Saturday, March 24, 2007

رحلة صيد بحرية

امبارح كنت فى أول رحلة صيد بحرية اطلعها فى حياتي

عايز احكيها لكم من الاول خالص

الموضوع بدأ بدعوة من هشام مبارك احد اعضاء منتدى نادى صيد الأسماك للقيام برحلة بحرية من العين السخنة ناخد فيها مركب ونطلع نصطاد من اول الفجر لغاية المغرب كدة وتكلفتها بسيطة جدا قلنا اوكي والناس اتلمت بكثافة لغاية ما ما العدد وصل 3 مراكب ولله الحمد

اتفقنا نقطة التجمع امام بنزينة وطنية اول طريق القطامية - السخنة واتجمعنا فعلا وبصراحة انا حظي فى رفقى الرحلة كان جامد جدا لانى وقعت فى ناس زي السكر وبجد اعتبرهم من احسن الناس اللى اتعرفت عليهم فى حياتي
طلعنا بالعربيات ووصلنا هناك واستريحنا وية وصلينا الفجر والتصاريح طلعت وقبل ما نركب المراكب كان سطح البحر عامل زي الورقة المفرودة...مفيش اى نسمة هوا اصلا عان تقدر تقول كلمة موج

قبل ما نطلع بشوية كان معانا احد اعضاء الشلة فى الرحلة-اسمه محمد و اول مرة اتعرف عليه - الرجل شاف على الويب من الموبايل ان سرعة الرياح فى الغردقة 40 كم فى الساعة ..معنى كدة ان البحر هايج بطريقة غبية وان الموج ممكن يشيل مركب ويرزعها فى قعر البحر اساسا...المهم فضلنا نتريأ وهو يقول انا مالى ...شوفوا ال ياهوو واحنا نضحك ونقول يا عم انت بتصدق..وانا قلت له خد مني دي: السيف أصدق أنباء من الكتب .. فى حده الحد بين الجد واللعب والكلام ده واحنا شايفين بعنينا وكدة

قبل ما نركب لقينا واحد وزع علينا أقراص دواء مضاد لدوار البحر وبرضة ضحكنا وانا اتنططت وقلت لهم انا وحش المحيط..انا لو ربطتوني فى سارية شراع مركب مش هادوخ والكلام ده

ركبنا المركب وطلعنا..مرت بالظبط خمس دقايق ولقينا الموج بدأ يخبط فى جنب المركب...وانا بعدها بدقيقتين كنت اول واحد اقول اوووووووووووووووووووووووع و هات يا ترجيع...الدوا ما اشتغلش لانه كان لازم قبلها بساعتين مثلا..وكمان كان لازم اخد كبسولتين عشان لسة جديد وانا واخد كبسولة واحدة...وكمان المركب ضعيفة اساسا ولاول مرة اعرف مدى صدق تشبيه - كريشة فى مهب الريح- والاقى مركب بجد بتطير فى الهوا...انا اصبت بحالة اعياء جامدة جدا وبقيت مش قادر اقف اصلا فنمت فى قاع المركب والناس اللى معايا واحد بس رجع - اللى هو شاف الويب كاست - والتانى داخ وكان عايز يرجع بس مرجعش والباقيين بيقولوا ما حسوش بحاجة عشان بيطلعوا على يخوت كتير بس انا حسيت انهم تعبوا ومش عايزين يوهمونا

دقيقتين كمان والرجل البحار قال هنتحرك بيكم لمنطقة اخف شوية فى الموج - مكنونة فى الخليج فى بطن الجبل شوية- واتحرك بس انا خلاص كنت جثة هامدة و رجعت اكتر من 20 مرة لغاية ما طلعت عصارة المعدة اساسا-مقرف اوى مش كدة- بس مش بأمرى وبعدين احساس الترجيع ده مؤلم جدا...بتحس ان بطنك بتتقلص والمعدة تنتفض وحاجة صعبة جدا... المهم كان فيه حمام فى المركب ومش له باب انما ستارة كدة قوية بتتفرد ما تتحركش وانا نايم على بابه برجع شوية و لقيت الاخ التانى اللى بيرجع دخل الحمام وهات يا بوم وطاخ وكدة ..اسهال بأة.. وانا نايم فى حالة اعياء ومش بصطاد ومنهار وكمان لقيت كام نقطة مية نزلوا على وشى...قلت باعياء: هى ناقصة؟ حرام كدة..وانا فاكر ان المية من تلاعب الموج وخبط الموج فى المركب لقيت اللى فى الحمام بيقوللى اسف يا احمد!! صعقت...اتارى المية من جوة الحمام ومحدش يسأل كان نوعها اية!!!

