قصيدة لهاشم الرفاعي

أحد المدونين الظرفاء -زغلول- كتب تعليق على البوست اللى فات وارفق به بعض أبيات من قصيدة أمير الهعهع للعبقرى الراحل هاشم الرفاعي

حبيت اكتب لكم القصيدة هنا لانى انا كمان حافظها بس قولت اكتبها لكم كاملة
والقصيدة بالمناسبة كان سببها ان احد زملاء الشاعر السابقين - الشاعر ازهرى والزميل ازهرى برضة بس ايام ما كان الازهر ازهر - المهم احد الزملاء خرج من الثانوية-ودي كانت معجزة على ايامهم- والتحق بكلية فمنظره اتغير وبأة روش شويتين-زي ازهرية اليومين دول تلاقى الواحد منهم فى ثانوى يمسك الكتاب تحت شجرة الجميزة وما يسيبهوش غير عالغروب -وهو ده احسن حاجة فى الازهرية وهو الاخلاص فى طلب العلم وياريتنا كلنا نبقى كدة- لكن للاسف لما يدخل الجامعة فى القاهرة تلاقيه يحاول يتروشن ويعمل قصة شعر على جنب وشه ويلبس بنطلون جينز لميع ويبقى منظره ولا ال....اللى بيدور على رجالة
المهم عمنا هاشم الرفاعي لما شاف صاحبه اتغير قام كتب فيه القصيدة الحلوة دي
اقرأ وتمتع بأجمل زجل
.
.
.
زين الشباب الجامعي التابعي التابعي
الضاحك المرح الطروب العاطفي اللوذعي
الدون جوان الفذ من تهواه ذات البرقع
الغيد قد دلعنه أفديه من متدلع
قد كان يبدو الأزهرى لهن مثل البعبع
حتى أتى هذا فقوبل بالفؤاد المولع
يا صاح:يا ملك الفكاهة...يا امير الهعهع
أصبحت تجذب القلوب بمشية المتقمع
ويشار نحوك ان مررت على الحسان باصبع
أنسيت ما حوت المتون وما رواه الأصمعي
أنسيت يوم تخرقت عيناك من جخلنجع
الان تأنس بالفتاة ولا تقول افرنقعى
فاذا استطعت خداعهن فاننا لم نخدع
انى أرى أثر العمامة فى جبين المجدع
.
.
.
.
شوف يا أخى حتى هزارهم كان بالشعر
وعلى فكرة هاشم الرفاعي ده مش قديم اوى لكن ده من الشعراء المحدثين يعني كان ايام الثورة وعمل مظاهرات ضد عبد الناصر والاشتراكية وفضل هربان من بيتهم تقريبا سنة يعنى
المهم
انتم عاملين اية
نفسي اقولكم كلام كتير والله بس الامتحانات بأة
ادعولنا ربنا يفرجها علينا
سلام