وكمان رحلة بحرية

اول امبارح طلعت رحلة للزعفرانة...مش قادر اوصف ولا اتكلم......بجد كانت اجمل رحلة طلعتها فى حياتي واحلى يومين مروا عليا فى حياتي
هاحكي لكم التفاصيل وانتم تحكموا

بدأنا الرحلة بدعوة متبادلة للصيد...من اسبوع كلمني صاحبي الصياد وقال لى مش حاسس انك عايز تصطاد...قلت له والله نفسي وعندي حنين للسنارة وحاسس انى نسيت مسكتها اصلا-اصل بعيد عنكم الصياد لو قعد اسبوع من غير صيد يحس انه هايتجنن زي المدمن اللى محتاج الجرعة- المهم لقيت التانى بيكلمنى وبيقول نفس الكلام قلت له ياللا يا حاج عايزين نطلع قمنا اتفقنا نطلع مارينا وادي الدوم ونديها صيد-مارينا  وادى الدوم دي عبارة عن قرية يخوت فقط يعني زي قاعدة بحرية وكلها عبارة عن مارينا هاشرح لكم نظامها اية

جهزت  الأكل-اخوكم طباخ انما اية-عملت طواجن مكرونة بشاميل و معاها كبدة بالفلفل و زلابية و شوية سندوتشات على خفيف وصاحبنا التانى جاب الطعم –جمبرى وكاليمارى- وانا جبت شوية دود من بتاع النيل اهو نجرب بيه هناك والتانى جاب كرتونة مية معدنية وعصائر وبيبسى على ميرندا وسفن اب وملينا العربية اكل وشرب كاننا رايحين اسبوع وخدنا العدة الجامدة وطلعنا

فى اول الطريق افتكرت انى نسيت البطاقة او الباسبور او اى اثبات شخصية...طبعا لفينا ورجعنا تانى البيت طلعت اخدتهم ونزلت.....طلعنا على الطريق واديناها مناقشات وضحك وغلاسة لغاية ما وصلنا ....وصلنا المارينا حوالى 8 مساء والجو تحسه كانه الساعة 2 بالليل....البحر عالى والرياح قوية وعايز اوصف لكم المارينا اصلا عشان تعيشوا الجو......القرية اصلا عبارة عن مرسى يخوت ووراه الطريق ووراه جبال البحر الاحمر...المرسى ده عبارة عن جزء من البحر عاملين حواليه طوق صناعى من جلاميد الصخر طوله حوالى 1200 متر وكله جوه البحر....فى نهاية الطوق ده فيه دايرة واسعة نسبيا وفنار والدايرة دي فيها كشاف سبوت كبير بيضربوه فى المية بالليل يقوم السمك الكبير والكاليمارى ييجي على النور واحنا بنقف نصطاد هناك.....طلعنا الحاجة وبدأنا نحضر ولقينا الرجل بتاع فودافون بيقول لنا فيه جماعة اصحابه جايين ورانا يجربوا الصيد شوية بس هم مش بيعرفوا يصطادوا.........قلنا تمام ....شوية ولقينا 3 عربيات داخلة المارينا ونزل منها شلة شباب وسلمنا عليهم...هم دول بأة....قعدنا نضحك ونهرج ونديها صيد وطلعنا شوية سمك محترمين وبعدين واحد منهم قال لنا انه شاف عربية جماعة اصحابهم على الطريق قبلنا بحوالى 10 كيلومتر وعاملين كامب وخيمة ونايت فاير وباربيكيو والقعدة شكلها جامدة وكلمهم قالوا ايوة احنا فعلا ...قمنا قلنا نروح نشوف الحياة واهى خروجة برضة....اغلب القاعدين عجبهم الصيد ومش عايزين يقوموا بس انا حبيت الموضوع وعايز اقوم اشوف الخيمة والمعسكر وكدة....قلت له انا هاجى معاك وطلع معانا اتنين كمان ورحنا....لقيت القعدة جامدة جدا هناك وعاملين زي ماهو قال بالظبط وبيصطادوا برضة والصيد جميل والسمك حلو....اديناها شوية لحمة مشوية وقعدنا نصطاد وفجأة وفى عز الاندماج لقينا صوت من ورانا....اثبت محلللللللللللللك....حرس سلاااااااااااااااااااااااااااااااااح........تك تتك تك –ده صوت شد الأجزاء- ولقيت كل الناس اللى معايا رموا نفسهم على الارض وطبعا عملت زيهم....جه بتوع حرس الحدود وقالوا بتعملوا اية هنا...قلنا بنصطاد سمك وعاملين خيمة وكامب-ماهو دول لو قلت لهم معسكر هيضربوك بالنار ويفتكروك من الاسلاميين- قالوا فين التصاريح-الحمد لله الشباب اللى عاملين الكامب كانوا معاهم التصريح بس احنا لا فقلنا له احنا معاناش عشان كنا معديين بنصطاد فى المارينا ورجعنا نسلم عليهم عشان دول صحابنا-والحمد لله انه معملش دور غلاسة وقال طيب ياللا اتفضلوا ومحدش يقعد غير اللى معاه التصريح-تصريح الصيد وتصريح مخابرات-عشان المهربين يعني بتيجي لهم سفن ترمى شحنات مخدرات فى البحر وهم يغوصوا من اى مكان فى الشاطىء يجيبوها ويخرجوا
....المهم لفينا ورجعنا عالمارينا تانى واديناها صيد لما شبعنا.....عالساعة 10 الصبح كدة خرجنا من المارينا على اساس اننا هنروح...قعدت انا ورا مع صديق ونمنا وبقى 2 صاحيين...صاحب العربية وصاحبنا التالت....شوية لقيتهم بيصحونا وبيقولوا ياللا هننزل...خير يا اخواننا احنا وصلنا واللا اية؟...قالوا لا داحنا هنصطاد تانى!! ولقيت العربية واقفة فوق جرف كبير وتحته المية حوالى مسافة 4 متر بينه وبين المية والمية نفسها عميقة جدا تحت الجرف واجمل حاجة ان الشعب المرجانية من اول الجرف لغاية مسافر حوالى 30 متر من الشاطىء وبعدها الرمال....يعني السمكة هتسكن فى الشعب وتطلع على الرمال تاكل وترجع بيتها تانى....والاجمل من كدة لقينا حتة حريدة –سمكة اسمها حريد او معروفة باسم البغبغان-خضراء كدة وطولها اد الذراع يعني مش اقل من 3 او 4 كجم بتعوم فى المية قرب الشط وحاجة اخر روقان......جرينا كلنا عالعربية وانا اللى كنت نايم بقيت اول واحد فاق وصحصح وجبنا الفايبر والايس بوكس والطعم و المثلجات واخترنا حتة ظل تحت الصخور وتسلقنا لغاية ما وصلنا وقعدنا قعدة تمام التمام والموج بيخبط فى الصخر تحتنا وعلى ما كنت انا بحضر السنارة بتاعتى كان هشام صاحبي رمى سنارته...وحاجة يعني ما شاء الله ......انا اكاد اقسم ان الغماز بتاع سنارته ما وصلش المية ولقيناه اتشد حتة شدة تحت......هوب كان هو شبكها وشد السنارة بسرعة لقينا طلعت معاه حتة دنيسة-ابو نقطة- تعمل حوالى كيلو وربع.
هوب كلنا اسرعنا الايقاع فى التحضير وكان هو رمى تانى وبرضة ما استنتش ثوانى وكانت جايبة حتة حفارة-سمكة اسمه الحفار من فصيلة المرجان كدة بس بيضا وحلوة اوى- وطلعت معاه بعد شد شوية.