شوية لقينا المراكب كلها رجعت -كنا 3 مراكب- والناس اتصلوا بينا وقالوا لنا ارجعوا الشاطىء ده فيه نوة داخلة والبحر هيبقى غبى-اعتقد انتو شفتو القاهرة امبارح الجمعة كانت عاملة ازاى- ما بالكم بالبحر فى العين السخنة والزعفرانة عامل ازاى وادامك البحر مفتوح ووراك جبال بترمي تراب ورمل بسرعة رهيبة فى قفاك لو واقف على الشاطىء..يعني صباح الخنقة

المركب رجعت الشاطىء وما كانش فيه مارينا فكنا بننط من فوق المركب - ارتفاعها متر ونص مثلا-فى المية ارتفاع 20 سم مثلا - اول ما الناس بداوا ينطوا وانا حبكت عليا ترجيع وبجد مش قادر فبدأت ارجع والبحار بيقوللى نط بسرعة يا شيخ المركب هتشحط ولازم الف تانى - وانا مش عارف ارد عليه وشغال اوع اوع فما كان منه الا انه لف تانى والناس كلها نطت وانا اللى كنت عايز ارجع بقيت لوحدي عالمركب والبحار هيركنها على بعد 20 متر من الشاطىء يعني رايح وسط المية تانى!! المهم الرجل لف لفة ورجع تانى وانا نطيت والحمد لله خلص الموضوع

حاسبنا بحارة المراكب والناس كلها مشيت ما عدا شلتنا -4 افراد- وقلنا حرام نضيع اليوم ف قلنا نطلع فى اتجاه الزعفرانة ندخل مارينا يخوت اسمها مارينا وادي الدوم عاملين فيها مارينا بحرية داخلة جوة البحر مسافة كبيرة وفيها سمك حلو اوى اوى تصطاده من على الشاطىء وواحد اصطاد منها سمكة جرم بياض 25 كيلو من الشاطىء من اسبوعين- دي معجزة اساسا انك تصطاد من الشاطىء سمكة بالحجم ده..انت اخر حاجة ممكن تطلعها فى حكايات الصيادين 5 و 6 كجم

المهم رحنا المارينا ودخلنا ومش محتاج اقولكم انى ماشى بعمل زي البندول من الدوار بس بدأت احس بتحسن لما شفت المية-المية شفافة جدا وشايف السمك بيتحرك تحتك وما شاء الله اسماك من كل نوع واللى مخططة ذهبي فى اسود واللى فضى واللى احمر واللى اصفر واللى بمبى وحاجة جميلة جدا ما بنشوفهاش فى النيل أبدا- و بعدين طلعنا العدة وكل واحد فرد سنارته و سمينا بالله ورمينا...الاول اشتغلنا ب طعم جمبرى...ترمى الجمبرياية فى المية من هنا...عينك ما تشوف الا النور..سرب سمك ييجي 200 سمكة يهجم على الطعم -والجمبرى طرى اصلا ومش ثابت فى السنارة فمحتاج احتراف عالى انك تضرب على السمكة من اول نقرة عشان السن يشبك فيها مش تاكل منك الطعم وتجرى..واخوكم متعود على صيد النيل اللى الدودة فيه ملفوفة على السن لفة بغراء عمرها ما تقع ...دانا كنت بنزل الدودة نفسها ل 8 سمكات وممكن 10 سمكات بنفس الدودة

المهم طلعت سمكة واحدة وبعدين حصلت حاجة غريبة...من الساعة 2 الظهر كدة والسمك ترمي له الطعم يقرب عليه شوية يشمه او يلف حواليه - وانا شايف السمك اصلا- وبعدين يسيبه ويروح يلعب بعيد او يطلع على وش المية يبص لى وينزل تانى..انا قلت هم فهموا الحوار اكيد وقالوا لبعض دي اشتغالة يا شباب..فيه ابن ادم فوق وبيضحك علينا وعايز يصطادنا...نفضوله

طبعا كنت تعبان من البحر والرحلة واصلا انا صاحى من قبلها بيوم يعني تقريبا داخل على 35 ساعة ما نمتش...قمت مددت على صخرة فى الظل و حواليها كام صخرة كبار حاجزين الشمس عنها و الموج بيضرب فيها تحتي ورذاذ الموج بييجي عليا .وما تسألونيش ازاى نمت..نمت وما حسيتش بالدنيا ووصيت صحابى لو وقعت فى المية يطلعوني عشان مبعرفش اعوم والمية تحتى عمقها كبير!!

