المسيار والعرفي هما الحل

عايز اتكلم عن تقاليد الزواج فى الاسرة المصرية




مش هاتكلم عن الزاوج بعد صحوبية او قصة حب لانه بيكون سهل جدا وانا غلطان اصلا انى فكرت فى الجواز المحترم وجواز الصالونات او التعرف عن طريق حتى المسجد......كله هو هو


هاتكلم عن الخطوات المعتادة لزواج الصالونات



اول حاجة......مقابلة جميلة جدا...........قعدة عائلية شيك جدا بيكونوا فيها منضفين البيت تمام كأن ده مستوى النظافة المعتاد بالمنزل وبرضة عشان يوريك ان العروسة عشرة على عشرة وبرضة يقدم لك حاجة شهية اما اكلة ويقولك ان العروسة هى اللى طبختها (وده بيكون فى تانى مقابلة) او جاتوه وشاي فى حاجات سيراميك بتلمع جدا وبرضة ده بيدلل على مستوى النظافة او همة الانثى اللى هتاخدها فى بيتك............لازم تعرف انك واخد واحدة نشيطة

ممكن نناقش الخطوة دي؟

لما اروح ازور ناس وهم ينظفوا مخصوص عشان فيه عريس جاي...........وبعدين البيت فى المعتاد عندهم مش بالنظافة دي............انا عايز اشوف المستوى المعتاد..........عايز اشوف البني ادمة اللى هتعيش معايا دي مستوى نظافتها اية وبتطيق تعيش فى نظافة مستواها اية................فيه واحدة لو شافت قشرة لب فى الارض تتفزع وتقوم تجري تجيب المقشة واديها تنظيف..........وفيه واحدة مش بتتحرك ولو شافت اكوام زبالة حواليها.........الا لو فيه عريس جاي

ده انا شايف -مبدئيا كدة- انه غش وخداع........وروني انتم عندكم اية على الطبيعة وانا احكم واشوف...........لية انا كمان البس الحتة اللى على الحبل وانا رايح؟............طيب لية ما يتصرفش كل واحد بطبيعته وخلينا صرحاء وخلاص





تانى قعدة

كلام بسيط ولذيذ وياترى الهانم عجبتك والكلام ده واه طبعا واحنا نشترى رجل والكلام ده



يسيبك قعدتين تلاتة بعدها لغاية ما تتعلقوا ببعض...........عشان يعرف يأثر عليك فى الكلام كويس


وبعدين المزادات تشتغل

انا مش عايز منك حاجة يابني..........غاية ما في الامر التجهيزات الاولية البسيطة..........شقة فيها اوضة نوم وانترية وثلاجة وبوتاجاز والسخان عشان المية السخنة في الشتاء ومش مهم المروحة دلوئتى بس اهم حاجة التليفزيون برضة عشان انت هتخرج وهى محتاجة حاجة تسليها فى البيت .........ولو غسالة فول اوتوماتيك انا مستعد اشارك معاك بجزء من تمنها(ده اللى انت طبعا هتقول لا شكرا يعني هجيب كل ده وهامد ايدي اخد منك 500 جنيه واللا حاجة ...خليهملك يا حاج) وبعدين شوف بأة اصل التشطيبات دي مش مشكلة...........مش عايزينك تسكنها فى قصر يعني..........بس هييجي ساعة التسطيبات يقولك اهم حاجة عايزين لون الحوائط كذا والسقف كذا وياريت لو شوية كرانيش هنا دي رخيصة ومش هتكلفك وبعدين وشوش الكهرباء دي شكلها مش تمام.........اجيبلك وشوش يا حبيبي لو ممعاكش.......طبعا انت هتزار لكرامتك وتفضل تتكلف تتكلف تتكلف وحاجات صغيرة بتعد ورا بعضها وانت مش ملاحق...........فجأة تلاقى انك شربت المقلب (هو كلمة مقلب ليها كلمة مصاحبة اخرى بتمشى معاها كوللوكيشن يعني) المهم انك هتعدي عليك ايام تحسها سنين............طبعا الحياة مش بالسهولة دي..........شوف انت مرتبك كام وبتصرف كام..........وعايز تحوش كام...........وبعدين انت لو فاكر ان العملية دي هتخلص تبقى بتحلم