طعمت السنارة بتاعتى بالدود ولسة هارمي لقينا شاب لابس تريننج رياضى وهو عملاق اصلا واسمر جدا واقف فوق الجرف وبيقول انتو بتعملوا اية هنا....هنا معسكر لقوات الصاعقة ...منقطة عسكرية وممنوع التواجد فيها.....انتو مشفتوش اليافطة فوق الصخر؟ ياللا اتفضلوا...ممنوع الصيد هنا..

طبعا مش عارف اوصف احساسي اية وانا شايف السمكة البغبغانة ادامي بتلعب فى المية وبتتنطط كمان واحنا كنا متسابقين مين يخطفها وفجأة طلع لنا الزبون ده....يعني صباح النحس...
طلعنا فوق الجرف ونحاول نسترضيه...طيب يمين شمال...طيب لو عايز تصاريح احنا معانا تصريحين...طيب قول بس فهمنا ....لقيناه بيقول يا اخواننا والله فيه تفتيش جاى دلوئتى وميرضيكوش أتأذى ودي فيها سجن...ولقينا فعلا يافطة مكتوب عليها قوات الصاعقة...معسكر تدريب الوحدات البحرية....والشاب فعلا كان ذوق جدا و محترم وكلمنا بكل أدب
طبعا هشام صاحبي خارج من المية هيعيط و لمحت الدمعة فى عين محمد جمال....بس قلنا خيرها فى غيرها ان شاء الله.

طلعنا بعدها على حتة تانية وحاولنا نصطاد فيها بس مكانش فيها سمك خالص او كان فيها بس مطلعش معانا يعني
(:
حاولنا فى المنطقة دي حوالى نص ساعة وانا طلعت منها مرجانة صغيرة قد نص الكف كدة وبعدين يأسنا ورجعنا تانى

دي كانت تفاصيل الرحلة....و برضة بكرر النصيحة لأى واحد عايز يروح اى رحلة....اختار الصحبة الجميلة الاول...فعلا الصحبة هى الرحلة و لو كانت الصحبة معاك حلوة زي اللى كانت معايا امبارح واول ....يبقى ثق انك هتقضى وقت جميل