ساعتين وصحيت فايق غسلت وشى بمية البحر وقمت رحت الحمام بتاع المارينا واتوضيت و رجعت تانى اكلت شوية وشربت عصير وزجاجة ميراندا لتر - البحر بيجوع جدا -وبعدين الشباب فضلوا يصطادوا شوية وبعدين صلينا كلنا قصر وركبنا العربية وروحنا

بجد كان يوم زي العسل وفعلا احسن حاجة فيها الصحبة...ونصيحة لاى حد طالع رحلة من اى نوع اختار الصحبة قبل كل شىء لان الصحبة هى الاساس...لو صحبة حلوة هتضحك وتنبسط ومش هتشيل هم ومش هتحس باحراج او سخافة...لو صحبة زبالة يبقى هتبقى رحلة نكد وغم لان حتى لو ضحكوا معاك ممكن يبقى فيه واحد بيعمل ناصح او واحد كشر او واحد مش اجتماعى ويسيبك تتكلم او يقولك بعد اذنك عايز اقعد فى مكان لوحدي وكدة

بجد الصحبة المرة دي كانت عسل اوى

ولو فيه حد رايح رحلة بحرية انصحه اول حاجة يسأل عن حالة الطقس وياخد معاه حبوب دوار البحر لان دي اهم حاجة فى الرحلة-صدقنى اهم من السنارة نفسها!!

كانت هذه آخر التطورات من مينائى السخنة-الزعفرانة

مراسلكم أحمد أبو العافية
شبكة الأخبار البلوجرية
قطاع التهييس

9 comments:

محمود سعيد said...

ايميلى والماسنجر بتوعى فى البروفايل

ضيفنى
من زمان عمال أقول لك ضيفنى

:-)

خالد وليس بخالد said...

تستاهل يا خفيف

ماله الصيد من الترعة؟؟؟
ع الاقل البلهارسيا مقدور عليها
انما البحر دا قرش وحاجات كده

Islamist Bloke said...

يا محمود دانا بكسل اعمل لوج ان وبكتب فى خانة other

عموما يا عم ماتزعلش ده انا اللى ليا الشرف انك تكون عندي

وهاتصل بيك قريبا



خالد

ماهو الصيد فى النيل والترعة ما بيطلعش سمك يا حاج خالد...انما البحر بتطلع منه اسماك يصل حجم السمكة الواحدة 80 كجم....لكن النيل اخر حجم طلعته قد الاصبع يا عم
ويجعله عامر

همستى said...

السلام عليكم
جزاكم الله خيرا على الموضوع الشيق الذى افدتنى به انا والذى سوف انشره لك باذن الله على المدونة زلكن بعد أن اجمع بعض الموضوعات واختار منها الموانع المشتركة
أحب اقولك انا انا نزلت استبيان على المدونة واتمنى انك تدخل وتحلة وتبعته لى
وأولا واخرا أحب اقول لك
جزاكم الله خيرا
وانى أحبك فى الله

emos said...

وانت لسة هتنصح اللى هيروح رحلة بحرية مش عارف يعمل اية
دة انا بعد القصة العظيمة دى عمرى ما هروح رحلة بحرية ابدا
ترجيع و معلش يا احمد و حجات كدة مش لطيفة خالص
تبقى تروح سوق الخضار اسهل
و خد معاك صحبة كويسة برضو

Islamist Bloke said...

أحمد سعيد

وراك يا ريس

سمسم said...

