الامتحانات قربت أوى

باقى أسبوع واحد على الامتحان

أسبوع وتبدأ رحلة النهاية....نهاية أحلى أيام بالجامعة

بس بصراحة مش ده اللى شاغلنى دلوئتى

احم احم

بعد أسبوع هامتحن فى 5 أجزاء قران من آخر سورة التوبة لآخر سورة الكهف


الحمد لله أنا حافظ من ال 5 أجزاء الشىء الكثير....يعني مش الكثير أوى....بس بدعي ربنا يوفقنى انى أحفظ القرآن كله ومش عشان الامتحان....عشان نفسي


أنا فى 6 ابتدائى كنت حافظ المصحف كله والحمد لله

بس لما دخلت اعدادي وثانوي بطلت أراجع وكنت بلعب ومش بفتح المصحف الا ايام الامتحانات بس

وفى الجامعة كان عندي كل سنة 5 أجزاء قرآن حفظ

فى الأقسام الاسلامية-زي قسم الدراسات الاسلامية باللغة الانجليزية او الفرنسية او الالمانية او الصينية- بياخدوا 7 أجزاء ونصف كل عام والمنهج تراكمي....يعني فى اخر سنة يمتحنوهم فى القران كامل

انا دلوئتى -مع انى واقع شوية فى الحفظ- انما بندم انى ما دخلتش كلية شرعية....كان زمانى حفظت القران كله ولو بالاجبار...اصل انا عارف نفسي ...زي المسمار مش بمشى الا بالضرب على دماغي
(:

ربنا يوفقنى و يعطيني قوة الارادة

انا بحب القران اوى اوى


بصدق وبجد.....اللى جرب صحبة القران مينساهوش

واللى ذاق حلاوة القران....لا يمكن يحس بطعم للحياة من غيره

ربنا يعيدنا للقران ويردنا اليه ردا جميلا

قل آمين

وبالنسبة للمنهج...انا السنة دي عندي اخر التوبة و يونس وهود و يوسف والرعد وابراهيم والحجر والنحل والاسراء والكهف


حفظت منهم والحمد لله...هود و يوسف وابراهيم والحجر والاسراء والكهف

الموقف مفرح شوية

لولا ان كلا من النحل و يونس حوالى جزء-6 أرباع تقريبا-وطبعا ده معناه انى مش حافظ تقريبا نصف المنهج


هو انا حافظهم كدة يعني....يعني لو قلت لى اول اية معينة اكملها واقول ايتين بعدها مثلا....لكن مش الحفظ اللى أقرأه فى صلاة واكون واثق انى مش هتلخبط

بجد أسألكم الدعاء....ادعوا لى بالهداية والتوفيق والرشاد...ادعوا لى برضا الله....ادعوا ان ربنا يرضى عنى ويحبني ويحببني فى القرآ ن اكتر واكتر ويخليني منامش ولا اصحى ولا اكل ولا اشرب ولا اعيش الا بالقرآن

قولوا امين