Saturday, July 28, 2007

رحلة صيد النورس

مبدئيا كدة...........قبل ما أى حد يقرأ البوست.........يفتح قائمة
tools
فى صفحة الانترنت اكسبلورر وبعدين يدوس على زووم ويعمل الزوم بتاع الصفحة 200% او 250 % عشان الصور اتحطا صغيرة اوى ومش على واقع حجمها...........عشان تحس الصور بألوانها الجميلة اعمل الزوم من فضلك
(:





الفترة اللى فاتت عدت عليا احداث كتيرة كتيرة

عدة رحلات صيد بحثا عن الوحش المفقود

عدة انترفيوهات

عدة صيد جديدة

يعني...........حاجات كتيرة اوى

قلت احكي منها دي



رحلة صيد النورس

كنا فى البحر............واقفين على مياة عمقها حوالى 15 متر او 20 متر.........بنطلع سمك الحفار والشخرم والنقط عشان ناخده صاحي ونروح المنطقة بتاعة القروش...........نطعم بسمكة صاحية ونرميها ونجيب عليها قرش...........و احنا واقفين برضة حصل نفس الموقف............فجأة المنطقة منعت والسمك بطل ياكل..............كله بدأ يستعد وانا طلعت الحداف بتاعى وشبطت سمكة نقطة صاحية (من ظهرها) فى سن كبير اوى ورميتها وسبتها تعوم................السمكة كانت على وش المياة ولقينا فوج طيور نورس بيهجم عليها واحد ورا التانى..........كل نورس يمسكها بمنقاره وبعدين يرميها تانى (عشان فيها السن) بس جت نورسة غبية شوية واخدت السمكة وبلعتها فى لحظة وبعدين لقيناها وقعت مقيدة على المياة..........مش عارف تطير..............رحنا ناحيتها بالمركب وطلعناها اللنش لقيناها بلعت السن بالسمكة والخيط جواها ولازم تندبح والا هتموت...........ادبح يا ملاح

اسيبكم مع الصور


بداية الرحلة..........جاء لمقابلتنا بعض الاصدقاء لتوديعنا.....فاكرين اننا هنطلع القرش بجد
(:










وصلنا البحر حوالى الساعة 3 ونص بالليل.........صحينا الملاح وانا جننته شوية وبعدين شربنا الشاى لغاية الفجر وصلينا الفجر على الشاطىء




صباح التفاؤل





الملاح عمل رابلة جديدة (يدوى) وانا بتفقدها قبل الرحلة..........جامدة يا ملاح






شروق الشمس............شوفوا الجمال






عندما لا تستطع التفرقة بين شروق الشمس وغروبها....بس ده شروق عشان محدش يتلخبط







الملاح بيجرب رابلته الجديد





صورة لجبال بورتريه واحنا طالعين من الشاطىء





لقطة طبيعية.........شروق الشمس وفايبر الصيد.........رحلة نحو المجهول





مبدئيا كدة...............سمكة كوشر مع ابن ريس المركب




عم سيد ريس المركب......وش مصرى اصيل




بدات العملية تشد والسمك الصغير بدا يمنع...........قلنا اكيد فيه حاجة كبيرة تحت........هاتوا سمكة صغيرة صاحية ونطعم بيها........هاتوا من الكيس ده........ايوة ده يا شريف






النورس الكميل اللى اكل السمكة الطعم من على وش المية





الملاح بعد ما دبح النورس.........حد يقدر يكلمني؟



وعلى فكرة بأة النورس ده طعمه جميل جدااااااااااااااااا.......لا تقوللى فراخ ولا حمام ولا بط ولا وز..........تخيل طائر بيطير 24 ساعة يبقى قوة اجنحته اية؟ وطعمها اية؟ بصراحة جميل جدا...........كفاية انه بيتغذى على السمك الطازج.......اللى عايز شوية نورس محمر يقوللى
(:


و هنا كنا حسينا بخبطة فى جانب المركب...........كله بدا يستعد وعلامات القلق على وجوه الرجال




دول بأة جيراننا فى البحر..........كنا عايزين نقرب ونقوللهم احدفوا لنا شوية ثلج عشان الثلج فى الايس بوكسات خلص




صورة لجبال بورترية والسخنة من البحر





دي صورة مركز حرس الحدود فى بورتريه






الملاح بيدي العبد لله كلمتين بعد ما سمكة كبيرة ضاعت منه..............ابقى ضيع زيها تانى يا فالح







