دي غالبا فى بحيرة كبيرة زي بحيرة ناصر او الامازون او الميسيسبي او كدة
.
شوفوا اللينك واستمتعوا
http://www.fugly.com/videos/6688/catching_a_giant_catfish.html

Saturday, February 10, 2007

لية؟

حاسس انى مقصر فى حقكم عليا-ده كأن فيه قراء مثلا- لكن بحاول اقنع نفسي ان فيه حد بيقرأ اى كلام بقوله ومن ناحية تانية بحاول اكتب عشان القراء دولا ميهجروش المدونة -ده على اساس ان تعليقاتهم مقطعة المكان-بس فيه كام ملاحظة او مشاهعدة عايز اقولها
.
ليه التعليقات فى مدونات البنات بيكون متوسطها من 60 الى 90 واحيانا 150 على حين انها فى مدونات الولاد بتكون دائما رقم فردي مبيصولش عشرة؟
.
ليه فى احساس عام بالكآبة والقهر فى كل المدونات حتى اللى اصلا عبارة عن مدونات فكاهية بتلاقي فيها اليومين دول مواضيع اقل ما يقال عنها ان اللى كاتبها سايكو وعايز علاج نفسي سريع قبل ما حالته تتفاقم؟
.
لية الناس فى مصر صبورة اوى اوى كدة ولا بيعملوا ثورة ولا انتفاضة ولا اى حاجة مع ان كل يوم أسوأ من اللى قبله؟
.
طيب مادام الناس صبورة اوى اوى كدة لية مش بينزلوا يصطادوا سمك مع ان الصيد ده بجد عايز عالم رايقة وصبورة ودي اشهر ميزتين فى الشعب المصرى؟
.
طيب لية مفيش سمك فى النيل مع ان الناس مش بتصطاد ومع ان اللى بناكله ده كله سمك مزارع ومش نيلي يعني سمك النيل راح فين؟ واللا اتخصخص هو كمان؟
.
انا عايز اتعلم
بجد بجد انا تعبان اوى اوى وعايز اتعلم
عايز اتعلم ازاى اتغلب على اليأس ده
وعايز اتعلم ازاى اقضيها وانسى
عايز اتجوز
وعايز احب
عايز اكون صريح مع نفسي ومع الناس
عايز أنسى كل شىء
عايز تعليقات فى المدونة
وعايز مصر تتحرر
الله أكبر
تحيا مصر

Friday, February 02, 2007

فين الناس؟

انا قلت ان الاجازة لما تبتدي كل الناس البلوجرز هيشدوا حيلهم وهيدوها كام مقال جامد وان الموسم ده هيكون موسم المعارضة
لكن يبدو ان المعارضة ماتت والحياة خلاص فل كدة
انا عن نفسي مقضيها اليومين دول بتعلم صيد السمك
والحقيقة موضوع الصيد ده جامد جدا وبامانة صباح الروقان
عالم تانى تماما ودنيا جديدة انصحك تجربها لو مكونتش جربتها قبل كدة
وتحياتي للجميع