عزيزي أحمد السمكاوي
******************
اليك موسوعة الصنارة في الصيد بمهارة
شوف بقا ياعم انا لفيت لك بحري وقبلي
وجبتلك معلومات أعتقد إنها هتعجبك
ولله في لله مش عاوز عزومة علي وجبة سمك
انا مش إنتهازي يا هرم

نبدأ بأفضل اماكن الصيد
ـــــــــــــــــــــــ
أنا بقى أعرف حتة مكان تحفة(قال يعني رحتو)...المكان اللي جنب الحتة اللي غنت فيها الأخت ليلي بنت الحاج مراد بين شطين وميه عشئتهم عنيا، الغنوة اللي سرقها محمد قنديل...وهذا بدوره جنب المكان اللي غنا فيه محمد قنديل في فيلم شاطيء الغرام يا ساكني مطروح... اللي سرقتها ليلي مراد

بص ياسيدي
انت روح عند جزيرة ميامي..وتسأل عن صياد اسة التُربي...الصياد دة عندة لانش

حاتأجر انت وكمان 11 فرد اللانش( اللانش يسع ل12فرد) وتدفع 10 جنية بس
ودة من الساعة 8 الصبح لحد الساعة 4 العصر....( لو بيجيلك دوار البحر خد معاك ليمون أو من أي صيدلية قول له عاوز دواء دوار البحر يا معلم)
ولما تطلع رحلة الصيد دي قل له عاوز أروح أرض الشراغيش ودي مكانها قدام قصر المنتزة ب 5 كيلو جوه البحر..

وفيه أرض الظبان (ودي قدام برج إذاعة الأسكندرية بجوالي 9 كيلو جوة البحر) ودي فيها موزة ومكرونة ودراك وكبريت و جرجار وبلميطة وشخورة(ماتستغربش اسمه قبيح شوية بس ده مش ذنبو ربنا خلؤه كده) وماتنساش تدعيلي لانك من أرض الظبان دي لو حاتقعد ساعة زمن حاتطلع ب حوالي 3 كيلو سمك(سيدي يا سيدي)

وفيه كمان يا عم أرض المياس والدنيس ودي قدام السلسة بحوالي 5كيلومتر جوة البحر وممكن فيه تطلع سافوليا او سمكة موسى بس ماتنساش تبقى تحط سن فيه طعم تحت الرصاصة(فينك يا مولاتي تشوفيني وانا موسوعة كده...حاجة تشرح القلب)

ودي اسمها رحلة تسقيط... علشان انت بتسقط (التسقيط هو بداية النوم...زي اللي حصلك يا حاج أحمد) اللنسة تحت المركب في حدود من 30 الى 60 متر تحت سطح البحر

ويستحسن انه يكون معاك ماكينة صيد قوية وسريعة وأفضل نوع طبعا هيه الماكينة ميتشل الالماني...وخد معاك وجبة سمك جاهزة من عند قدورة عشان تهيج السمك لما يشوفو إخواتهم بيتكلو
وتنطلق المقاومة وتحتتدم المواجهة ويغرق المركب باللي فيه

ثانياًالصيد فى النيل
ــــــــــــــــــ
هذا شيء بعزه...بعض انواع السمك الموجودة هناك لانى طبعا معرفهاش كلها نبدأ بالاكثر شهرة
البلطى طبعا
أميرة البلطجية
القرموط
الكوكو الكميل
الكركور
كلبوزة لكن سمباتيك
الشال
محمد عبد الغفار
البياض ( العبيد)
الراقص مع الذئاب
الشلب
يا مراكبي
الانوم ( المز)
الرعاد ( الرعاش )
الدقماق ( دكر العبيد ) ودة بيوصل لاحجام رهيبه حوالى 80كيلو جرام وفى اكبر
يعني هنبدع يا ولدي إبسط يا عم

معدات الصيد
ــــــــــ
تكتب وصيتك الأول وتحطها في زجاجه...وطبعا معدات الصيد متختلفش عن الصيد فى اى مكان الا ان القصبات ( البوص ) 90% منه لازم يكون مكن وانواع نضيفه جدا لتتحمل الاحجام الكبيرة
اما القصبات اللى من غير مكن قليله جدا وتستخدم غالبا لصيد البلطى

انواع الطعم
ـــــــــــ
تذكر الطعم للصيد مش للأكل..لا يوجد فى الصعيد طبعا الجمبرى ولا الدود الاسمعلاوى ولا الدود القراص ولكن الموجود هو
دود الارض – العجينه - الغله – العنب - مصارين الفراخ – وبعض المحارات اللى بتكون موجودة على شاطئ النيل – والسمك ( بعض الانواع تستعمل طعم )
طرق الصيد والطعم المفضل لكل نوع من السمك بالترتيب