دلوئتى الموضوع ده -لو معاك الشقة-يبقى هتتكلف فى حدود 20 الف جنيه على اقل تقدير.........هقول اوضة النوم ب 7 والانتريه ب 2 والتلاجة ب 2500 والبوتاجاز ب 1500 وشوية تشطيبات تعبانة وباقى الرفايع..........فعلا الموضوع بيدخل فى 20 الف

طيب انت هتعرف تحوش ال 20 الف دول فى اد اية؟

هتقولى انا مرتبي 1000 جنيه وهاصرف 400 و احوش 600 يعني هاخد تقريبا سنتين او تلات سنين بفرض ان حد هيساعدني والكلام ده

ههههههههههههههههههه

تعالى هنا

انت فاكر ان الحياة بالبساطة دي؟

انت لو مرت عليك سنة واحدة فى التحضير للزواج يبقى انسى الزواج يا ريس

وكل سنة بتمر عليك يبقى احسب انها ما عدتش

لان السنة فيها عيد فطر وعيد اضحى وعيد ام وعيد أب وعيد طفولة وعيد ميلاد وعيد ميلاد اختها الصغيرة ونجاح اخوها التاني و طهور مش عارف مين(حتى لو قلنا ان كل الاعياد دي مش من السنة النبوية) (وحتى لو هم نفسهم ملتزمين وقالوا لك دي بدع....برضة بتلاقى بوز مش لطيف خالص في الايام دي لو مجبتش هدية)والبوز ده له مصادر متنوعة........أب أو ام او اخوات


انا عايز اسأل


لو فيه واحد عايز يتجوز باحترام وبعدين يكون نفسه


مينفعش يتجوز على مرتبة وكام شلتة وبعدين ربنا يفرجها ويبنوا نفسهم مع بعض؟


طيب هتقوللى اللى بياخد واحدة رخيصة هيبيعها رخيصة والكلام ده

طيب ما نتكلم بالواقع بأة

الكلام ده كان زمان..........موضوع ان الواحد ياخد واحدة رخيصة والكلام ده.........ايام ما كان الرجل هو سيد المرأة والمتحكم الوحيد الاوحد فيها

والنهاردة؟

النهاردة فيه مساواة بجد................بأة انت متحكم فى مراتك؟ ابدا والله.........صوتها عالى واعلى منك كمان............يوم ما هتتضايق منك هتلاقيها عند اهلها و لو اتضايقت منك اكتر هتقولك طلقني..........و يوم ما تحب تعمل زي افلام السبعينات وتعلقها زي البيت الوقف............هتخلعك بدعوى خلع سريع فى 3 شهور


يبقى مين متحكم في مين؟

وبعدين نيجي لنقطة ذكورية شوية

دلوئتى انا شاب فى مقتبل الحياة وعايز واحدة اتجوزها.......عايز اتجوزها لية؟

رقم واحد عشان احصان النفس وعشان الواحد ميبصش للحرام وميعملش حاجة حرام .............وسيبك من اللى يقولك انا عايز عقل مثقف اتكلم معاه..........ده هات له خوخة بتاعة ماما سوزان وقول له خليك فى المكتبة يا حبيبي.........سيبك من العالم المتخلفة اللى ممكن تهاجم الكلام ده ويقولك انتو مش بتدوروا غير على الجنس وبس...........اتكلم باعتبار ذاتك فقط وشوف انت يهمك اية واياكش الكون يولع من حواليك..........شوف انت محتاج اية وبس


انا عايز اتجوز واحدة برضة عشان نكافح مع بعض ونبدا طريقنا وحياتنا مع بعض.........مش عايز واحدة جاية على الجاهز.............تتعايش مع الكيتشن ماشين والمكنسة الكهرباء والحياة اللى هى مدفعتش فيها حاجة وجاية فيها على الجاهز............طيب مانا ممكن استني لغاية ما يبقى عندي 28 سنة واكون سافرت دولة عربية وعملت فلوس وجايب شقة كاملة وعربية فخمة وشالية مش عارف فين وادخل على الناس بفلوسي.............ساعتها لما هاخد واحدة هابقى عارف انى واخد خدامة انا شاريها بفلوسي............مش واخد زوجة مكافحة تقف معايا من اول السلم

