أنا رايح بكرة عالجيش

السلام عليكم

مذكرات للتاريخ

النهاردة كنت في الهايكستب وعرفت السلاح

تم تجنيدي كجندي بقوات الدفاع الجوي ........ ورايح المعسكر يوم الأحد 20 يناير 2008 بإذن الله

المعسكر في دهشور ...... هانقطع عن حضراتكم لمدة 45 يوم تقريباً

المفروض أروح أدفع فلوس تمهيدي الماجستير بس نسيت أروح ادفعهم اليومين اللى فاتوا ومرتبك جدا ....... ربنا يستر وأعرف ادفعهم قبل ما اروح الجيش

الشقة عندي مدمرة ........ بعمل تشطيبات وحبكت معايا اني اعملها قبل ما اروح الجيش بأربعة أيام ....... سايب الشقة متدمرة والعفش مكوم في غرفة واحدة وبنام على الأرض ومفيش غير الكمبيوتر والمرتبة ......... دماغي دي حاجة تقرف .....بيحبك عليها حاجات عجيبة فى اوقات غريبة

المهم

بشكل عام: الحياة فى المستوى ج

أصلي مقسم الحياة مستويات

أ: لما بكون فى الفورمة وجامد وبحقق انجازات وسعيد وبضحك على طول
ب: العادي لما بكون عايش الحياة العادية ومفيش التزامات وزهقان شوية ومحبط من رحلات الصيد الفاشلة
ج: لما يكون ورايا التزامات ومش بعملها وورايا الف حوار ودماغي مرتبكة ومشغول فيهم ، بس الحياة مقبولة ومش زفت أوى
د: لما الحياة تكون طينة وخنيقة واكتئاب وعايز أمسك بازوكا وأدمر كل حاجة حواليا ، دي بتكون أحياناً لما يحصل لى موقف محرج بالاضافة لمشاكل الحياة ونقص فى الموارد وكدة - يعني من الاخر لما بتتعك كلها من كل ناحية وقانون ميرفي يشتغل تمام ويعمل الواجب وزيادة


صحابي الانتيم عملوا معايا واجب من ساعتين وأجروا عربية تويوتا كورولا جديدة جامدة جدا وعايزين يعملوا معايا واجب وياخدوني ونطلع الزعفرانة نصطاد ....... قلت لهم بلاش جنان قالوا لى انت ابو الجنان ومتعملش علينا حكيم ....... قلت لهم كل شىء بحساب والارصاد الجوية قالت الجو النهاردة وحش فى الزعفرانة والبحر عالية - انا بقول كدة لعلمي بجو الزعفرانة في يناير ونوة الفيضة الكبرى دلوئتى - وملحقتش أحجز مراكب ....... قالوا والحل فى العربية دي؟ عايزين نستغلها ...... عايزين يسهروني سهرة فرفشة كويسة قبل الجيش - حاجة زي حفلة الأعزب اللى بيتجوز مثلا- قلت لهم نطلع اسكندرية نحاول نصطاد ولو مصطدناش نقوم نتمشى فى البلد ونسترجع ذكريات الماضي اللذيذ

مسافر اسكندرية كمان ساعة ....... بكتب ده للذكرى عشان اعرف هوجب مع مين وهطنش مين ...... محمود صلاح عامل معايا كل واجبات الدنيا دلوئتى من توصية فى الجيش لرحلة خاصة لهدية لحاجات كتير ........ الرجل ده لازم أعمل معاه أحلى واجب لما تفرج

بصبح عليكم جميعا

تحية حب - أخص عم عصفور

سمسم : واحشني

أميرة البلطجية فين؟

دينا: سأفتقد قوة لغتك

ايموس: عقبالك تروحي الجيش

ضاكتور خالد: عقبالك يا ريس

نهاد: في بالي ومقصر معاكي بس مطحون

ازميرالدا: ربنا يخلف عليكي بالخير



دكتورة آيات ....... ردي بسرعة الله يكرمك



والسلام

الناجح يرفع ايده

بسم الله

والحمد لله

والصلاة والسلام على رسول الله

تحية طيبة وبعد

يشرفني إعلام سيادتكم بأنني قد نجحت باختبار القبول للسنتين التمهيديتين للماجستير بجامعة الأزهر وأنني سأبداً الدراسة بهما في غضون وقت قليل

جاء هذا النجاح مفاجئاً حيث اني علمت بأمر الاختبار قبله ب 18 ساعة فقط ......... وقدمت اوراق الدخول للاختبار قبل الاختبار بنصف ساعة فقط وبتوصيات عديدة لأني لم اعلم بالأمر في حينه

كان عدد المتقدمين 49 تسعة وأربعون طالباً (كم أوحشتني كلمة طالب) - أو لنقل خريجاً - واختتمت القائمة بي عند الرقم 50 خمسين ، والحمد لله تم قبول عدد 15 خمسة عشر واحداً منهم فقط ، كان ترتيبي بينهم السابع بفضل الله

كانت هذه هي أهم أنباء العبد لله

والحمد لله رب العالمين