البلطي
ــــــ
مشوي ومقلي وبطحينة...بما ان البلطى فى الصعيد احجامه معقوله شويه فالسن المستخدم له بيكون ما بين ( 9 و 6) وطبعا بيقبل على اى نوع من الطعم ( دود الارض - العجينه – الغله ) وطبعا المكة بتكون بجانب الشط او بين الحشيش ونادرا ما بتكون فى عمق النيل

القرموط
ـــــــ
الله يقرفوه...طبعا دى اكتر سمكه بتاكل اى حاجة موجودة فى الميه ودى حكمه من ربنا لانه بتعمل على تنظيف المياه من اغلب القازورات يعنى فار ميت فرخه ميته سمك ميت اى حاجة معفنة(يع حاجة تقرف بصحيح)وخلاص من الاخر دى عامله زى القشاش بتاكل اى حاجة فى سكتها وبتيجى بأى طعم واى حجم سن الا انها ممكن تاكل كمان العنب والاحجام الكبيرة منها ممكن نحطلها الطعم عبارة عن فرخه ميته من عشر أيام...وفى ناس بتعملها عجينه بس يتخلى العجينه تتعفن علشان يكون لها رائحه نفازة ومعفنة أيضاً تجزب القرموط المعفن وممكن تضيف لها روائح معفنة من عند العطار المعفن اسمها ( الحنتيت ) المعفن

الكركور
ـــــــ
نياهاااااا كركركركر...طبعاً الكركور (اسمه ما لهوش دعوة انه بيكركر من الضحك ولا سحب الشيشة)هو صغير الشال وسمى بهذا الاسم لانه بيطلع صوت اشبه بالكركرة وهو طالع من الميه وده بياكل دود ونادرا لما بيجى بالغله او بأى شئ تانى

الشال
ـــــ
إبسط يا عم ده سمك بيدعم المحجبات ويدعو الي إشاعة العفة في المجتمع..هو اكبر طبعا من الكركور ومبيكركرش بس نفس الشبه وبيكون له 3 شوكات اتنين فى الجنبين وواحدة فى الظهر وبيكونو جمدين جدا ومدببين الاطراف واحد اجناب الشوكه مسنن اشبه ما يكون بالمنشاروتكون حادة جدا ودة منه نوعين
الشال العادى وبيكون الظهر رمادى فاتح والبطن بيضاء جدا(مستحمي كويس يعني)
والنوع الثانى بيسموه شال الحجر ودة لانه بيعيش بين الاحجار ولون ظهرة بيكون رمادى غامق جدا والنوع دة لازم تاخد بالك منه لانه لو كل الطعم ودخل الحجر يبقى عوضك على الله فى القرمه كلها لانه بيفرد الشوكتين اللى فى الجنبين ويصدرهم فى الحجر ومن المستحيل انه يطلع بعدها لانى بحس ان الشوكتين دول متركبين على مفصلات جامدة جدا لو طلعته فى ايدك وحولت انك تتنى الشوكة للجنب مستحيل لأن دماغه جزمة قوي ودة بيفضل دود الارض كباقى الاسماك ومكان وجودة قرب القاع وخاصه الاماكن اللى بيكون فيها حجارة

البياض ( العبيد)
ــــــــــــــــ
سمكة المطحونيين ...ودى سمكه قريبه الشبه بالقرموط بس مش معفنة زيوه والطعم المفضل ليها طبعا دود الارض وقطع السمك والحم اللى بيكون داخل المحارات اللى موجودة على ضفه النيل

الشلب
ـــــ
مش الشنب...الشلبايه كما يطلقون عليهادى سمكة شكلها رقيق جدا ونادرا لما بتطلع فى السنارة لان ليها طريقه مخصوصه بيها لانها بتتغزى على الحشرات فهى بتاكل قرب سطح الميه وممكن تاكل دود الارض وغالبا بتكون كلت الطعم اثناء مهو نازل يعنى ميكنش لحق ينزل وبتلاقى السنارة جريت منك مع التيار بسرعه بتعرف ان دى شلبايه وطعمها جميل جدا(وعدي يا وعدي)

الانوم (المز)
ـــــــــــ
إسمها يخلي الواحد ينام...انا شخصيا بحب السمكه دى جدا مع إني مكلتهاش قبل كده نظرا لشكلها الغريب مواصفات السمكة انها جسمها ناعم والشوك اللى فيها قليل جدا لذلك نادرا لما بتيجى بالشبك ولازم لصيد السمكه دى يكون معاك سن صغير جدا يعنى 12 او 11 ويكون ربط الشعر فى السن قليل يعنى لفتين تلاته بالكتير علشان ميشغلش حيز من السن علما بأن بق السمكه صغير جدا وله شكل غريب اشبه بخرطوم الفيل والطعم عبارة عن دود الارض فقط وبتكون موجودة قرب قاع النيل .