بعد ما نزلنا من المركب..........بدء الاستعداد للرجوع.........العربيات دي تعبت معانا اوى يا اخواننا







على الطريق واحنا مروحين






حصيلتى الشخصية بس من غير ضحك........سامعكو










وكمان الملاح قسم كل السمك اللى اصطاده علينا ومرضيش ياخد ولا سمكة..........قسمها 6 اكوام على عدد افراد الرحلة وانا اخدت الكوم الصغير اللى على الشمال بس معاه الحريدة الكبيرة اللى فى النص دي
(:





تصبحوا على خير







وفى النهاية..............فيديو صيد النورس







والسلام

35 comments:

عصفور المدينة said...

صباح السعادة والله ياأحمد صاحي وباجي كل يوم يمكن
كل ما آجي ألاقيك مودع مش هنا
وحشتني أنت مين في الصور بقة

عصفور المدينة said...

تاني زيارة ماهو لازم أمضي حضور وانصراف نحن الآن بعد الفجر
وأؤكد أن وضع الصور أفضل من الفيديو مع أن الفيديو أمتع

Islamist Bloke said...

عم عصفور

يا عم عصفور انت مغرقنى بكرمك..........مش عارف اقولك اية..........اسف جدا انى مش بدخل المدونة لكن انا كنت فى رحلات بحرية كتير للبحث عن القرش..........لقيت كل انواع السمك ما عدا القرش
(:
والحمد لله يعني

انا اللى رافع ايدي بعلامة النصر فى اول الرحلة قبل الشروق.......و انا اللى قاعد تحت فى اول صورتين ترحيب-طبعا الملابس مختلفة لاننا على المركب بنلبس هدوم زي الصنايعية عشان هنمسح فيها زفارة السمك لما تخلصه من السن وزفارة الجمبرى اللى بتطعم بيه وممكن تشبك فيها سنون لحين ما تستخدمها..........هدوم مرمطة يعني

انت واحشني اكتر يا عم عصفور.........عايز اشوفك

والسلام

Islamist Bloke said...

عم عصفور تانى زيارة

منورنا يا عم عصفور

تمام......الامضاء تمام فى الدفتر........بس النسر طاير منه جناح
(:

الصور انا غلطت فيها فى حاجة واحدة..........كان لازم احطها كبيرة..........انما اتحطت بحجم وسط ومش باينة حلاوتها ولا الوانها..........صورة الشروق اللى متعرفش هو شروق واللا غروب دي........دي صورة مشكلة وانا حبيتها اوى اوى

اما الفيديو............النورس ده سكر.........وديع اوى وجميل خالص.......كان صعبان عليا اوى

هاه مقلتليش..........اعمل حسابك فى الرحلة الجاية؟

بحبك يا عم عصفور

والسلام

smraa alnil said...

هههههههههههههه

انت يا ابني مش بتحرم
انت شكلك كدة مش هتبطل الا لما تاخد حاجة من دي
سمكة في وشك مثلا

نورس يقرمك

بقولك مش تيجي تعمل فيا ثواب واتنكر واعمل نفسي راجل واجي معاكو

وهديك نص السمك اللي هصطاده

:))

Anonymous said...

سمراء النيل

عمرى ما هحرم ولا هبطل الادمان ده.............اهو ده الادمان الوحيد اللى لو المدمن حاول يبطله مبيعرفش وبيرجع له حتى لو انقطع عنه


تتنكرى وتيجي معانا واخد نص السمك؟
:()


طيب ما تجيبي الزوج الكريم والاسرة الكريمة وتيجوا رحلة كاملة وتاخدوا كل السمك
(:

الرحلة بسيطة ومريحة ومش مكلفة.........اليخت الكبير ب 500 الى 700 جنيه فى النهار والمركب بتاعة رحلة النورس دي كلفتنا 220 جنيه بس

فكرى ولو عايزة رحلة بجد ......اكلم لك الملاح واحجز لكم رحلة.....وهتكونوا مستريحين جدا ومفيش اى قلق او مشاكل باذن الله

نفسي كل الناس تجرب الرحلات البحرية دي .....هيحبوها اوى اوى

النورس قرم الملاح ....مقرمنيش انا.......ده لو فكر يقرمني كنت عملته طعم للقرش
(:


تشريفك نوٌر المدونة

والسلام

عصفور المدينة said...
This comment has been removed by a blog administrator.
أميرة said...

