رحلات رحلات

كل سنة وانتم طيبين بمناسبة العيد

سوق رمضان خلص...........اللى كسب كسب واللى خسر خسر واللى عدى عدى

كل سنة وانتم طيبين

انا عملت رحلات كتيرة اوى اوى في رمضان ده.............تقريبا كان أغلبه رحلات
!!



رحت حتة اسمها ترعة السلام

ورحت الزقازيق

ورحت اسكندرية



هاحكي لكم عن أهم رحلة فيهم وهي ترعة السلام


ترعة السلام دي ترعة كبييييييييييييييييرة بعرض النيل تقريبا كدة ممتدة بعد الاسماعيلية والقنطرة شرق جوه سيناء.............طويييييييييييييييييييلة جدا وعريييييييييييضة وماشية كلها على استقامة واحدة ...............فيها الاف القناطر والهدارات والأهوسة.........فيها كذا محطة رفع وطبعا فيها سمك بالأطنان

ترعة السلام من أقوى الاماكن في مصر لصيد السمك من المياه العذبة بعد بحيرة ناصر...........السبب الاول ان الحكومة القت فيها زريعة كتير بالعبيط من سنين والترعة فيها غذاء كتير جدا لدرجة ان السمك كبر وتوحش ووصل لاحجام رهيبة (واحد حبيبي مطلع من هناك قشر بياض حوالي 70 كجم وزن السمكة الواحدة)وكمان البوري فيها بيوصل ل 8 كجم و البلطي بيوصل ل 20 كجم و 30 كجم للسمكة الواحدة وحاجات غريبة كدة

المهم احنا طلعنا الرحلة دي تقريبا يوم 10 رمضان.........كنا 4 أشخاص.........انا ومعايا 3 آخرين.............عبرنا كوبري مبارك السلام فوق قناة السويس (الكوبري ده جامد جدا والمنظر من فوق ومن تحت مشكلة) وبعدين وصلنا ترعة السلام حوالي الساعة 5 الصبح..........قعدنا على ترعة فرعية صغيرة واصطدنا سمك صغير عشان نطلع بيه السمك الكبير

المكان هناك يوم ما بتاخد منه سمك بتقول يا كرم الله........ويوم ما بتمنع ما بتاخدش منها ولا سمكة

ده اللى حصل معايا.............ومعانا كلنا........من الفجر لغاية المغرب مستنيين ان أي جرس يرن (بنحط السنارة في مكانها ونثبت في اللبلوب (الطرف) جرس صغير عشان لو سمكة جت وأكلت الطعم وبدأت تتعامل مع السنارة يقوم الجرس يرن...........طبعا مش هافضل ماسك سنارة في ايدي طول النهار خصوصا انك بتكون فارد كذا سنارة يعني 4 او 5 مش واحدة بس...........بتحط كل واحدة في الحامل بتاعها او بتربطها في القنطرة عشان السمكة متاخدش السنارة وتجري

المهم احنا حطينا السنانير على القنطرة وقعدنا نشوف الرزق ونجرب في الترع الفرعية (في الرئيسية احنا بنلعب على قشر البياض (الملك) انما في الفرعيات بنشتغل على البوري والبلطي وخلافه............ طول النهار عمالين نشوف حاجات زي صواريخ فوق المياه.........البوري بيلعب وبيطير فوق المياة و عمال يحوم في المياة.......... والقراميط عمالة تلف وتدور وتلعب برضة............ومفيش أي حاجة عايزة تاكل خالص

على المغرب بدأنا نلم السنانير لان قشر البياض مش بياكل بالليل خالص...............بدأنا نرمي طعم للقراميط والبلطي اكتر............عمالين يلعبوا وبرضة مفيش حاجة............ من اليأس بدأنا نشمط (التشميط انك تعمل سبحة فيها 10 سنون ثلاثية زي الهلب وترميها في المياة وتشدها بعنف كل دقيقة او نص دقيقة في اتجاه عشوائي وهتخبط في جسم سمكة وتطلع معاك من جسمها مش من بقها مش واكلة يعني) وبرضة مش عارفين نجيب حاجة........... واحد معانا وهو بيشمط لقي السن شبك في حاجة كبيرة عملت بلبطة جامدة أوي في المياة وأخدت سبحة السنون منه وجريت
!!!