الرعاد ( الرعاش )
ـــــــــــــــــ
اوعي وشك..من اسم السمكه نعرف ان لها علاقه بالرعد او الرعشه فعلا لانها بها شحنه كهربيه (خلي باللك دي سمكة أمن مركزي بتاعة فض مظاهرات) ترعش وتؤلم من يحاول ان يمسك بها وهى على قيد الحياه والحل لو طلعت معاك اما انك تمسكها بأى عازل او تتركها لحد متموت في ستين داهية...ودى بتكون موجودة بين الحجارة والطعم عبارة عن دود الارض او مصارين الفراخ(شكلك كده عاوز تاخد معاك قفص فراخ يا معلم)

الدقماق "دكر العبيد"
ــــــــــــــــــــ
كأن العبيد ناقصين يبقا ليهم دكر واحد بس...انا مخلى الوحش دة للاخر لانه يستحق كلام كتير(بلطجي زي اميرة البلطجية بتاعتنا)فى بدايه الكلام عن هذا الوحش يجب ان نعرف ان مكان تواجدة بيكون فى قاع منتصف النيل ودة بيوصل احجام رهيبه جدا بعضه حوالى 80 كيلو بس سمعت انه بيوصل فوق 120 كيلو بس انا مشفتهوش للامانه بس دة ليه طريقه صيد خاصه شويه فى الصعيد

فى البدايه يجب تجهيز الطعم وهو عبارة عن (سمكه انوم ) ويجب ان تكون حيه وبكامل صحتها(يعني مش متجوزه ولا عندها عيال) ويجب ان تكون البوصه من النوع الممتاز والشعر لا يقل عن 80 ( دة مقاس الشعر) نبدا رحله صيد وحش من هذه الوحوش

غالبا ما يكون الصيد بالليل (علشان لما تغرق الشر بره وبعيد محدش يلحق يطلعك)يعنى من بعد الساعه 9 بس اللى بيكون عاوز يصطادة بيروح بعد العصر ليه؟ علشان لازم الاول يصطاد الطعم وهو سمكه الانوم ويزعل لو طلع واحدة تكون بالعه الطعم لان بالشكل دة بعد ميسلك السناره السمكه هتموت

المهم هو بيكون معاه عياشه يعنى كيس من الشبك بيحطه فى الميه ويحط فيه السمك اللى بيصطادة ليحافظ عليه حى

ويفرح جدا لو لقى سمكه السنارة جيه فى شفتها بس حتى لو مع صياد جنبه ممكن يخدها منه ويديله اللى هو عاوزة لحد كدة كويس الطعم موجود والسناره جاهزة نيجى بقى لشلك القرمه وهى بتكون عبارة عن 3 سنون مقاس رقم 1 يعنى سنارة كبيرة

طريقه وضع الطعم"سمكه الانوم"
ــــــــــــــــــــــــــ
الثلاث سنارات بيكون محطوطين فى السمكه كالاتى واحد فى المنطقه الى ورا الرأس مباشرا والثانى بيكون فى نص السمكه من اعلى الظهر والثالث بيكون فى الديل من اعلى طبعا كل الشعر اللى فى المكنه والقرمه مقاس 80 او اكبر وبعدين من فوق السمكه بحوالى متر او اكتر قليله بنربط قطعه من الحجر وزنها اكبر ون السمكه بس بنربطها بعقدة بسيطه وبشعر مقاس قليل جدا يعنى ممكن 10 و 15الغرض منها انها تحافظ على مكان السمكه فى القاع وكمان تقطع مباشرا مجرد مالسمكه الكبيرة تاكل الطعم لكى تكون انتا منك للسمكه وانتا وشطرتك بقى نيجى بقى لكيفيه وضع الطعم فى قاع النيل طبعا كدة بيكون الوزن كبير جدا يعنى السمكه تقريبا بتكون كيلو او كيلو ونص دى الطعم والحجر لازم يكون اتقل من كدة طبعا مينفعش انى احدف كل الوزن دة بالبوصه المهم بيكون بجانب الصيدين قارب صغير فاهم الموضوع دة بياخد السمكه والحجر ويمشى بيهم بالقارب

