امبارح كان عندي امتحان مادة نظم وحضارة

المادة دي بيدرسهالنا دكتور كدة تخطى - فى اعتقادي - الشعرة اللى بين العبقرية والجنون
يفضل يقولك كلام كتير اوى اوى عن الحوار بين الحضارات والتواصل بين الحضارات وفشل نظرية هنتنجتون وفوكو ياما فى الصراع بين الحضارات او
clash between civilizations
و نهاية العالم والكلام ده
لكن انا باعتبارى طالب عايز اسأل هل الكلام ده هستفيد بيه فى سوق العمل؟
طيب بلاش
هل المادة العلمية اللى الدكتور بيقولها لنا - ده اذا كان فيه مادة علمية اساسا ده يا حسرة كل الكلام من عندنا وباعترافه هو نفسه ان الامتحان هييجي زي كل سنة وبكلام كل سنة لان المنهج هو منهج كل سنة وهو -لا منهج - هل المادة العلمية اللى بنتعامل معاها دي هى المادة العلمية اللى المفروض ندرسها فى الكلية تحت مسمى نظم وحضارة؟
بس تقول لمين وتشرح لمين؟
ياللا مش مهم
المهم الحمد لله امبارح الامتحان جه ظريف
يعني السؤال الاول عملت فيه تأليفة عبقرية كدة
والسؤال الثاني تركته تماما ما حطيتش فيه قلم
والسؤال الثالث كان 4 نقاط جاوبت فيهم بأمانة وضمير عن واحدة بس وعملت تأليف فى اتنين وتركت واحدة
والحاجة اللى ما جاوبتهاش دي انا سبتها على اساس انى مش هحترم نفسي لما أألف أو أكتب كلام فى حاجة معرفش عنها اى حاجة اصلا
واحد بيقولك اية هى ال
benchmarks of cross-cultural communication
هألف له اية واكتب له اية
خلاص يعني مادام حاجة مش عارفها هاقول اى كلام وخلاص؟
الغريب انى بعد ما خرجت من الامتحان لقيت الدفعة كلها كاتبة اى كلام فى اى كلام واى رغى وخلاص
ولما اسال واحد يقوللى يعني انت فاكر الدكتور هيقرا الكلام ده اساسا؟
يا عم ده وراه مؤتمرات وترجمات وافلام وحوارات وسفريات
يعني من الاخر هيشوف ورقتك مكتوب فيها كام ورقة
وكل ما تكتب اكتر -لو حتى تكتب له قصيدة لنزار- هتاخد درجات اكتر
وناس كان كل كلامها تأليف فى تأليف
وواحد فضل ثابت على جملتين اتنين يعيدهم فى كل السطور
effective listening helps cross-cultural communication
و
cross-cultural communication depends on effective listening

والله مش بهزر هى دي الحقيقة المرة وهو بيقول لى انه كرر الكلام ده اكتر من 30 مرة فى السؤال وكان بيعمل الاستراتيجية دي كل سنة مع نفس الدكتور ومع ذلك كل سنة كان بيجيب امتياز او جيد جدا
والسنة اللى فاتت -الوحيدة اللى معملش فيها تأليف وقال الكلام اللى يعرفه و بس - الدكتور اداله مقبول
.
هى دي كليتنا
هى دي جامعة الازهر
صدق او لا تصدق
أجب أو لا تجب
المهم هو الطبل والزمر واللذان أصبحا سمة مميزة للمجتمع ككل وللجامعة -كمؤسسة أحتك بها خلال تعاملاتي اليوم
حسبنا الله ونعم الوكيل