من المواقف الطريفة اللى حصلت فى الرحلة دي.....واحد من الشباب اللى جم بعدينا –اصحاب صاحبنا- كان مش عارف اى حاجة فى اى حاجة عن الصيد....ووقف ساعة يقول انتو بتربطوا السن ازاى؟ طيب بنرميها ازاى طيب بنحط الطعم ازاى؟.....ويا عيني مكانش عارف اى حاجة ولما جه يرمي رمى غلط والخيط لف حواليه وكان موقفه مضحك جدا والسن شبك فى هدومه وجننه...بس احلى حاجة انه ما يأسش و برضة فضل يقاوم...شوية ولقيناه بيلف ذراع المكنة بسرعة وبيقول سمكة قوية خبطت فى الطعم...ضحكنا وافتكرناها وعرت –وعرت يعني السن شبك فى الصخور وموعر تحت المية- وقلنا له ما تخافش دي وعرت ولسة قبل ما نتحرك عشان نفكها لقينا حتة سمكة ما شاء الله حوالى 2 كيلو ونص طالعة معاه فى السنارة وبتفلفص وهو بيضحك بشكل هستيرى وبيصرخ وبيقول هيييييه هييييييييييييييييه سمكة سمكة.......كلنا بصيناله حتة بصة......تمام يعني......الواد يا عيني من ساعتها مصطادش حاجة....بس على أى حال هو برضة خد الرقم القياسى وطلع اكبر سمكة فى الرحلة كلها-حظ الهواة والمبتدئين بأة..

برضة من الحاجات الجميلة فى المارينا....منظر السمك تحت المية الشفافة...يعني هناك عشان المية شفافة ونقية اوى فبتشوف السمك تحتك بيهجم على الطعم ازاى....كان معايا جمبرى وده بيجنن السمك وبيشد السمك جدا عليه....بس المشكلة ان الجمبرى ضعيف على السن يعني اقل خبطة من اصغر سمكة تخلى الجمبري يقع فلازم انك تضرب على السمكة من اول نقرة عشان السن يشبك فيها
بس اللى اهم من الجمبرى هو الدود.....الدود بأة عشان بتدخله كله فى السن فلازم السمكة هتبلع هتبلع يعني ملهاش حل تانى....كنت ارمي الدودة الاقى ييجي 200 سمكة ملونة بيطلعوا من تحت المية فى سرب كبير ويتخانقوا كلهم على الدود والغمز يشتغل والاقى الغماز اتسحب تحت المية بسرعة جدا اقوم شادد وتطلع الخروفة اللى اكلت الطعم

برضة حصل موقف مضحك جدا...........بالليل لما رميت الرابالا بتاعة الكاليمارى –الرابالا هى الطعم الصناعى يشبه سمكة وفيه سنون وبتحركه فى المية يقوم السمك يهجم عليها ياكلها يفتكرها سمكة تانية- بعد ما رميت الرابالا وبجرب بيها شوية وطلعتها.....لقيت عليها مادة سوداء زي الشمع او الحبر....بسأل محمد صاحبي قال لى ده حبر كاليمارى-اصل الكاليمارى عنده حاجة زي حوصلة حبر...لو دخل عليه سمكة متوحشة تاكله يقوم ينفث الحبر في وشها عشان تخاف منه وهو يهرب جوه الستارة السودا او السحابة السودا اللى الحبر بيعملها فى المية- المهم لقيت صاحبي بيقول لى هو فين؟ قلت له فين اية؟ قال فين الكاليمارى اللى طلعته وبخ الحبر على الرابالا كدة؟ قلت له ما طلعش ...ده تف الحبر عليها بس وسابها ومشى...قال لى يبقى قرف من الرابالا بتاعتك وبيقولك غيرها بحاجة تانية....

شوية وواحد تانى بيرمي الطعم....طلع له السن و الخيط عليهم شوية حبر....اتخنق اوى من الحركة دي.... كمان شوية... لقيت الغماز بتاعى عليه حبر كاليمارى على قمته-الجزء العايم من الغماز او الفلة- اتخنقت اوى اوى من الكاليمارى ده...بعدين هشام صاحبنا بيقول مالكم فيه اية؟ قلت له انا اتخنقت من الكاليمارى ده اللى مقضيها تفافة علينا ولا كأننا خدامين عند أهله....... كل شوية يعدي يتف علينا ويمشى ومبنطلعوش.......قال لى وريني كدة.....وريته الغماز قال ده مش حبر كاليمارى يا اخواننا ....... ده زيت وشحم من اليخوت اللى فى المارينا!!
بعدها كل شوية نضحك على بعض ونقول انتو كنتو فاكرين الكاليمارى معندوش شغلة الا احنا ....يفضل يتف علينا طول الليل؟ ويقول يا مجانيييييييييييين ياللى بتصطادوا!!

حصلت مواقف مضحكة كتير وجميلة

خلاصة القول اتمنى ان كلكم تقضوا حياة صعيدة وتحاولوا بجد تجربوا البحر الاحمر وشواطئه والكاليماري بتاعه....بجد تجربة جميلة جدا.....الرحلة دي على فكرة كلفتنى كلها بالطعم ودخول المارينا والاكل والشرب والادوات الزيادة وبنزين العربية 48 جنية بس...يعني اقل من 50 جنيه
وعلى فكرة البحر الاحمر فاضى جدا ومفيهوش حد خالص....هتنسى الزحام والقرف والتلوث....بجد مكان حلو اوى اوى واتمنى كلكم تقضوا وقت حلو هناك.

وكل رحلة وانتم طيبين