مع الحفاظ على ان السمكه تكون فى الميه للبقاء عليها حيه اطول وقت ممكن واللى ماسك البوصه بيكون بيسيب الشعر لحد القارب ميوصل فى المنتصف تقريبا ويسيب السمكه والحجر علشان تنزل القاع ويبقى الدور بقى كدة انك تنزل وراهم القاع واتمتع يا باشا

طبعا الفترة بتكون كبيرة جدا ( فترة الانتظار...خد معاك المصحف عشان ممكن تختم القرآن في هذه الحالة ثلاث مرات علي الأقل) لذا لازم يكون معاك سنارة تانى تصطاد بيها السمك العادى علشان متملش لان العمليه ممكن تقعد للصبح وعليك ان تتخيل الطعم عبارة عن سمكه اكبر من كيلو تخيل ايه اللى ممكن يطلع حوت

ونيجى بقى للمرحله الاصعب وهى خروج هذا الوحش من الميه بتكون صعبه جدا وممكن نستعين بأصدقاء مش بصديق واحد(او تتصل بقريب...او تاخد نصيحة الجمهور...او تغير السمكة)وغالبا ما نلجأ للقارب

يحكي أحد صيادي الحيتان النيلية فيقول في مذكراته(الله يرحمه):فى احد اليالى الخاصه بالصيد وبالصدفه البحته انا طبعا رامى بدود ارض بصطاد انوم او اى حاجة صغيرة على قدى وطبعا الشعر صغير يعنى القرمه 30 والمكنه 60 وفجأه الاقى مقدمه البوصه نزلت الميه بسرعه فتحت المكنه وسيبت الشعر تقريبا كله وطبعا كل الصيدين اللى جنبى عرفوا ايه اللى معايا وكل واحد طبعا بكلمته غرضهم المساعدة انا قلت كدة او كدة هو ضايع ضايع يعنى مستحيل يطلع بالشعر دة ولا السن 12 اللى كنت انا شغال بيه المهم قلتلهم سيبونى العب معاه شويه قبل ما يقطع وفعلا اول ما شبك معايا كانت حوالى الساعه 3 الفجر وفضل معايا لحد الساعه 4.5 ولقيت المقاومه بتعته انعدمت تماما بس قلت خلاص قطع بس بلم الشعر لقيت فى تقل غريب قلت اكيد دة من الحشائش اللى بتكون فى قاع النيل طبعا مستبعد انه يكون لسه موجود المهم ربنا اكرمنى وواحدة واحدة لميت الشعر وببص الاقى راسه هى اللى ظاهرة لما قرب منى انا اتفاجأت زى كل اللى قعدين جنبى وطبعا ولاد الحلال كتير طلعهولى بشوكه كانت معاهم وكان وزنه حوالى 12 كيلو نصيبه كدة هو اللى مصمم يطلع زهق من عيشته

ورحلة سعيدة يا عم أحمد وادعيلي
ومتنسيش انا ومولاتي أميرة البلطجية وبالهنا والشفاء
ويجعلوعااااااااااااااااااااامر
يا برررررررررررررررررررررررنس

Islamist Bloke said...

emos:

emos:

المنطقة اللى بيكون فيها سمك وصالحة للصيد-يعني ينفع نصطاد منها-الصيادين بيسموها دور

يعني دور المنيل...دور قصر النيل...دور الصخور العالية فى الزعفرانة...وكدة يعني

انا بقول اروح اصطاد من دور سوق العبور اسهل واحسن

بس البحر برضة متعة لا تنكر خصوصا فى البحر الاحمر

هقولك على احلى كلمة اتقالت لى كنصيحة لمواجهة دوار البحر فى رحلة العودة من المارينا يومها
احد الاصدقاء قال لى
البحر عايز صحوبية...اعتبر البحر صاحبك وانت تعدي ومترجعش...اعتبره زي حيوان مفترس وانت واقف ادامه وخايف يشم ادرينالين جسمك.....ما تعرفش البحر انك خايف منه...حط فى دماغك انك تمام ومتوهمش نفسك وانت مش هترجع معدتك

متخافيش يا ايمو

و نصيحة لازم تجربي البحر
بس جربيه فى يخت محترم قوى وثابت فى المياه مش اقل موجة تحدفه يمين وشمال

وربنا يهدي الجميع

Islamist Bloke said...