على فكرة الصور ظاهرة عندى كبيرة وكويسة جدا ومن غير اى زوم

كل رحلة وانت طيب

بس مش المفروض الكوم الكبير بتاعك دة يتوزع علينا سمكة سمكة والا هتاكل فى عنينا يعنى :D

Islamist Bloke said...

عم عصفور

والله والله والله

كأنى كنت شايفها فى حلم

بجد ومن غير مجاملات..........كأنى شفتك قبل كدة..........نفس الصورة اللى كنت راسمها لك فى دماغي بالظبط

سبحان الله

عارف يا عم عصفور.....ساعات بيحصل معايا حاجات زي كدة

ابقى بتكلم مع حد معرفة.........واحس كان الموقف ده حصل قبل كدة.............بكل تفاصيله...........واقول له يا عم انت مش قلت لى الكلام ده قبل كدة؟ طيب بالامارة انت عايز تقول كذا وكذا

الموضوع ده وصل اقصى مراحله فى الايام اللى بقرأ فيها قرآن كتير

دلوئتى مفيش طبعا وحاسس كأنى تايه ومتوول عشان تقريبا مفيش قرآن او قليل جدا

ربنا يهدينا ويعيدنا للايمان والاسلام

جزاك الله خيرا يا عم عصفور

بجد فرحتني اوى بالرؤية السعيدة دي

والسلام

Islamist Bloke said...

أميرة ويلز

اتاكلوا فى يومها يا فندم
(:

شكرا على ملاحظة الصور........كنت قلقان جدا بشأنها بجد

شفتى فيلم القرش؟ اوعى يفوتك
;)

والسلام

عصفور المدينة said...

جبت التراب وجيت لك
دلفري
خذ..........
...................
..................
أحمد فعلا انت محتاج شوية استقرار وسكينة

سندباد said...

جميلة الصور

محمد said...
This comment has been removed by a blog administrator.
Dental said...

رحلة حلوة مشوقة :)

شكرا لزيارتي MY POST

و لأي سوسه ما تتردد و تزورني

انت بتصطاد سمك و انا باصطاد سوس :)

Islamist Bloke said...

عم عصفور

أى..........أى......خلاص


ههههههههههههه

بحبك يا عم عصفور


فعلا انا محتاج راحة نفسية وهدوء شوية.......محتاج اتجوز

يارب انا عايز اتجوز.....صعبة دي؟.....عايز اشتغل شغلانة بسيطة اجيب منها مرتب بسيط واتجوز بأة.....يارب مش هزعلها ولا هجننها ولا هغيظها ولا هاعمل فيها اى حركات سخيفة.......بس اتجوز و ابقى كويس وهالتزم اكتر وابقى كويس

ياااااااااااااااااارب

Islamist Bloke said...

sendbad

شكرا يا سندباد

Islamist Bloke said...

الشاب المثلي

لا أرحب بك هنا فى مدونتي.....رجاء عدم الزيارة أو التعليق هنا مرة أخرى

Islamist Bloke said...

dental

عايزك تبقى تشوف فيديو الرحلة اللى قبلها.....اجمل بكتيييييييييير....بس لو مبتخافش من افلام الرعب
;)

العفو يا عم.....التدوين علينا حق
(:


منور مدونتي يا أخي.........و ندعو الله ان يزيد الود والمعروف

والسلام

emos said...

eh ya islamist enta lameet shewayet el samak elly wa23een 3ala el shat walla eh?
tela2eek kont bet7'ansar men kol wa7ed samakteen walla 7aga
w ba3deen te2ool noras kameel w ba3d keda tedba7o
howa 2ay 7ad kameel 3andak betedba7o walla eh?
rabena yostor

واحدة مفروسة said...

أول زيارة للبلوج بتاعتك
بلوج هايلة

بجد الصيد ده حاجة ممتعة جدا برغم انى ما عملتش رحلة صيد قبل كده
ولا حتى بفهم فى أنواع السمك غير اللى باكله
بصراحة فتحت نفسى

اتمنى تكون استمتعت بوقتك
بس صعب عليا النورس اللى اندبح
الصور حلوة جدا وحجمها كويس من غير زووم
منظر الشروق الصورتين أحلى من بعض
والجبال تحفة

والفيديو بجد حلو اوى

مبروك الحصيلة الجامدة دى

تحياتى
سلام

Anonymous said...

emos

la2 ya setty 2na lammet el samak elly kan fe el ba7r
(:

2na mesh 2olt balash tarya2a?

