واتحنطر

الفترة اللى فاتت لما كنت بروح اقعد على النيل فى المنيل واصطاد سمك... كان فيه مركب - فلوكة - بتعدي من النيل بالظبط الساعة 4 وتلت و الساعة 8 او 9 تقريبا واحيانا تعمل رحلة كمان الساعة 10 ونص او 11
هى فلوكة رحلات زي اللى موجود فى قصر النيل وكدة...بتكون مشغلة اغاني شعبية وفيه بنت او اتنين –رقيق أبيض للعرض فقط- بيرقصوا فيها
بس المركب دي يظهر انه كان بيشغل شريط معين اول ما يطلع من المرسى فتلاقى على ما يوصل الحتة اللى انا فيها ييجي نفس الكوبليه من نفس الاغنية –عشان الفترة الزمنية بتاعة الشريط والمسافة هى هى كل مرة بيعمل الرحلة ... او ان اللى سايق المركب معجب جدا بالاغنية دي وعاملها شعار لحياته لدرجة انه عامل لها شريط مخصوص

الكوبليه اللى معلق فى وداني منها:
و اركب الحنطور
درجن درجن
واتحنطر

انا بأة هموت واعرف يعني اية
يتحنطر verb to ده

واية معنى اتحنطر؟
طيب لو جابوهالنا فى امتحان ترجمة عندنا فى الكلية وقال لى ترجم الكوبليه ده:
واركب الحنطور واتحنطر
وفعلا مش هزار الكلية عندنا مليانة دكاترة معقدة ويحبوا يجيبوا حاجات صعبة فى الترجمة ممكن انت نفسك ما تفهمهاش او عشان احنا اصلا ما بنتكلمش عربية سليمة يقوم يجيب لك نصوص عربية اصيلة وانت متعرفش تعمل فيها اى حاجة.
واحد معيد عندنا كان بيراقب علينا فى امتحان الترجمة اللى فات ولما اشتكينا ان الامتحان سلانج والفاظه قذرة وغير مفهوم اغلبها قال لنا انا لما كنت فى البكالوريوس دكتور الترجمة بتاعنا-ده كلامه- جاب لنا أبيات شعر لابن الرومي و الشنفرى –طبعا لامية العرب للشنفرى اشهر من أن تذكر- وقال لنا ان الدكتور جاب اول ابيات فى قصيدة الشنفرى ودي انا حافظ منها ابيات:
أقيموا بنى أمى صدور مطيكم فانى الى قوم سواكم لأميل


ولى دونكم أهلون: سيد عملس وأرقط زهلول وعرفاء جيأل

سيد : من اسماء الذئب
عملس: نحيف –جلد على عظم-
أرقط : ضبع
زهلول : جسده أملس جدا
عرفاء: مش فاكر
جيأل : صفة لعرفاء اللى هى غالبا قوسه او فرسه او جمله او حاجة كدة

وكمان الدكتور جاب لهم سورة العاديات

ترجم ما يلى:
والعاديات ضبحا * فالموريات قدحا * فالمغيرات صبحا*.... الى اخر السورة

هو القران سهل وبلسان عربي مبين ومفيهوش اى غموض بس المشكلة ان احنا اللى مش بنعرف عربي اساسا
العاديات: الخيل المسرعة التى تعدو فجراً
ضبحا: هو انا عايز اقول واكمل بس هى مش حصة لغة عربية وتفسير

المهم نرجع لصاحبنا اللى بيتحنطر
اعتقد ان ترجمة الكوبليه هتكون كالاتى:
& I shall ride the cart
Into right & left I sway
So I'm pleased

ومش هاغلس عليكم بأة بتحليلات من نوعية هبوط الفن المصرى والذوق العام والمش عارف اية .... هو متنيل اصلا وكله غلط فى غلط وحتى بايظ من ايام السبعينات من ايام عدوية والسح الدح امبو

لكن اللى بيسمعوا الاغانى دي...انا اعترف ان الفن الشعبي فيه حاجات حلوة بجد ومواويل حكم وقصايد حكم بجد وكلام عالى اوى لولا ان الموسيقى حرام كنت سمعته وأنصت الية كمان لكن اللى بيسمعوا الكلام ده من نوعية اتحنطر وكعبه كعبه وحبيبي وبلاعبه و الموز –الاغنية المشهورة- والبلح –الاغنية فائقة الشهرة- والعنب –الاغنية ساحقة الشهرة- ودلوئتى فيه صيحات جديدة بتطلع كل يوم- اللى بيسمعوا الكلام ده بيحسوا باية وهم بيسمعوه؟

هم عارفين ان كل ده هيافة وتهييس وبكلامهم هم سخصيا لما تيجى تسال اى مراكبي او سواق اية يا عم ده اللى انت مشغله يقولك اى وش فى الودان وخلاص

والصيحات الجديدة طالعة كتير

منها مثلا:

يعنى برضة كان فيه مركب معدية وكان بيغني بالسمك
اه والله بيغني للسمك وبيقول
السمك السمك السمك
بلطي
بلطي
و .......... مش عارف اية بس الكلام لو تدقق فيه وتحاول تفهمه تلاقيه كله اشارات زي الموز والعنب والمانجة بالظبط مفيش اى اختلاف

على فكرة النهاردة عملت خطوة ايجابية جدا
اتصلت بالملاح...ده من الخبراء الكبار اوى اوى فى منتدى نادي صيد الاسماك ومكونش ببالغ لو قلت انه كبير خبراء المنتدى.... رجل اخلاق وذوق وكله علم فى علم
النهاردة كلمته والرجل مرحب جدا وودود واخلاق وقال لى اقابله ان شاء الله الاتنين او التلات عشان ننزل سوا نجيب عدة جديدة تنفع لصيد الجر فى البحر الاحمر عشان الرحلة اللى طالعينها ان شاء الله
و ان شاء الله رحلة السويس دي شكلها هتكون من اقوى الرحلات اللى طلعتها فى حياتي...مركب كبيرة... ويوم الرحلة مظبوط على بداية نوة جديدة فى السويس..يعني ان شاء الله مغامرات تمام
انا عندي مشكلة واحدة وهى انى مش بعرف اعوم....ثانيا المنطقة اللى المفروض هنقف باللنش نصطاد فيها كانوا الجماعة الصيادين فى المنتدى فيها من فترة وكانوا بيقولوا انهم لما بينزلوا السنارة ساعات بيطلع لهم راس السمكة بس – وشفت الصور عالمنتدى- يعني هو بيصطاد السمكة تقوم وهى طالعة مشبوكة من بقها الوحوش اللى تحت فى المية بتهبرها ومش بتخلى غير راسها بس
انا طبعا سمعت الكلمتين دول بعد ما كنت اتفقت على الرحلة خلاص
قلت لهم الله يطمنكم

ربنا يستر ونتعلم جديد فى الرحلة دي لانى بجد حاسس ان الصيد ده حياة جديدة بتتفتح لى من اول وجديد وشكلى هاكنسل الجواز واقعد اصطاد واعيش حياتي حر

بلا جواز بلا هم