بسم الله الرحمن الرحيم

الاول قبل ما نبتدي نرغي ونتكلم ونحكي فى البلوج ده حبيت اعرفكم بنفسي

شاب عادي جدا جدا

نشأت في بيئة عادية جدا جدا

مصرية جدا جدا جدا

مرت بيا الحياة عادية جدا جدا

ولقيت نفسي فيها ماشي بالصورة العادية جدا جدا ( جعلوني فانجعلت) على رأى احمد خالد توفيق

وعلى ذلك يمكنكم ان تسموني ...مستر عادي جدا جدا

بس فيه فى دماغي افكار مش عادية ابدا

افكار بتجري وتحوم وتزوم وتصوت وتقلبني فى السرير او تخليني اتنطط وانا ماشي وتقوللى فوق بأة..اصحى بأة..الناس كلها بتتطور وانت لازم تطور نفسك اكتر عشان تتفوق..لازم عشان تحس بطعم النجاح اللى بجد مش كدةو كدة انك تكون اعلى من كل اللى حواليك

ولما ابص للشباب فى امريكا واوروبا(فى اوروبا والدول المتقدمة)الاقي الشاب عنده حاجات كتيرة مش موجودة عندنا هنا اولها واهمها هى حرية ووعى وادراك فوق المعتاد لدرجة انه ممكن يغير دينه او عقيدته ومن المعتاد ان كل شاب بعد ما يترك بيت اهله انه يعيش فترة فى حالة atheism او بيسموها بالعربي -كترجمة حرفية - الحاد - او بترجمتها المضبوطة - رحلة البحث عن الذات ومقارنة كل العقائد للوصول فى النهاية الى احسن واجمل والكثر العقائد ملائمة لذاتك

عشان كدة هناك عندهم الواحد لما بيعمل حاجة فى حياته او بيتخذ قرار معين بيكون فى غاية العزم والتصميم عليه عشان ده قراره هو بنفسه مش قرار حد تاني ومش مفروض عليه من جهة عليا

و فى نفس الوقت لو وقع فى حياته وقعة محدش بيسنده ولو حتى خسر بيته وشغله وراح يقيم عند اخوه مثلا لغاية ما يقف على رجله تاني اخوه بيعيشه عنده مقابل حاجة زي انه ينظف الجنينة او يغسل الصحون وهكذا..مادام ده قرارك لوحدك احنا مالنا يا عم؟

انا بأة نشأت فى اسرة مصرية طحن بمعنى الكلمة

الاب بيصلى بس فى البيت والام ممكن تشوفها بتصلى مثلا كل كام شهر كدة فى ساعة رضا عن الحياة او ساعة احتياج لربنا لكن غير كدة لا والاب مش فارقة معاه مين هيصلى ومين مش هيصلى ومين يكون مسلم اصلا لانه غالبا بيصلى كدة ومش عارف هو بيصلى لية اساسا ..ابقوا فكروني اكتب لكم مقال اسمه ..لماذا نصلى.. عن فضيلة الشيخ محمد حسين يعقوب

وطبعا الأبناء طالعين مش بيصلوا وكمان اتولد عندهم كره للصلاة من طباع ابوهم السيئة وفى نفس الوقت محافظته على الصلاة فاتكونت عندهم نظرية (كل مصلى او صاحب ذقن فهو فاجر كذاب )تماما الصورة اللى عادل امام بيحاول يرسمها فى كل افلامه عن الاسلاميين.

المهم انى قررت من سنة كدة انى ابدا رحلة حياتي اللى الشباب الامريكي والاوروبي بيعملها ..انك تكتشف نفسك(وهى جت لوحدها بصراحة مش عن قرار يعني)..طبعا مش الكلام البارد البايخ البايت بتاع شباب ماما سوزان وشباب المستقبل بتوع جمال مبارك اللى بيقول فى الاعلان بنظرة كلها حب وحيوية ..ياللا تعالى معانا ..اكتشف مواهبك وقدراتك الكامنة..اكتشف نفسك..والكلام الضايع ده

لا انا بجد قررت انى اعرف الدنيا فيها اية..اكتشف نفسي من خلال الحياة من حواليا..واكتشف الحياة من خلال نفسي ونظرتي ليها..

جربت حياة الخمور والحشيش والمخدرات

جربت صحوبية البنات بمعدل 5 بنات مختلفة كل شهر

جربت حياة النسونجي اللى مقضيها حريم ونوم مع نسوان و تفاخر بالزنا اخر اليوم مع الشلة عالقهوة

جربت كام قصة حب كدة..كانت اخرهم هى اللحظة الفاصلة وبداية حياتي الجديدة

جربت الليبرالية كمذهب سياسي يدعو للحرية ودرست التنظير الاقتصادي بتاعها

قرأت عن الماركسية وفشلها

قرأت عن الاشتراكية ووعودها وامالها

سمعت من علمانيين وديمقراطيين وليبراليين واشتراكيين ومن كل المذاهب الوضعية على كل شكل ولون

وجربت الاسلام

ومن غير ما اطول عليك

ومن غير لت وعجن وكلام كتير

اقولك ببساطة

اية الروعة دي

الكلام ده بجد مش كلام بشر ولا ينطق عن الهوى وفعلا النظام ده اقوى نظام اقتصادي وروحاني وتعبوي وتجهيزي وتنظيمي وفكرى و..وو.. و اى حاجة تخطر ببالك ممكن تقابلك هتلاقي الاسلام فيها هو البرنجي