ليكي يوم يا ايمو


وبعدين النورس كان لازم ندبحه......يا بنتي ده بلع السمكة بالسن ولازم يندبح........وبعدين حتى لو مكانش بلع السمكة كنا برضة كدة كدة هندبحه...........ده صيدة يا بنتي وانتى متعرفيش طعم النورس ده جميل أد اية

الفكرة فى الموضوع ان مفيش حد فى الدنيا بيعرف يصطاد نورس أبدا.....هتصطاده ازاى؟

مش هينفع تعمل له كمين بشبكة.......مش بياكل غير السمك

ولو ضربته بالنار.....شوف فين وفين على ما تعرف تنشن عليه وهيقع متفرتك.....انما احنا جبناه صاحي وسليم وزي الفل

موضوع اى حد كميل بادبحه.......احيانا مش دايما
(:

والسلام

Anonymous said...

واحدة مفروسة

ازيك يا دكتورة

والله يا دكتورة انا كنت قلت انك خلاص هجرتي عالم المدونات ومش داخلة نت تانى

اصلى كل يوم بادخل عندك البلوج ومش بلاقى اي ردود جديدة منك......احترت جدا..........كويس انك رجعتي

الحمد لله على سلامتك

لو جربتي الصيد والبحر مش هتسيبيه أبدا

بالنسبة للسمك والحصيلة.........المرة الجاية باذن الله تكون اكتر واسماك من احجام اكبر

شكرا لمرورك

والسلام

بيتنا القديم said...

احمدوف
......
يا صديقي العزيز
من فرط استغراقي مع حكيك وتشويقك ومتعة وصفك...تخيلت ان مزاملك في هذوها الرحلة
بس دي اول مرة اعرف ان النورس بيتاكل
خلي بالك من نفسك خصوصاً وانت علي عمق 20 او 30 متر
احسن صورة بتاعة الصلاة علي الشط
ربنا يوفقك يا برنس
ويجعلو عاااااااااااااااااااااامر

بهلوله said...

عملت الزووم وشفت حتى نمر العربيه
رحله موفقه
معاكش حته سمكه ولا حتى شوكه وفيها حته لحم
علشان انا بحب السمك اوى اوى

Islamist Bloke said...

سمسم

المرة الجاية اجيب لك ورك نورس محمر معايا عشان تذوقه..........سكر يا سمسم سكر

موضوع الأعماق.............لا تقلق يا صديقي العزيز

على فكرة يا سمسم انا مبعرفش اعوم..........و اول ما اطلع على المركب كل مرة باقول لكل الناس بصوت عالى وواضح : يا جماعة انتبهوا معايا : انا مبعرفش اعوم بجد....لو وقعت فى المية لاى ظرف بأى صورة فى أى لحظة كله يجرى يلحقني بسرعة لانى مش بهزر ومش بختبركم ومش بعرف اعوم..........هانزل تحت زي شوال البطاطس ومش هتلحقوني الا لو اتصرفتم بسرعة.........دي مش تجربة ولا انذار كاذب...دي حقيقة وبجد
(:

صورة الصلاة على الشاطىء : انا مستغرب ازاى محدش قال لى مين صورها او صورتوها ازاى؟.....اللى صورها عم ابو فادي.....كان معانا فى الرحلة........وكنا عمالين قبلها نتكلم عن الاحراج اللى ممكن يحصل لواحد مسيحي لو اشتغل فى مكان كله مسلمين عشان وقت الصلاة........قاللى وهو بيضحك: هاقعد احرس العدة

واحنا بنصلى...........صورنا..........بعد الصلاة ورانى الصورة وقال : هاه....شفت بأة ان ليا فايدة
(:

صباحو ابيض يا سمسم

والسلام

Islamist Bloke said...