سمسم:



هاه

انجليزي ده يا مرسى؟

ما شاء الله عليك بجد يا سمسم انت المرة دي تفوقت على نفسك

شوف هقولك حاجة...واضح طبعا انك صياد أرارى وناصح جدا ما شاء الله عليك وان اغلب الكلام ده تجارب شخصية وطبعا مش لاقى حاجة اعدل عليها بس فيه نقطة انت نسيت تقولها...ان احسن طعم للبلطي هو الريم يا ريس-طبعا ملقوش فى الورد عيب قالوا احمر الخدين

بالنسبة للبحر المتوسط...ايدك منه والارض..السمك اللى بجد تلاقيه اما فى البحر الاحمر او بحيرة ناصر لكن المتوسط خلاص شكرا

وبعدين انا مش عايز اروح اسكندرية تانى يا سمسم...انا مش عايز اتعذب واعيش فى ذكريات الحب القديم وكدة....خلينا فى السمك الميكروسكوبي بتاع المنيل وقصر النيل يا عمي


بالنسبة للمعدات واضح انك لافف وداير وعارف اللنسة والفايبر وكدة بس اسمح لى اقولك انا مش بعرف اصطاد غير بمكنة
(:
للاسف اول ما اتعلمت الصيد اتعلمته على مكنة و مكنة ويش كمان والراتيو بتاعها 4:1:1 يعني كل لفة من الذراع تلف الحلة 4 لفات يعني من الاخر مكنة جبارة وكفاية اقولك انا عدة الصيد بتاعتى عملت يوم ما اشتريتها حوالي 180 جنية غير الاكسسوارات الزيادة

بالنسبة للطعم احسن حاجة للبلطي هى الريم واحسن حاجة للقراميط هى مصارين الفراخ او اى حاجة زفرة ولو هتعمل لها عجينة يبقى احسن تحط فيها دم او اى حاجة زفرة لان زي مانت قلت القراميط دي الزببالة بتاعة النيل او اى
catfish
عموما- وسبحان الله الذي خلق لها فمها بأسفل جسدها لتطهر الماء وقاع النيل من أى قاذورات فيه....وبيني وبينك القرموط حلو فى صيده لكن تطلعه وترميه تانى من طعمه الوحش...هو حلو فى صيده لانها سمكة قوية وعفية وقوتها فى المية تقريبا ستة أضعاف وزنها خارج المية فبيكون صيدها متعة انما ترميها عشان طعمها وحش او تتصدق بيها لأى حد فقير او لو ملقيتش فقرا يبقى قطة الشاطىء وخلاص


النقطة التانية : عايز اوصفلك احساسي وانت بتشرح الشعر يعني اية والسن نمرة واحد يعني اية وكدة:عارف لما طالب تفاضل وتكامل فى ثانوية عامة وواحد ييجي يقوله 3+2=5

مش بغيظك والله يا سمسم انت حبيبي وربنا لكن انت متخيل انى ابيض فى الصيد اوى كدة....يا معلم احنا بعون الله بنطلع وحوش بس فى الاحلام طبعا

خلاص يا سمسم احنا نعملها مسابقة ...فارس لفارس...والبحر سجال....و وريني يا عم الاحجام النيلية اللى بتحكي عنها....وعلى فكرة الاحجام اللى انت بتحكي عليها دي مستحيل تطلع فى النيل العادي بتاعنا بعد السد كدة....الكلام ده كله فى بحيرة ناصر....يعني 1600 كم سفر يا باشا

على فكرة انا ناوى اروح بحيرة ناصر قريبا ان شاء الله لانى بسمع عنها كلام خيالى وفعلا شفت صور على المنتدى منها قشر بياض 80 كجم تقريبا و كذا قرموط جنب بعض كل واحد فيهم طوله حوالى متر ونص ووزنه اكتر من 60 كجم وحاجات كدة

بجد يا سمسم لو ينفع نتقابل وننزل نصطاد سوا تبقى فرصة جميلة جدا واهو نبقى طلعنا من النت بحاجة مفيدة وهى التعرف على شخص موسوعة زيك

ما شاء الله عليك وربنا يوفقك ويزيدك ويبارك فيك