النظافة حلوة

لسة مخلص غسيل المواعين ومسح المطبخ والحمام وكنس الشقة كمان

أصلى نسيت احكي لكم

انا عايش لوحدي من ساعة ما والدتي الله يرحمها ماتت واحنا -انا ووالدي- عايشين فى بيت العيلة وواخدين اخر دور وهو عايش فى شقة وانا عايش فى شقة

والسنة اللى فاتت جوزناه ست قده كده اهو برضة يونسوا بعض وياخدوا بالهم من بعض ويسندوا بعض برضة.

أما انا عايش هنا لوحدي ومقضيها مع نفسي عشان كدة تلاقوني سايكو شوية

المهم ان اخواتي الكبار-اصل انا اصغر اخواتي وكلهم متجوزين عقبالى ان شاء الله-اخواتي بييجوا ينظفوا الشقة كل فترة كدة لكن الفترة الاخيرة انشغلوا شوية برضة عندهم اولادهم واشغالهم فالشقة بقالها حوالي شهرين ما دخلتهاش مقشة ولا ممسحة والصحون فى الحوض من حوالي شهرين برضة وانا طبعا مكسل اغسلهم ومقضيها اكل جاهز

انما من ساعتين كدة نقح عليا عرق النظافة-اصل عندي امتحان أدب انجليزي وكينج لير وحاجات كدة يوم الثلات وانت عارف ان الواحد ساعة المذاكرة بيهرب بأى حاجة-المهم بقول نقح عليا عرق النظافة قمت نزلت جبت بريل بقوة الصابون اللى بيقضى على أصعب الدهون وكمان جبت شوية كلور -والحمد لله اني ساكن فى العباسية اللى هى اجمل حتة فى مصر من وجهة نظرى...الساعة 2 بالليل وتلاقى كل المحلات فاتحة وتجيب اى حاجة وعيش بلدي سخن كمان- المهم جبت صابون وكلور ومية نار عشان غسيل البلاط وجبت جبنة بيضا وجبنة رومي ومش ولانشون وطماطم وليمون ومربى فيتراك وعيش سخن وعصير كمان.

المهم طلعت وقفت لبست مريلة الحوض واديها دعك يا فوزية لغاية ما خلصت كل الصحون تماما وشطفتهم ولا أجدعها ربة منزل وحطيتهم فى الرفوف بتاعتهم وبعدين كنست الشقة تمام ونفضت السجادة بعدها وحطيت الغسيل الوسخ فى الاوتوماتيك ودخلت خدت الدش الجميل والمية السخنة يا حمو وبعدين طلعت لبست احلى تريننج فى الدولاب وولعت عود البخور الصح واكلت وشربت العصير وقعدت عالكمبيوتر

قلت اكتب لكم خاطرة جت فى بالى كدة

بجد بجدبجد

النظافة حلوة

والحركة بركة

وطول مانت قاعد خامل كسول هتفضل نفسك مسدودة تماما عن الحياة لكن لما تتحرك وتتعامل هتلاقى نفسك بتتفتح وريحة الشقة بتتغير وبتتهوى وبتبقى حاجة زي الفل