طيب هافترض انى اشتريت كل العفش والحاجة اللى ابو الانسة اللى عايز يتطمن عليها كان عايزها............و بعدين اتجوزتها.............يضمن منين انى مش هابيع الحاجة دي تانى يوم او انى مش سالفها من حد وهارجعهاله لما اتجوز؟

اه............ورقة القايمة



اللعنة على القايمة وعلى الفلوس وعلى العالم المتخلفة اللى مش فاهمة حاجة وبيتداروا ورا شعار الاسلام وكله يقولك الاسلام الاسلام وهم مش عارفين عنه او عارفين وبيستعبطوا ومش بينفذوما منه اي حاجة


السيدة فاطمة بنت النبي محمد عليه الصلاة والسلام تزوجت على مرتبة حشوها ليف النخيل........وبمهر درهمين..........ومش عايز واحد جاهل يطلع يقول اصل ده اللى كان على ايامهم.........لا يا عم ده على ايامهم كان فيه حرير (وأصناف كمان سندس واستبرق امال جابوا اساميها منين) وكان فيه اجود المشروبات والمأكولات والعطورات وكل ما تتخيله الاعين والانفس) لكن الفكرة ان بجد كان فيه تطبيق للاسلام


فيه ناس كتيرة اوى اوى بتتشدق النهاردة بالاسلام...........ويقولك عايزين زوج يعامل بنتنا بالاسلام.............طيب عاملوه انتم بالاسلام قبل ما تطلبوا منه كدة...............قدموا السبت عشان تلاقوا اى حد

هو معنى الاسلام ان البنت منتقبة وانها مش بتسمع اغاني وان امها منتقبة هى كمان وان الاسرة كلها بتجتمع ادام قناة الناس؟

اية معنى الاسلام؟


انا وصلت للحل

الشيخ الحويني قال كلمة حلوة اوى

قال هى المرأة لما بتتطلق او يموت عنها زوجها....هل تسقط عنها صفة الانثى؟ المرأة تظل انثى.....لية نمنع عنها الزواج كمجتمع؟


انا بأة هاخبط راس المجتمع كله في الحيط...........مجتمع احمق فاشل غبي...........مجتمع منظرة وفشخرة ومناظر كدابة...............انا هاتجوز اى ارملة او مطلقة ولو عندها 40 سنة..........مسيار و زي الفل..............وهو هو الجواز العادي بس شقتها معاها وازورها وقت مانا عايز.........يعني لو طول الاسبوع زي الزواج العادي مفيش مشكلة..........ولو يومين فى الاسبوع برضة مفيش مشكلة

وخليهم قاعدين..............خلي الحال متنيل


انا كنت رايح الجوازة دي وانا بقول انى مش هاخد اى حاجة من ابوها...........انا هاشيل كل حاجة بنفسي............انا هاتجوز زي الاسلام ما قال...........يعني الرجل يجيب كل حاجة والعروسة تيجي زي ماهى ومش عايز حاجة من حد..........بس للاسف هم مش مقتنعين بالاسلام كله.......يجعلون الاسلام عضين............يعني خدوا الجزء اللى يخصهم بس بالنسبة للجزء اللى يخصك انت لازم تشيله...........يعني انت مش هتخلينا نشيل حاجة....اوكي وجزاك الله خيرا وبعدين تحول لحق مكتسب ليهم لانك رجل............لكن نقطة انهم يرضوا بالقليل ومايطمعوش...........ازااااااااااااااااااااى؟


اااااااااااااااااااااااااااااااااااااااااه يا ناس


الواحد هيتجنن


العالم دي حمقى؟

أغبياء؟


اية الغباء ده؟


انيس منصور عنده حق

وكل اللى بيقولوا سيبك من الجواز عندهم حق


على رأى الشيخ حسني في فيلم الكيت كات

بس سحبتها عشان عم عصفور ميزعلش

وعشان كدة غلط

والسلام