الاسلام جمع بين كل الحاجات الحلوة ونبذ كل الحاجت الوحشة

هتلاقي فيه التكافل الاجتماعي اللى الاشتراكية بتحلم نظريا للوصول الى اقل من جزء من الف جزء منه

هتلاقي فيه الحرية(اللى بتنادي بيها الليبرالية) بس المضبوطة اللى لها معايير الهية وضعها خالق الانسان والاكثر معرفة به لذا مش هتلاقي فيها تعديل كل فترة والتانية يقيد الحريات او يفتحها اكتر

هتلاقي فيها الروحانية الجميلة اللى فى المسيحية بس على اجمل واجمل لان الروحانيات فى الاساس مستمدة من الخالق عز وجل وطول مانت على ضلال هتحس انك ضايع وتايه ومش لاقى اللى انت عايزه

هتلاقي فيها المادية النفعية -اللى بتحثك فى نفس الوقت على استخدام المادة فى خدمة الروح والدين والحصول على الجنة-هتلاقي المادية اللى اليهود حولوها فى عقيدتهم لشىء بشع بغيض تقرف من مجرد الكلام عنه

انا نفسي يكون معايا لسان مفوه وقلم قوى واسلوب شداد-حلوة شداد دي- عشان اشدك للى انا حاسس بيه اكتر واكتر

الخلاصة عشان ما نطولش

• فى البلوج ده هاحكي لكم عن بعض الذكريات الرومانسية اوى اوى
• وبعض الملاحظات والخبرات الجنسية القذرة اوى اوى
• وبعض التعاليم الاسلامية المعتدلة اوى اوى
• وبعض الافكار الراديكالية المتشددة اوى اوى اوى
• وبعض الاعترافات اللى هاكون مبسوط اني بخرجها وانفس عن نفسي - بس فى حدود طبعا عشان منبقاش من المجاهرين-
• وبعض الامنيات اللى عايز اعملها عشان ابقى مسلم بجد لاني موصلتش للى عايزه لان الاسلام الكامل صعب ومش العملية سهلة انك تديها دقن وجلبية وتنزل تصلى الفجر كام يوم فى الجامع وتسمع لك كام شريط وتقرا لك كام كتاب فى الاصول وبعدين تقول انا بقيت شيخ..لا استني هنا ده المشوار طويل اوى اوى يا معلم والعملية مش سهلة زي ما السنية كانوا بيقنعوك فى الاول انه ركعتين وهتلاقي نفسك فريش لا دع العملية عايزة صبر ومثابرة وجهد من اول ما تلتزم لغاية اخر لحظة فى حياتك

• هاحكي لكم عن مشاكلي مع الرياء واحساسي انى بنافق نفسي وبنافق الناس
• هاحكي لكم عن اعتى المشاكل النفسية اللى بتواجهك فى حياتك سواء وانت ملتزم او وانت مقضيها
• هقولك اية اهم ما حسيت بيه وانا مقضيها - وفعلا تعبير وانا مقضيها ده انسب تعبير لاني مش لاقي وصف لحياة الشباب المصرى العادي جدا غير كدة- لانه شباب مش ماشي على اى منهج ولا اسلامي ولا علماني ولا حتى دنيوي تمتعي..يعني انا مثلا كنت بقول زمان انا عشان ادخل جهنم بضمير مرتاح مش هادخلها عشان بوسة لا انا لو دخلتها ادخلها عشان حاجة تستحق - ولو انه مفيش حاجة فى الدنيا كلها تستحق لحظة فى جهنم يعني- بس شوف انت شاب من دول واتعجب يا اخي..تلاقيه ولا بيزني ولا بيشرب خمرة ومع ذلك مش بيصلى..طيب مانت لما مش هتصلي تنسي الجنة يا روش..وعلى هذا المنوال
• والكلام كتير كتير كتيييييييييييييييير
• وهقولكم اهم ما حسيت بيه فى اعتناق النظم العلمانية والحياة بتفكيرها واسلوبها
• وهقولكم لقيت اية بأة..وما ادراك.. فى الاسلام وعيشة الجامع وحلاوتها

بس استنوا هنا

عشان نكون متفقين..معلش انا طولت عليكم بس الشرط نور..

انت هنا مش هتقرا كلام معبر عن وجهة النظر الاسلامية تماما

واحتمال احيانا متقراش كلام اسلامي اصلا

انت هتقرا كلام واحد مازال فيه الكثير من النقائص والكثير جدا جدا مما يسمى-وشوف الجاية دي- ما يسمي ب (عفن الجاهلية) لذا ما تزعلش وتقفل وتقول استغفر الله العظيم لما احكيلك مثلا عن احساس حلو عشته وانا بقرا عمارة يعقوبيان..او عن خفقة قلبي خفقها وانا بسمع اغنية بتفكرني بالحب الماضي سمعتها فى العربية مع اصحابي..او او..

مش عايزين تشدد..وقبل ما تحاسبني حاسب نفسك..هنا مجال للرأى الحر..ويسقط حسني مبارك..ويسقط كل اللى بيكتموا الاراء الحرةونتقابل مع اول جزء من الذكريات الحلوة يا شباب

والسلام عليكم ورحمة الله وبركاته