بهلولة

مفيش والله يا بهلولة...........لا سمكة ولا شوكة ولا راسها حتى...........ده اتنسف فى يومها............الاهل ما سابوش فرصة لسمكة تفلفص

الحمد لله عملنا الشخرم (اللى فى الصينية مرصوص جنب بعضه) مقلي ن وعملنا الحريدة الكبيرة (كان فيها حوالى كيلو) في صينية بالطحينة ، وعملنا الباغة واللاشيتا فى صينية بالخضار...........وباقى الجمبرى اللى كان معايا عملناه فى الرز بالجمبرى.......و شوية سلطة وفاكهة كدة على ما قسم وربنا يرزق

اللى كان جميل فى الموضوع.........السمك كان مزفلط وبيلعب واحنا بننضفه..........و اكلناه طازة...........هو ده احلى حاجة فيه

الرحلة القادمة احفظ لك شوية سمك باذن الله

والسلام

الزهراء said...

:)

حمدلله علي السلامة

بس انا كنت عايزة اسأل سؤال...ازاي صرتوا الفديو بتاع الفك المفترس ؟
:D

حضرتك بجد بتصور صور حلوة اوي خصوصا صور الغروب والشروق دول صورتين حلوين اوىىى:)


انا جيت هنا امبارح تقريبا
بس كنت مطبقة وكدا
مش عرفت ارد
:(


بس انا جيت اهو :)


وشكراا للزيارة :)

Jana said...

بصراحة كنت سيئة النية
وقلت ده مين اللى طلع من صلاة الجماعة
عشان ياخد صورة
بس فهمت خلاص من ردك على سمسم
فعلا صورة الصلاة على الشاطىء احلى صورة بلا منازع
تليها صورة الشروق
ثم صورة السمكة ال.... مش فاكرة اسمها
اللى كانت مع ابن ريس المركب
بصراحة حرام تتاكل

واعذرنى مشفتش فيديو النورس
عشان فهمت من التعليقات انه فيديو دبح النورس مش صيد النورس
يا شرير

تحياتى
وكل صورة لوحدها بورتريه
مش الجبال بس

Anonymous said...

الزهراء


الله يسلمك
(:

فيديو الفك المفترس............عادي........المعركة كانت حوالى ساعة وربع..........فى وسط المعركة لقينا واحد صاحبنا ساب الحبل وقال لنا عايز اصور.........جرى جاب الموبايل ووقف على حاجز المركب ومسك حبل كبير بايده الشمال وصور بايده اليمين عشان كدة كان التصوير من فوق

اما صور الشروق.............هى جميلة جدا والاجمل لو كانت فى حجمها الطبيعي ...........هى كدة مش واحد على عشرة من جمالها الحقيقي
:(

تنوريني فى اى وقت

اتمنى المدونة تعجبك

والسلام

Anonymous said...

jana

ولا يهمك..........انا برضة توقعت ان حد يتسائل مين اللى صور الصلاة......وقلت اوضح مقدما

اشكرك على الاطراء على الصور.........بس الوش المصرى بتاع ريس المركب ميستحقش جايزة؟
(:

فيديو النورس مش فيه مناظر صعبة.............بالعكس ده بعيد كل البعد عن الدم والعنف وكدة...........مش هتشوفيه وهو بيندبح يعني.........او شوفى لغاية ما طلعناه من المياة وقرم الملاح فى ايده
(:

بالنسبة لكلمة بورتريه
المنطقة اللى المركب طلعت منها اسمها بورتريه والجبال اللى وراها اسمها جبال بورتريه
(:
انا مش قصدي ان دي صورة بورتريه للجبال
(:
لأ انا قصدي ان دي صورة جبال بورتريه يعني جبال منطقة بورتريه
(:

تحياتي

والسلام

الباحث عن الحقيقة said...

الصور مأخوذه بحرفيه عاليه

Anonymous said...

الباحث عن الحقيقة

شكرا للاطراء

Anonymous said...

واضح انها كانت رحلة ممتعة بارك الله لك فيها و اسعدك كمان و كمان و بالرغم من انى هاموووت و اعرف المكان دة اللا انها فرصة جيدة ليك ولاصحابك للتأمل فى خلق الله و على فكرة هوايتك دى غريبة شوية انا اول مرة اسمع عن النوع دة من الصيد بس فعلا نوع جميل اهو برضة يعتبر مائدة رحمن للسمك....

Islamist Bloke said...

jessy88

جزاك الله خيرا..........المكان هو السخنة.....بورتريه..........بعد كارتة السخنة بحوالى 30 كم

فعلا كانت رحلة جميلة.........وباذن الله..... القادم اجمل

والسلام

رفقة عمر said...

اولا انا متاغظه من كل السمك دة انا بحب لسمك جدا
وكمان يابختك على الرحله الجميله دى
ماشاء الله