انا وانا واقف اشمط كنت مرعوب اصلا من البيئة المحيطة................احنا واقفين في صحراء اساسا واسعة جدا ومفيش حوالينا اى شىء الا حقول................. حقول بدون فلاحين ومشفتش اى بنى ادمين طول النهار الا مجموعة مزارعين على جرار رايحين مكان ما وغير كدة مشفتش اى حد والمكان مرعب بالليل............. وانا واقف اشمط نورت الكشاف في رأسي (كشاف بيتلبس في الرأس زي الخوذة بس بأستك) لقيت فيه قرموط طول رجلي مثلا حوالي متر عمال يدور حوالين القنطرة وبيلعب في المياة...............اضرب عليه بالسنون مش عايز ييجي............قلت انزل له طعم............ نزلت له حتة مصارين فراخ (الطعم المفضل جدا لدى القراميط) لقيته عمال يلف حواليها على وش المياة ومش راضي ياكل........... رميتها بدون سن برضة مأكلهاش............الاستنتاج اللى وصلنا ليه ان الغذاء فى الترعة كتير جدا والسمك مش عايز ياكل


عملنا ليلتها معسكر وكان معانا خيمة فرشناها و عملنا نايت فاير (كنا مقسمين المهام بيننا والرجل قال لى اجمع خشب يا هندي قمت جمعت هيش ناشف وبعدين دلقت عليه جاز عشان نولعه ولما قعدنا حوالين النار بالليل لقيت شوية ريح هبوا في وش الرجل والهيش طار معاهم (: ولقيت الرجل بيصرخ: انا قلت لك لم خشب مش هيش يا هندي الله يسامحك)بس كان يوم جميل

قضينا اليوم من الساعة 5 الصبح لغاية الساعة 3 بالليل..............يعني حوالي 22 ساعة وراجعين بدون ولا سمكة (للأمانة هم حوالي نص كيلو سمك في حجم عقلة الاصبع حصيلة الرحلة كلها) وشايفين السمك الاحجام تحت عينينا ومش عارفين نعمل حاجة ولا نطلعه


الناموس هناك كان مشكلة.............بيقرص من فوق الهدوم ولما رجعت البيت لقيت كومة كلاكيع تحت الجلد في رجلي كلها..............حتى البف باف مش نافع معاه ولا زيت القرنفل كمان


رحت رحلات تانية بس هاحكي عنها بعدين..............خصوصا اني بحضر لرحلة كبيرة (قلت أطلع رحلة جامدة قبل ما اتجوز بأة) ودي باذن الله هتكون في مرسى علم.......... اشتريت الفترة اللى فاتت معدات كتيرة للرحلة دي............ اشتريت خيمة كبيرة 4 في 4 يعني تشيل 10 أشخاص مستريحة أوى أوى وارتفاعها كبير ما شاء الله يعني 230 سم وعازلة للمياة وممتازة الصراحة..........وجبت صندوق أدوات لحفظ العدة......... و8 علب سنون متنوعة الاحجام والاشكال...........ورابالات (طعم صناعي) وكرسي رحلات صيد و 3 فايبر جديد و 2 ماكينة جديدة وخيوط وايس بوكس و كذا حامل سنارة وحضرت صندوق خشب مكسر (حطب) وجركن سبرتو أحمر وجركن جاز وكشافات ليلية ونظارة مكبرة ونظارة بحر بتاعة ال سنوركلينج (الغطس تحت المياة مع التنفس من خلال انبوب ورؤية الشعاب المرجانية) وجبت كل معدات التخييم والمعسكر وباذن الله هنطلع مرسى علم (حوالي 800 كم من القاهرة) ونقعد 4 أيام على الشاطىء..........فيه واحد صاحبنا عنده زودياك بمجاديف (زودياك ده يبقى القارب المطاطي بتاع حرس الحدود أو زي اللى عبرنا عليه في أكتوبر 1973) بس من غير موتور.........هو بمجاديف بس واحتمال لو الرجل جه معانا يجيب معاه الزودياك ده..........كدة كل حاجة اكتملت وانا معايا تصريح الصيد وباقي تصريح حرس الحدود والمخابرات وده بيطلع من شارع الطيران ومش بياخد وقت............ادعوا لى ربنا يسهل وباذن الله هاعمل لكم عزومة كبيرة على سمك لما ارجع من الرحلة دي


نسيت اقول لكم


التجنيد بتاعي...........هاروح الجيش (الهايكستب) للكشف الطبي يوم 20 أكتوبر باذن الله...........لو ربنا كرمني وجه تأجيل هاطلع الرحلة دي............لو أخدت جيش يبقى ربنا يفرجها بعدين


ادعوا لى ربنا يكرمني بالزوجة الصالحة وبالعمل الصالح الطيب


وحشتوني جدا جدا


والسلام